زاخۆ، دهۆك و نەورۆز رێزێن خوە پاراستن و هەولێر ل نێزیک هێلا مەترسیێ مایە
ب دووماهی هاتنا یاریێن گەڕا 34ێ ژ هەڤڕكیێن خولا ستێرێن ئیراقێ یا فوتبۆلێ ژ سەرجەمێ هەرچار یانەیێن كوردستانێ ب تنێ یانەیا دهۆك سەركەفتن ئینا و یانەیا شورتە پێنگاڤەكا دی بۆ پاراستنا سەرێ لیستێ و نێزكبوون بەر ب ناسناڤێ وەرزێ ئەڤ سالە هاڤێژت.
دهۆكێ ئاهنگ بۆ سەركەفتنا كلاسیكۆیێ گێرا
ل یاریگەها خوە و دناڤ پشتەڤانێن ئەلهۆیێن چیا تیما یانەیا دهۆك شیا سەركەفتنەكا گرنگ ل سەر یانەیا هەولێرێ بینت ب دو گۆلان بەرانبەر گۆلەكێ، ئەڤ سەركەفتنە بوو ئەگەر رێزبەندییا خوە ب جوداهییەكا باش یا خالان ژهەڤڕكا خوە دووربكەڤیت و خالێن خوە بگەهینە 55 خالان ل رێزا شەشێ پارێزیت، لێ خوسارەتییا هەولێرێ د بەرژوەندییا وێ دا نەبوو ژبەركو یا د ناڤەراستا هێلا مەترسییا داكەفتنێ دا ب36 خالان بمینتە ل رێزا 14ێ كێمتر ژ تیما نەفت ئەلبەسرا ئەوا 28 خال هەین رێزا 18 كو ئەو تیما دڤێ رێزبەندیێ دا دێ یارییەكا ڤەبڕ دگەل تیمەكا پلا نایاب كەت ژبۆ وەرگرتنا پلێتا مانا خوە د خولا ستێرێن ئیراقێ دا، لەوما هێشتا مەترسی ل سەر هەولێر مایە.
راهێنەرێ دهۆكێ چ گۆت
د پرێسكۆنفرانس دا ئەحمەد خەلەف راهێنەرێ تیما یانەیا دهۆك گۆت: سۆپاسییا یاریزانێن خوە دكەم كو د ماوەیێ چار رۆژان دا شەش خال بۆ تیمێ كۆمكرین سەرباری گەشت و گڤاشتنێن رۆژانە، ئەم شیاین پاراستنا دیرۆكا یاریێن سەركەفتنان د كلاسیكۆیا كوردستانێ دا دگەل هەولێرێ پارێزین و هەردەم باشترین بوو دهۆكێ یە، مە پشت گەرمییا خوە دا بوو نیڤا دویێ كو زێدەتر گۆلان بكەین و گەلەم دەلیڤەیێن گۆلكرنێ هاتنە ژ دەستدان، پیرۆزبیت بۆ پشتەڤانێن یانەیا دهۆك.
سەمیر بابویی چ داخویانی دا
ژلایێ خوەڤە سەمیر بابو راهێنەرێ تیما یانەیا هەولێر دەستخوەشییا یاریزانێن خوە كر كو باشترین ئاست نیشان دا و گۆت: براستی ئەم ژ هەژی خوسارەتیێ نەبووین، د نیڤا ئێكێ دا ئاستەكێ گەلەك باش مە نیشان دا و د نیڤا دویێ دا كۆمەكا دەلڤەیان مە ژ دەستدان، هەرچەندە ئەم دشیان بتنێ بۆ خالەكێ بكەین لێ هەمی یاریزانا ب شێوازێ بێ ترس و باشجەلایی دكرن.
هیڤیێن زاخۆ بۆ رێزا چارێ هاتنە پاشئێخستن
ل باژێرێ عەمارە و ل سەر پلەیا 50 یا سەقایێ گەرمێ تیما یانەیا زاخۆ دەست ڤالا دناڤ یاریگەها میسان ڤەگەڕیا پشتی دگەل خوانێن ئەردی نەفت ئەلمیسان ب دو گۆلان تووشی خوسارەتیێ بوو، ئەڤ ئەنجامە كارتیكرن ل سەر هیڤیێن كوڕێن خابووری كرن ئەوێن ب هیڤیێن مەزن حەزا زێدەتر پێشڤەچوونێ و دەستڤە ئینانا رێزا چارێ هەبوو، خالێن زاخۆ مانە 59 خال ل رێزا پێنجێ لێ دەلیڤە یا بەردەستە د هەر چار گەڕێن مایی دا ئاست و ئەنجامێن خوە باشتر بیت دگەل كەفتنا جارەكێ یا هەڤكڕكا خودانا رێزا چارێ نەجەف ئەوا 62 خال هەین دێ دۆبارە ڤەگەڕێتە ڤێ رێزێ، یارییا بهێت یا زاخۆ دناڤ ئەردێ وێ دایە بەرانبەر كەربلا و دەلیڤە سەركەفتنێن خوە ڤەگەڕینیت.
راهێنەرێ زاخۆ: سەقایێ گەرم و گەشتكرن كارتیكرن ل سەر یاریزان هەبوو
د پرێسكۆنفرەنسەكی دا نەبیل عەواد هاریكارێ راهێنەرێ زاخۆ گۆت: سەرباری یاریزانێن مە ئاستەكێ گەلەك باش نیشان دا لێ وەستیانا یاریزانان ب گەشتەكا درێژ ژ زاخۆ بۆ باژێرێ میسان بتنێ دماوەیێ دو رۆژاندا كارتیكرن ل سەر جەستە و شیانێن یاریزانان كربوو، زێدەباری د ناڤا یاریگەهێ دا سەقایەكێ زوور گەرم بوو بەرۆڤاژی ئەو سەقایی ئەم تێدا ل زاخۆ، بۆ یارییا بهێت دێ هەمی بزاڤان كەین قەرەبوویا خالان بهێتە كرن.
ژلایێ خوە تیما یانەیا نەورۆز پشتی بۆرینا 11 گەڕا ئێكەم خوسارەتی دناڤ ئەرد و جەماوەرێ خوەدا تۆماركر پشتی دگەل یانەیا نەجەف ب سێ گۆلان تۆشی خوسارەتیێ بوویی، ئەڤ ئەنجامە د بەرژوەندییا مێڤانان دا بوو ئەوێن رێزا چارێ موكمكری و مفا ژ خوسارەتیا زاخۆ وەرگرتی، نزار مەحرۆس راهێنەرێ نەورۆز ئەگەرێن خوسارەتیێ بۆ ئاستێ خراب یێ یاریزانێن خوە ڤەگەڕاند و گۆت: ئاستێ یاریزانان دباش نەبوون و هەروەسان ئەم كادرێ راهێنانێ بەرپرسیارین ژ خوسارەتیێ، گۆلێن ب سانەهی ل سەر تیما مە دبوون.
ژ ئەنجامێن یاریێن دی، حدود 2-1 مینا، كەربەلا 2-1 ئەلكەرخ، نەفت ئەلوەسەت چنە-1 زەورا، ئەمانەت بەغدا 1-1 كارەبا، نەفت ئەلبەسرا چنە-2 ئەلقاسم، جەوییە 2-چنە ئەلنەفت، شورتە 3-2 تەلەبە.
رێزبەندیا گۆلكەرێن خولێ
هەتا نوكە هێرشبەرێ یانەیا جەوییە ئەیمەن حسێن ب 26 گۆلان سەرێ لیستەیا گۆلكەران دهێت، دووڤدا پیشەكارێ نەفت ئەلمیسان یێ سوری عەلائەدین ئەلدالی ب18 گۆلان و پیشەكارێ سوری یێ شورتە مەحمود ئەلمواس ب هەمان گۆلان رێزێن دویێ و سێیێ دهێن، پیشەكارێ نیجیری و یانەیا نەورۆز ئیبراهیم تۆمیۆ و هێرشبەرێ شورتە موهەنەد عەلی و یاریزانێ كورد یێ خەلكێ ئاكرێ ئیبراهیم غازی ب 16 گۆلان رێزێن ب 16 گۆلان رێزێن چارێ هەتا شەشێ ل دووڤ ئێك دهێن، ژلایەكێ دووڤە هەر ئێك ژ محەمەد قاسم یاریزانێ یانەیا هەولێر ب تۆماركرنا 12 گۆل هەنە، دووڤدا یاریزانێ نەورۆز مەروان حسێن 10گۆل تۆماركرینە، یێ تونسی و یانەیا دهۆك عیماد ئەللواتی نەهـ گۆل هەنە، ستێرێ بەرازیلی و یانەیا زاخۆ فرانك سیدریك حەفت گۆل هەنە.
رێزبەندییا خولێ پشتی ب دووماهی هاتنا یاریێن گەڕا 34ێ.
1- شورتە 77 خال.
2- جەویە 72 خال.
3- زەورا 69 خال.
4- نەجەف 62 خال.
5- زاخۆ 59 خال.
6- دهۆك 55 خال.
7- نەورۆز 51 خال.
8- تەلەبە 46 خال.
9- حدود 45 خال.
10- نەفت 43 خال.
11- نەفت ئەلمیسان 42 خال.
12- كارەبا 39 خال.
13- مینا 37 خال.
14- هەولێر 36 خال.
15- كەربەلا 36 خال.
16- كەرخ 32 خال.
17- ئەلقاسم 31 خال.
18- نەفت ئەلبەسرا 28 خال.
19- ئەمانەت بەغدا 24 خال.
20- نەفت ئەلوەسەت 15 خال.
