زێدەبوونا حەزژێکەرێن شانۆیێ ل دهۆکێ (ڤیانا وەلاتێ ڕەش) وەک نموونە
ئاشتی سالح
ل ڤان سالێن دووماهیێ، د ناڤا کۆڕ و کۆمەلێن ڕەوشەنبیری ل باژێرێ دهۆکێ دا، بەردەوام گازندە ژ سستبوونا بزاڤا شانۆیێ دهاتنە کرن. گەلەک کەسان وەسا ددیت کو ئێدی شانۆ ل دهۆکێ ئەو جۆش و خڕۆشا جاران نەمایە و بینەر ژ هۆلێن شانۆیێ دویر کەفتینە. لێ تیپا شۆڕەشڤان یا شانۆیێ ل دهۆکێ، ب کارەکێ خودان ئاست و ب ڕێکا شانۆگەریا «ڤیانا وەلاتێ ڕەش»، هەمی ئەو بۆچوونە گوهۆڕین و ڕاستیەکا دی دیارکر. وێ تیپێ ب کرداری نیشا دا کو ئاریشە د نەبوونا بینەری دا نینە، بەلکو ئاریشە د جۆر و بهێزیا کارێن شانۆیی دا بوو.
ئەڤە دو ڕۆژە شانۆگەریا «ڤیانا وەلاتێ ڕەش» ل دهۆکێ دهێتە نیشادان، و ئەوا دهێتە دیتن جێگێ سەرهاتیێ و دلخۆشیێ یە. هۆلێن شانۆیێ ژ مرۆڤان دهێنە پڕکرن و جهێ خۆ لێ نابت. تشتێ هەرە سەرنجڕاکێش ئەوە کو هێشتا دو ڕۆژان بەری دەستپێکرنا نیشادانێ، هەمی پلێتێن چوونە ژۆورێ هاتبوونە فرۆتن و چ پلێت نەمان. ئەڤە بخۆ مەزنترین بەلگە و گرۆڤەیە کو جەماوەرێ دهۆکێ هێشتا یێ تینووی هونەرێ ڕەسەن و شانۆیا ب مانا یە. هەکە کارێ هونەری یێ بهێز بیت و پەیامەکا کویر و کاریگەر هەبیت، بێگۆمان دێ خەلک ب دلەکێ گەرم بەرەو هۆلان چن.
ئەڤ پێشوازییا گەرمە یا خەلکێ دهۆکێ بۆ ڤێ شانۆگەریێ، دیار دکەت کو مرۆڤ ل ڤی باژێری حەز ژ داهێنانێ دکەن. دەمێ بینەر دبینیت کارەک ب ماندووبوونەکا مەزن و ب ئاستەکێ بلند هاتیە بەرهەڤکرن، ئەو ئامادەیە پشگیریێ لێ بکەت. ئەڤ چەندە دێ بیتە ئەگەرێ وێ چەندێ کو ڕۆژ بۆ ڕۆژێ هژمارا حەژێکەرێن شانۆیێ ل دهۆکێ زێدەتر لێ بهێت. سەرکەفتنا «ڤیانا وەلاتێ ڕەش» نە تنێ سەرکەفتنا تیپا شۆڕەشڤانە، بەلکو ژدایکبوونا هیڤیەکا نوو یە بۆ زێدەبوونا بزاڤا هونەری و ڤەگەڕاندنا شکۆیا شانۆیێ بۆ ناڤ جەماوەری.
ب ڤی ڕەنگی، پێدڤیە هەمی تیپ و هونەرمەندێن مە یێن دهۆکێ بزانن کو کلیلا ڤەگەڕاندنا بینەری بۆ هۆلێن شانۆیێ، تنێ د دەستێ وان دایە ب ڕێکا پێشکێشکرنا کارێن خودان کوالیتیا بلند. دەمێ شانۆ یا بهێز بیت، خەلک دێ ب خۆشی ڤە پلێتان کڕن و دێ ب کەیف و حەز بەرەو شانۆیێ چن. ب ڤی ئاوایێ جوان، دهۆک دێ مینتە مەلبەندێ هونەر و چاندێ و دێ شێت پێشەنگیا بزاڤا شانۆیی ل دەڤەرێ بکەت.
ئەڤ سەرکەفتنا تیپا شۆڕەشڤان ب دەستڤە ئینای نیشانەکا ڕوونە کو پاشەڕۆژا شانۆیێ ل باژێرێ مە یا گەشە و حەژێکەرێن وێ یێن بەرەڤ پتربوونا بەردەوام دچن.
