رێیا پەیادە یا كەمەرا ئامێدیێ ل شەش جهان هڕیایە
ئامێدیێ، مەحمود نهێلی:
ژ ئەنجامێ بارینا بارانێن زۆر و هڕیانا ئەردی، ل شەش جهان رێیا پەیادە، ئەوا ل دۆر ئامێدیێ دزڤڕیت هڕیایە و بكێر هاتنوچوونێ ناهێت.
ئەندازیار ئەڤراز حەسەن، سەرۆكێ باژێرڤانییا ئامێدیێ بۆ رۆژناما ئەڤرۆ دیار كر، ژ ئەنجامێ بارینا باران و بەفرێن زۆر د ئەڤ سالە دا و زێدەبوونا رتۆبەتا ئەردی، هەروەسا ژ ئەنجامێ دەركەفتنا چەندین كانی و ئاڤێن نوو و زێدە تەربوونا ئەردی، رێیا پەیادە یا ل دۆر ئامێدیێ دزڤڕیت ل چەندین جهان خراب بوویە، هەر چەندە نوكە ئەڤ پرۆژە د قووناغا بجهئینانێ دایە و كار ل سەر دهێتە كرن.
ناڤهاتی گۆت: «ژ بەر كو هێشتا پڕۆژە نەهاتییە رادەستكرن، لەو نووژەنكرن و چێكرنا ڤێ رێیێ دكەڤیتە ستوویێ بەلێندەری و ئەو یێ بەردەوامە ل سەر كارێ خوە، دا كو جارەكا دی ئەڤ رێیە بهێتە نووژەنكرن، ئەڤ پرۆژە ئێكە ژ پرۆژەیێن گرنگ یێن گەشتیاری و خزمەتگوزاری ل دەڤەرێ، كو ب مەرەما جوانكرنا سیمایێ باژێرێ ئامێدیێ و دروستكرنا جهەكێ گونجای بۆ پیاسە و وەرزشا وەلاتییان و گەشتیاران هاتییە ئەنجامدان، درێژاهیا وێ دۆرێن سێ كیلۆمەترانە و پتر ژ دو ملیار دیناران بۆ هاتینە تەرخانكرن و نێزێكێ دو سالایە كار تێدا دهێتە كرن».
