رەنگە ل حەفتییا بهێت رێككەفتنا ئەسیكۆدا بهێتە ئیمزاكرن
شاندەكێ حكومەتا هەرێما كوردستانێ ب مەرەما گەهشتنا رێككەفتنا دووماهییێ ل گەل حكومەتا فیدرالی ل سەر بابەتێ ئەسیكۆدا دێ سەرەدانا بەغدا كەت.
د. سامی جەلال، سەرۆكێ شاندێ حكومەتا هەرێما كوردستانێ بۆ سیستەمێ ئەسیكۆدا دیار كر، بڕیاربو، رۆژا دوشەمبی شاندێ وان بۆ پرسا ئەسیكۆدا بچیتە بەغدا، بەلێ سەرەدانا وان بۆ دوشەمبیا حەفتیا بهێت، 15ی خزیرانێ، هاتە پاشئێخستن و گۆت: «ئەگەرەكێ زۆر هەیە حەفتیا بهێت، هەردو شاندێن حكومەتا هەرێما كوردستانێ و حكومەتا فیدرالی دەربارەی سیستەمێ ئەسیكۆدا، بگەهنە رێككەفتنا دووماهییێ و یاداشتەك دێ هێتە ئیمزاكرن».
د. سامی دەربارەی خالێن جهێ ناكۆكی و دانوستاندنێ د ناڤبەرا هەولێر و بەغدایێ دا گۆت: «ب رەنگەكێ گشتی ل سەر سیستەمێ ئەسیكۆدا رێككەفتینە و ب تنێ چەند كێشێن بچووك یێن تەكنیكی ماینە، هەروەسا هەرێما كوردستانێ د بجهئینانا مەرج و داخوازییان دا دێ چیتە د ناڤ وی سیستەمی و دێ میكانیزما وێ بجهئینیت».
ناڤهاتی گۆت ژی: «مە وەكو حكومەتا هەرێمێ، تێگەهشتنەكا باش ل گەل كابینەیا نوكە یا حكومەتا ئیراقێ هەیە و چو كێشە بۆ رێككەفتنا دووماهییێ دروست نابن، هەروەسا سیستەمێ ئەسیكۆدا، سیستمەكێ ئەلكترۆنی یێ نێڤدەولەتییە بۆ برێڤەبرنا داتایێن گومركی و ژ لایی نەتەوێن ئێكگرتیڤە گرنگی پێ هاتیە دان، ئارمانج ژ ڤی سیستەمی ب ئەلكترۆنیكرنا هەموو رێكارێن گومركی، بلەزكرنا مامەلێن بازرگانی، رێگریكرنە ل گەندەلی و زەلالكرنا داهاتێ ناڤخۆیی یە، حكومەتا فیدرال ئەڤە دەمەكە كار ب ڤی سیستەمی دكەت و داخواز ژ هەرێما كوردستانێ ژی كرییە بچیتە د ناڤ ڤی سیستەمی دا، بۆ ئێكخستنا رێكارێن دارایی و گومركی یێن هەموو دەرگەهێن سنۆری ل سەرانسەری ئیراقێ».
