رەعەد سەلیم : یاریزانەکێ بەغدا بۆ ئەگەرێ روودانێن یاریگەھا زاخۆ تێکدانا یاریێ
ئەڤرۆ،محەمەد عەلی:
پشتی سکرتێرێ لژنا سزایان ل ئێکەتیا تەپاپێ یا عیراقێ دەست ژ کارکێشانا خوە پێشکێشی ئێکەتێ کر ژبەر روودانێن یاریا دناڤبەرا یانا زاخۆ و بەغدا ژ خولا عیراقێ بۆ یانێن پلا نایاب ئەوا ل یاریگەھا زاخۆ یا نیڤدەولەتی ھاتیە پێش دیارکر کو یاریزانەکێ بەغدا بۆ ئەگەرێ روودانان و بێی بەرپرسیارەتی ل ستۆیێ وی بھێتە کرن.
زێدەتر داخویانیەکا تایبەت دا رەعەد سەلیم بۆ رۆژناما ئەڤرۆ گۆت: یاری ب شێوەیەکێ درست و بێ ئاریشە حەتا خولەکا ٨٠ برێڤەدچوو، بەلێ ددەمەکی دا یاریزانەکێ یەدەک یێ یانا بەغدا سفکاتی ب جەماوەرێ زاخۆ دکر ب ھندەک کارێن نە شرین کو بوویە ئەگەر جەماوەر دولکێن ئاڤێ پاڤێژیتێ و یاریزانەکێ یەدەک یێ بەغدا تووشی ھنگاڤتنەکێ بکەت و دویڤدا ھەموو یاریزانێن یەدەک یێن یانا بەغدا ھاتنە دناڤ یاریگەھێ دا، بەلێ ژ نشکەکێ ڤە یاریزانەکی بێ چو درب ڤێ بکەڤن خۆ ئێخستە ئەردی و ئەز بەرپرسیارم ژ ئاخڤتنا خوە و بەرھەڤم راستیێ ژی دیاربکەم.
ژلایەکێ دویڤە ناڤھاتی گۆت: ھەردیسا دناڤ یاریگەھێ دا یاریزانەکێ بەغدا ئاخڤتنێن کرێت گۆتنە گۆلچیی زاخۆ دلۆڤان مەھدی ئەوێ ژلایێ خۆڤە بەرسڤا وی ب دربەکی دایی، ھەرچەندە یاریی بەرەڤ وەکھەڤیێ دەربازبوو بەلێ دیاربوو تیما بەغدا مەرەم پێ ھەبوو ئەو ئاریشان پەیدابکەن دا یاری بھێتە راوەستاندن.
