سزایێ دەروونی و شكاندنا زاڕۆكی
هێلین سالم
د گەلەك مالان دا، دەمێ زاڕۆك خەلەتیەكێ دكەت، ئێكەم ڕێكا كو دایك یان باب بكار دئینن، ئاخفتنا ڕەق، هاواركرن و كێمكرنا وی یە وەك سزادان، گەلەك دایك و باب هزر دكەن كو هەكە زاڕۆكێ خۆ نە قوتا، ئەڤە ڕێكەكا سڤك و پەروەردەیی یە بەلێ ژ لایێ دەروونناسیێ ڤە، سزایێ دەروونی و ئاخفتنا ڕەق كارتێكرنا وێ ژ سزایێ جەستەیی مەزنتر و خراپترە د ناخێ زاڕۆكی دا.
دەنگێ بلند و پەیڤێن برینداركەر ل شوونا كو خەلەتیێ ل دەڤ زاڕۆكی ڕاست بكەن، ترسێ و بێ باوەریێ د دلێ وی دا د چینن، دەمێ زاڕۆك بەردەوام دهێتە سزادان ب شێوازەكێ ڕەق، ئاستێ باوەری ب خۆبوونا وی كێم دبیت و هەست ب بێ دەستهەلاتییا خۆ دكەت، ئەڤ برینێن دەروونی ب ساناهی دەرمان نابن بەلێ دگەل مەزنبوونا وی، دبنە ئەگەرێ ئاریشەیێن مەزن یێن وەك شەرمنیا زێدە و كەربا ڕەفتارێ د گەل هەڤالان، یان حەزا دووركەفتنێ ژ خەلكی، زاڕۆك دەمێ د ناڤ ئاخفتنێن نەڕێنی دا مەزن دبیت، هزر دكەت كو بهایێ وی ل دەف مالێ بتنێ ب خەلەتی نەكرنێ ڤە گرێدایی یە.
ڕێكا دروست یا پەروەردەكرنێ ب ئاخفتنا ئارام و ئاخفتنا ڤەكری دەست پێ دكەت، ل شوونا هاواركرنێ و شكاندنا كەسایەتیا وی، پێدڤییە دایك و باب ئەگەرێ خەلەتیێ ب زمانەكێ سادە بۆ روون بكەن و وێ جوداهیێ د ناڤبەر ڕەفتارا خەلەت و كەسایەتیا زاڕۆكی دا بكەن، زاڕۆك پێدڤی ب زانیت كو هەكە خەلەتیەك ژی كربیت، هەر خۆشڤیێ مالێ یە و جهێ ڕێزێ یە.
پەروەردەكرنا زاڕۆكی ب ئارامی و ڕێزگرتنێ، نیشانا بهێزیا كەسایەتیا دایك و بابانە، نەكو لاوازیا وان، ئاخفتنا نەرم دشێت ڕەفتارا زاڕۆكی بگۆهۆڕیت، بەلێ هاواركرن بتنێ كەسایەتیا وی دكوژیت، مالەك كو سنووران ب ئارامی دیار بكەت، نفشەكێ خودان باوەر و ساخلەم پێشكێشی جڤاكی دكەت.
