رەوش ل ئیرانێ و رۆژهەلاتێ کوردستانێ گەلەک خرابە
ب، سه‌رجان مەحمود:
چاڤدێرێن سیاسی ل ئیرانێ و رۆژهەلاتێ کوردستانێ دیار دکەن ژ بەر رەوشا نها یا خراب ژیانا خەلکی ل ئیرانێ و رۆژهەلاتێ کوردستانێ گەلەک خرابە و بێکاریەکا گەلەک مەزن هەیە و رێژەیا هەژاریێ ژی گەلەک زێدە بوویە.
د. ئەردەشیر پشەنگ مامۆستایێ زانکۆیێ ل رۆژهەلاتێ کوردستانێ دیار کر، رەوشا نها یا ژیانا خەلکی ل ئیرانێ و رۆژهەلاتێ کوردستانێ گەلەک خرابە، رۆژانە بهایێ دۆلاری گران دبیت و ل هەمبەر دا بهایێ تمەنێ ئیرانێ گەلەک هاتیە خوار، نها تمەنێ ئیرانێ بوویە ئێک ژ پارەیێن هەری بێ بها ل جیهانێ دا و گۆت: (بهایێ کەلوپەلان گەلەک گران بوویە، خەلک نەشێن پێدڤیاتێن رۆژانە بۆ خوە دابین بکەن، ژ بەر شەڕێ ٣٩ رۆژان یێ د ناڤبەرا ئەمریکا و ئسرائیلێ ل گەل ئیرانێ دا ب سەدان کارگەه ژناڤ چووینە و ب هزاران کەس بێکار ماینە و هەروەسا ژ بەر دۆرپێچا ڤێ دووماهیێ یا دەریایی ل سەر ئیرانێ رەوشا ئابووری گەلەک خراب بوویە).
ناڤهاتی د بەردەوامیا ئاخڤتنا خوە دا ئەو یەک ژی دیار کر، دڤێت بەرپرسێن ئیرانێ ئێدی ب جهێ بلندکرنا درووشمان هزرا باشکرنا ژیانا خەلکی بکەن، ئەڤرۆکە خانەنشینەک ل ئیرانێ نەشێت ب مووچەیێ خوە یێ خانەنشینیێ کرێیا مالا خوە بدەت، پا هەکە نەخوەش کەڤیت و پێدڤی تشتەکێ بیت دێ چ کەت؟ ئەو یەک ژی نیشا ددەت کو رەوشا خەلکی ل ئیرانێ و رۆژهەلاتێ کوردستانێ گەلەک خرابە و ب سیاسەتا نها دێ رەوش گەلەک خرابتر ژی لێ هێت، دڤێت بەرپرسێن ئیرانێ چارەسەریەکا گونجای بۆ رەوشا نها ببینن.
قارەمان سادقی چاڤدێرێ سیاسی ژی دیار کر، د رەوشەکێ دا کو ژیانا خەلکی گەلەک خراب بوویە، بەرپرسێن ئیرانێ ب جهێ کو هاریکاریا خەلکی بکەن و رەوشا هەی باش بکەن بەردەوامیێ ددەنە سیاسەتا گرتن و ترساندنێ، رۆژانە چالاکڤانێن کورد ل ئیرانێ دهێنە دەستەسەر کرن، هەروەسا رێژەیا سێدارەدانێ ژی ل ئیرانێ ڤێ دووماهیێ گەلەک زێدە بوویە و تنێ ل مەها ١٠ یا ئەڤسالە چەند هزار چالاکڤان ل ئیرانێ هاتینە دەستەسەرکرن و هەروەسا سزایێ سێدارەنێ ل سەر ب دەهان کەسان هاتیە سەپاندن، ئەو یەک ژی رەوشەکا گەلەک خرابە و وەلات وەسا ناهێتە برێڤەبرن و دڤێت بەرپرسێن ئیرانێ دەست ژ سیاسەتا خوە یا شاش بەردەن و ب جهێ گەف و ترساندنێ هزرا چارەسەرکرنا ئاریشەیێن خەلکی بکەن.
ناڤهاتی ئەو یەک ژی دیار کر، خەلک گەلەک دترسن کو دێ جارەکا دی شەڕ روو دەت، رەوشا خەلکی گەلەک خرابە، کار نینە، بێکاری گەلەک زێدە بوویە و هەروەسا رێژەیا هەژاریێ ژی گەلەک زێدەتر لێ هاتیە و ئەو یەک ژی بوویە ئەگەر گەلەک ئاریشەیێن دی ژی دروست بووینە و گۆت: (مخابن رێژەیا دزیێ و تاوانان ژی گەلەک زێدە بووینە، دەمێ د جڤاکەکێ دا رێژەیا بێکاریێ و هەژاریێ زێدە بیت دێ دزی و تاوان ژی زێدەتر لێ هێن و رەوشا نها یا ئیرانێ براستی ژی گەلەک خرابە و پێدڤیە د زووترین دەم دا چارەسەریەکا گونجای بۆ رەوشا نها یا خەلکی بهێتە دیتن).
حەکیم تاهری مامۆستایێ زانکۆیێ ل ئورمیێ ژی دیار کر، ئیران ئێکە ژ وەلاتێن هەری دەولەمەند ل جیهانێ، لێ مخابن ژ ئەنجامێ سیاسەتا شاش یا پتر ژ چل سالێن بۆری نها ئیران د رەوشەکا گەلەک خراب دایە، رێژەیا خواندنێ گەلەک کێم بوویە، گەلەک ژ گەنجێن نها ناخوازن بچنە زانکۆیێ و دبێژن هەکە خواندنا خوە تەمام ژی بکەم چو کارەک نینە بکەم، ڤێجا بۆچی بخوونم؟ ئەو یەک ژی کارەساتەک گەلەک مەزنە، رێژەیا بێکاریێ دەمێ ل وەلاتەکێ زێدە بیت، بێگومان گەنج ژی ناخوونن و نەچار دبن کارەکێ دی بکەن و دەمێ کار ژی نەبیت دێ دزی و تاوان زێدەتر لێ هێن و گۆت: (لێ مخابن تشتێ نها ئەز دبینم بەرپرسێن ئیرانێ ئاگەه ژ ژیانا خەلکی نینن، خەلک ل جهەکێ و بەرپرسێن ئیرانێ ل جهەکێ دی، خەلکی نان نینە بخوون و بەرپرسێن ئیرانێ ب جهێ کو هزرا چارەسەرکرنا ئاریشەیێن خەلکی بکەن دیسان یێن دبێژن دێ ئیسرائیلێ ژناڤ بەین و نزانم دێ چ کەین، وەسا دێ رەوش گەلەک خرابتر ژی لێ هێت، چونکی نها باوەریا خەلکی ب دەولەتێ نەمایە).
مامۆستایێ زانکۆیێ ئەو یەک ژی دیار کر، ژ ئەنجاما سیاسەتا شاش یا چەندین سالێن بۆری ئابوورێ ئیرانێ ژناڤ چوویە، تمەنێ ئیرانێ چو بهایێ خوە نەمایە، هەر رۆژ بهایێ کەلوپەلان گران دبیت، ئەڤرۆکە هەکە بهایێ تشتەکێ سەد هزار بیت رۆژا دی بیست هزار گران دبیت و مووچە ژی تێرا خەلکی ناکەت و کار ژی نینە و گۆت: (براستی ژی خەلکێ ئیرانێ نها د قەیرانەکا گەلەک مەزن دا دژین، خەلک تووشی نەخوەشیێن دەروونی بووینە، ئاریشەیێن جڤاکی گەلەک زێدە بووینە و نها گەنج نەشێن ژیانا هەڤژینیێ پێک بینن و ئەو یەک ژی وەسا کریە گەلەک ئاریشەیێن دی د ناڤ جڤاکێ ئیرانێ دا دروست ببن).
ئەو یەک د دەمەکێ دایە بەری چەند رۆژان هژمارەک زێدە ژ کەسایەتیێن ئیرانێ د نامەیەکێ دا داخواز ژ سەرۆک کۆمارێ ئیرانێ و بەرپرسێن دی کربوون کو د زووترین دەم دا چارەسەریەکا گونجای بۆ رەوشا نها پەیدا بکەن، هەکە رەوشا ئابووری وەسا بەردەوام بیت دێ خەلک دەست ب خوەنیشادانان کەن و دێ رەوشا ئیرانێ گەلەک خرابتر لێ هێت.
