سالابوری 43 زارۆ توشی نه‌خۆشیا هه‌لكێشنا ماسولكێن ستووی ببوون
دهۆك، ره‌ڤین سالح:
نه‌خوشیا هه‌لكێشانا ماسولكێن ستوی ئێك ژ حاله‌تێن به‌ربه‌لاڤه ل جه‌م زارۆیێن شنووی دبن، ده‌مێ زارۆبوونا زارۆی یا بزه‌حمه‌ت بیت و زارۆ دهێته كێشان، هه‌روه‌سان ده‌مێ جێمكبن دزكێ دایكا خوه دا جهێ وی یێ نه‌خوش بیت و بو ماوه‌یه‌كی ستوویێ وی دكه‌ه‌ڤیته به‌ر وی، دیسان ده‌مێ روویشنتا وی دزكێ دایكێ دا یێ خه‌له‌ت بیت تووشی ڤێ نه‌خوشیێ دبن.
مریه‌م قادر، چاره‌سه‌ركارا سروشتی ل ناڤه‌ندا ڤه‌دیتنا زووده‌ما په‌ككه‌فتنێ ل دهوكێ دیاركر نه‌خۆشیه‌ك ل جه‌م زارۆیان هه‌یه، ده‌مێ ماسولكێن ستوویێ وان ژێك دهێنه كێشان، ئه‌ڤه دبیته ئه‌گه‌ر گرێیه‌كا ره‌ق ل گه‌وریا وی په‌یداببیت، وگۆت: ده‌مێ زارۆبوونا وی یا بزه‌حمه‌ت زارۆی دهێته كێشان برێكه‌كا نه‌دروست و دبیته ئه‌گه‌ر ستوویێ وی خار دبیت، هه‌روه‌سان ده‌مێ جێمك بن و دزكێ دایكێ دا جهێ زارۆی یێ نه‌خۆشه هنده‌ك جاران ستوویێ وی بو ماوه‌یه‌كێ درێژ دكه‌ڤیته به‌ر، دیسان دزكێ دایكێ دا ده‌مێ روونشتنا زارۆی یاخه‌له‌ت بیت، ماسولكێن ستوویێ وان ژێك دهێنه كێشان، هنده‌ك دایك و باب ڤێ نه‌خوشیێ ل جه‌م زارۆیێ خوه بساناهی ئاشكرا دكه‌ن و دزانن یێ توشبووی، ده‌مێ سه‌رێ وان دشوون و ده‌ستێ وان ڤێ دكه‌ڤیت پرسیاردكه‌ن كا گرێیه‌كه، هنده‌ك زارۆ ژی سه‌رێ وان ل ره‌خه‌كی تنێ یه نازڤرن، نوشدار ته‌ماشه‌دكه‌تێ و نه‌خوشیا وی ده‌سنیشان دكه‌ت.
چاره‌سه‌ركارا سروشتی خویاكر چاره‌سه‌ری بو هه‌لكێشنا ماسولكێن ستووی ده‌مێ نۆشدار نه‌خوشیا وی ده‌ستنیشان دكه‌ت، بو پشكا چارسه‌ریا سروشتی دهێته ره‌وانه‌كرن، وگۆت: ئه‌ڤ نه‌خوشیه ئه‌م ب چاره‌سه‌ریا وێ رادبین، پتریا ڤان زارۆیان برێكا چاره‌سه‌ریا سروشتی چێبووینه، ژ 100 حاله‌تان دبیت ئێك حاله‌ت پێدڤی ب نشته‌رگه‌ریه‌كێ ببیت، نۆشدار وێ زه‌ڤله‌كا گورج بووی درێژدكه‌ن، ئه‌م وه‌ك چاره‌سه‌ركارێن سرووشتی راهێنانێن درێژكرنا زه‌ڤله‌كێ لڤینێن ستووی و مه‌ساج ستویێ وان دپه‌رخینین و ئه‌م ڤان راهێنانا بو دایكو وبابان دبێژین دا لمال بو زارۆیێ خوه چێكه‌ن، هنده‌ك حه‌فتیان ئه‌م سێ حاله‌تان دبینن، ئه‌ڤ حاله‌ته ل جه‌م زارۆیان دزێده‌بوونێ دایه، پتریا زارۆیێن بومه دهێن دژیه‌كێ بچووك دانه، كێمه‌ك هه‌نه دژیه‌كێ مه‌زن دانه، ئه‌وێن ژیێ وان بچووك زووتر چاره‌سه‌ردبن ژیێن مه‌زن، چونكو هێشتا زه‌ڤله‌كێن وان دنه‌رمن و ره‌ق نه‌بووینه، سالابوری دورێن 43 حاله‌تان ل ناڤه‌ندا ڤه‌دیتنا زووده‌ما په‌ككه‌فتنێ ل دهوكێ هه‌بوون.
