سماقا ئاكرێ تووشی نه‌خۆشیه‌كا چاندنێ بوویه
ئه‌ڤرۆ، ره‌مه‌زان زه‌كه‌ریا
سالانه ل دووماهیا هه‌یڤا ته‌مووزێ و ل ده‌ستپێكا هه‌یڤا ته‌باخێ جوتیارێن ده‌ڤه‌را ئاكرێ ده‌ست ب كۆمكرن و چنینا به‌رهه‌مێ سماقێ دكه‌ن، به‌لێ ئه‌ڤساله به‌ریا وه‌رزێ پێگه‌هشتنی تووشی نه‌خۆشیه‌كێ بوویه و به‌رهه‌مێ سماقێ گه‌له‌ك كێمبو یه.
عه‌لی سالح، جوتیاره‌كێ ده‌ڤه‌را ئاكرێ یه بۆ ئه‌ڤرۆ گۆت: سالانه ل هه‌یڤا ته‌باخێ ده‌ست ب چنین و كۆمكرنا سماقێ دكه‌ین و بازاره‌كێ باش هه‌یه و خواسته‌كا باش ل سه‌ر سماقێ هه‌یه، به‌لێ ئه‌ڤ ساله سماق تووشی نه‌خۆشیه‌كا چاندنێ بوویه، به‌رهه‌مێ وێ گه‌له‌ك كێم بوویه، ئه‌گه‌ر ژی ئه‌وه جوتیارا شیان نه‌بوون سماقێ ب ده‌رمانی ب ره‌شینن، هه‌تا ب پارێزن ل وێ نه‌خۆشیا تووشی سماقێ بووی، له‌ورا ئه‌ڤساله به‌رهه‌م گه‌له‌ك كێم بوویه و زه‌ره‌رێن مه‌زن ب جوتیارێن سماقێ كه‌فتینه، ئاشكرا نینه كا سالا بهێت ئه‌و بنه سماقێن ئه‌ڤساله هشك بووی دێ سالا بهێت شین بنه‌ڤه یان دێ كاریگه‌ری لسه‌ر مینیت.
محه‌مه‌د ئه‌مین، جوتیاره‌كێ دی یێ ده‌ڤه‌رێیه بۆ ئه‌ڤرۆ گۆت: هه‌موو جوتیارا رووبه‌ره‌كێ مه‌زن یێ سماقێ چاندیه، ره‌نگه دشیانێن هه‌موویان دا نه‌بیت ده‌رمانی بكرن و ئامێرێن پێدڤی یێن ره‌شاندنی ژی نینن كو جوتیار بشێن ل ده‌مێ پێدڤی سماقێ ره‌شینن، ئه‌ڤساله گه‌له‌ك پارچه سماق هه‌نه ب كێر ره‌شاندنێ ناهێن ب ته‌مامی هشك بوویه و ژناڤ چوویه هه‌تا نوكه بهایێ وێ دیار نینه كا چه‌نده، به‌لێ هه‌ر ساله‌كا سماق یا كێم بیت بهایێ وی یێ بلنده، ژ به‌ر كو سالانه خواسته‌كا باش ل سه‌ر سماقێ هه‌یه تایبه‌ت یا ده‌ڤه‌را ئاكرێ.
فازل مسته‌فا، رێڤه‌به‌رێ چاندنا ئاكرێ بۆ ئه‌ڤرۆ گۆت: سماق ئێكه ژ وان به‌رهه‌مێن جوتیارێن ده‌ڤه‌رێ گه‌له‌ك گرنگی پێدای، پار سال رووبه‌رێ 12 هزار دونه‌ما سماق هه‌بوو رووبه‌رێ 11 هزار دونه‌م گه‌هشت بۆ به‌ری و به‌رهه‌م هه‌بوو كو پتر بوو ژ 3 هزارو 470 ته‌نێن سماقێ.
گۆت ژی: ئه‌ڤساله به‌ریا وه‌رزێ چنینێ سماق تووشی نه‌خوشیه‌كا چاندنێ بوو خراب بوویه، ب ڤی ره‌نگی ژبه‌ر ڤێ نه‌خۆشیێ ئه‌ڤ ساله به‌رهه‌مێ سماقێ گه‌له‌ك كێم بوویه، پێدڤیه جوتیار زوو سماقێن خۆ ب ره‌شینن بۆ وێ چه‌ندێ ئه‌ڤ نه‌خۆشیه كاریگه‌ریێ ل سه‌ر دروست نه‌كه‌ت.
