رەسەنایەتی د مۆزیكا كوردی دا كێم بوویە
زنار تۆڤی:
سیروان جەلال، رێڤەبەرێ كارگێڕی یێ گرۆپێ پاییز یێ هونەری ل سلێمانیێ، كو گرۆپێ وان یێ سەمایێ، پشكداری د فەستیڤالا سەمایێ سا دهۆكێ دا كربوو، د دیدارەكێ دا بۆ رۆژناما ئەڤرۆ دیاركر كو ئەو دەرچوویێ پشكا مۆزیكێ یە، ل پەیمانگەها هونەرێن جوان ل سلێمانیێ و ئامیرێ ڤیۆلایێ دژەنیت، ل گەل دەف و دهۆلێ، هەروەسا نوكە رەسەنایەتی د مۆزیكا كوردی دا كێم بوویە، بزاڤ دهێنە كرن، كو مۆزیكا كوردی ب فۆرمەكێ مەزنتر یێ مۆزیكی بهێتە زیندی كرن، هەر چەندە ب رەنگەكێ گشتی، گوهدارێ مۆزیكا كوردی بەرب مۆزیكەكا دی ڤە چوویە، هەكە ئەم ل مۆزیكا خوە نەبینە خودان، دێ زیان گەهیتە مۆزیكا مە یا رەسەن یا كوردی.
ناڤهاتی گۆت: ژبەركو مە سۆشیال مەدیا خراب ب كارئینا، ئەم تێكهەلی تشتەكێ بووینە و ئەم نوزانین چ تشتە، لەوما مۆزیكا كوردی گەهشتە ڤی ئاستێ نوكە هەیی، دیسان هەبوونا فەستیڤالا سەمایێ ل دهۆكێ گەلەك گرنگیا خوە هەبوویە و ئەم دخوازین ئەڤ فەستیڤالە یا بەردەوام بیت، چونكی ڤێ فەستیڤالێ خزمەتەكا مەزن بۆ سەمایا كوردی كر و دڤێت ب رێیا وێ ئەم فولكلۆرێ خوە بۆ خەلكێ جیهانێ بدەینە نیاسین.