زاخۆ ڕاهێنەرێ نەسرا سعۆدیێ دڤێت و هاتنا یاریزانێن پیشەكار د زێدەبوونێ دانە
یانەیێن ئیراقێ بەردەوامن ل سەر چالاكییا خوە د ناڤا مێركاتۆیا هاڤینێ دا خوە بەرهەڤكرن بۆ وەرزێ نوو 2025-2026 یا خولا ستێرێن ئیراقێ یا فوتبۆلێ، دهێتە پێشبینیكرن د وەرزێ ئەڤ سالە دا ڕاهێنەر و یاریزانێن پیشەكار ل خولێن عەرەبی دناڤ خولا ئیراقێ دا بهێنە دیتن ژبەر هەبوونا گرێبەست و دانۆستاندنێن بەردەوام.
زاخۆ بەرهەڤییا بۆ دو قارەمانییان دكەت
ژبەركو بۆ وەرزێ نوو یانەیا زاخۆ دێ ل دو چەپەران شەڕی بۆ ناسناڤان كەت خولا ستێرێن ئیراقێ و كۆپا كەنداڤی كو دبیتە جارا ئێكێ د دیرۆكا وی دا پشكداربیت، پێنگاڤێن كارگێرییا یانەیێ چربووینە ژبۆ ئینانا ڕاهێنەر و یاریزانێن خودان شیان، ل دووڤ ژێدەرێن جودا یێن رۆژنامەڤانی هەتا نوكە دانۆستاندنێن یانەیا زاخۆ دگەل ڕاهێنەرێ كرواتی ئالین هۆرفات ڕاهێنەرێ پێشتر یێ یانەیا نەسر یا سعۆدیێ گەهشتینە قووناغەكا باش، دوور نینە ئەڤرۆ هەتا سوبەهی گرێبەستا وی بهێتە ڕاگەهاندن، ژلایەكێ دووڤە دانۆستاند دگەل ستێرێ یانەیا شورتە و هەلبژارتیێ ئیراقێ موهەنەد عەل- میمی- و دهێتە گۆتن زێدەتر ئێك ملیار دینار بۆ یاریزانی بەرهەڤكرینە، دبیت ئەوژی د ڤێ حەفتیێ دا بهێتە ئێكلاكرن ، بۆ زانین هەتا نوكە گرێبەستا شێركۆ كەریمی ئیمزاكرییە، و گرێبەستێن هەر ئێك ژ گۆلپارێز عەلی كازم، محەمەد عەلی عەبود، ناسرۆ محمەدۆ و ئالیۆ ئادەم نووكرییە و هەشت یاریزان ژ یانەیێ چووینە ئەوژی، سیپان سەدیق، محەمەد ئەبۆ حەشیش، ئەحمەد یاسین، گۆستاڤۆ هێنریك، ئەحمەد یاسین، ژێلۆان حەمەد، . مۆسێس وولشیگ و عومران زەكی.
یانەیا دهۆك یا هێمنە
كارگێرییا یانەیا دهۆك ب هێمینی و هۆژداری كارێ خوە دكەت، پشتی گرێبەستا هەردو ستێرێن خوە هارۆن ئەحمەد و یانیك زاكێری و سیابەند عەگید و ئەحمەد عەلی ئێكلاكری و مانا خوە پاراستی، هەروەسان دەنگۆیێ پەیوەندییا گۆلپارێزێ یانەیا نەفت یا بەغدایی عەلی یاسین ب یانەیا دهۆكێ و یاریزانێ بەرگێرییا یانەیا دیالا سەدیق جەمال هاتیە كرن، هەر دیسان نێزیكی ئیمزاكرنا گرێبەستێ دگەل یاریزانێ هێلا بەرەڤانیێ یێ یانەیا كەربەلا یێ یەمەنی ئەحمەد وەجی ئەوێ لایێ چەپێ یاریێ دكەت، هەروەسان دوپاتكرنا نووكرنا گرێبەستا یێ لوبنانی كەریم دەرویش دگەل یانەیێ هێزەكا دی دایە یانەیێ، دهێتە پێشبینیكرن دڤێ حەفتیێ دا چەند گرێبەستێن دی ژی بهێنە دیاركرن، دیسان چوونا پیشەكارێ دهۆكێ لۆكاس مۆسێسی هاتە ڕاگەهاندن، ژلایەكێ دووڤە ڕێباز رەحیم ژی چوونا خوە ڕاگەهاند و دبیت گرێبەستا یانەیا رومادی ئیمزابكەت.
یانەیێن ئیراقی ژی گرێبەست هەنە
ژلایێ خوە یانەیا جەوییە یاریزانێ خوە محەمە ئەلباقر ژ یانەیا ئەلگەرمە ڤەگەراند، دیسان یانەیا زەورا ستێرێ هەلبژارتیێ ئوردنی عەبدوللا نەسیب ئینایە دناڤ رێزێن خوە دا، ب 350 هزار دولارا بۆ ئێك وەرز یانەیا زەورا گرێبەستا ستێرەكێ دی یێ هەلبژارتیێ ئوردنی نزار ئەلراشدان ئیمزاكر، هەروەسان گرێبەستا یاریزانێ هەلبژارتیێ ئوردنێ مەهدی ئەلحمێدانی ئینایە دناڤ ڕێزێن خوە دا، هەروەسان یانەیا جەوییە ڕاهێنەرێ عومانی رەشید جابر بۆ تیما خوە دەستنیشانكر، ژلایەكێ دووڤە هەر ئێك ژ یانەیێن نەورۆز، جەوییە، مینا، نەفت یا بەسرایی ئۆفەر پێشكێشی هێرشبەرێ دهۆكێ ئیبراهیم غازی كرییە، هەرچەندە یانەیا دهۆك بزاڤێ دكەت بمینیت.
