سنێلەیی هەستیارترین قووناغا ژیێ مرۆڤی یە
دلۆڤان هالۆ
سنێلەیی هەستیارترین قوناغا ژیێ مرۆڤی یە، چونکی د ڤێ قوناغێ دا سنێلە توشی گەلەك ئاریشە و گرفتان دبیت، هەروەسان توشی نەخۆشی یێن دەروونی ژی دبیت هەتا کو ب سڵامەتی ژ ڤێ قوناغێ دەرباز دبیت، سنێلە گەلەك ڕەفتاران دکەت کو دبیتە جهێ دل ئێشانا دەوروبەران، ئەڤە ژی ژ ئەگەرێ وێ چەندێ یە کو بەردەوام گوهۆڕینێن هزری و بایلۆژی ب سەردا دهێن و نەشێت خۆ دگەل ڤان گوهۆڕینان ب گۆنجینیت و کۆنتڕۆلێ ل سەر هەست و سۆزێن خۆ بکەت، بەلکو هەر تشتەکێ بڤێت دێ ئەنجام دەت بیێ کو بزانیت خەلەتیە یان نە، هەروەسان دێ تێکەلیا هندەك هەڤالێن خراب کەت و هەر کریارەکا باش یان خراب ل دەڤ وان ڤە ببینیت، ئەو ژی دێ ب شێوەیەکێ سرۆشتی ئەنجام دەت، بێ هزرکرن و زانینا ئەنجامێن دوماهیێ.
لەوما ل سەر دایك و بابان پێدڤی یە چاڤدێریەکا باش و بەردەوام ل سەر سنێلەیێن خۆ بکەن، ئاگەهداری هەمی کار و کریارێن وی بن بێی کو ئەو پێ بزانیت، چونکی ئەگەر ئەو پێ بزانیت دێ هزر کەت دایك و بابێن وی شەڤ و ڕۆژان وەکو زێرەڤانان یێ ب دویڤ وی ڤە، پێدڤی یە هوین نەهێلن تێکەلیا هەڤالێن خراب بکەت و هەتا درەنگی شەڤ ل دەرڤەی ماڵ بیت، پێکوڵان بکەن خۆ دگەل دا بکەنە هەڤال و هەر پسیارەکا ژ هەوە بکەت ب دورستی بەرسڤێ ل سەر بدەن.
بلا چ جاران هەستێ وی نە هێتە بریندارکرن ب تایبەت ل دەڤ مێهڤانان و کەسێن بیانی، چونکی دێ هەست ب کێماسیێ کەت و نە دویرە ل دوماهیێ توشی نەخۆشی یێن دەروونی ببیت ب تایبەت نەخۆشیا خەموکیێ، هەر داخوازیەکا ژ هەوە بکەت ل گۆڕ شیانێن خۆ بۆ دابین بکەن، ڕێکێ بدەنێ وی ژی بۆچوونا خۆ یا تایبەت هەبیت ب تایبەتی ل سەر کڕینا کەل و پەلێن ناڤ مالێ و هەلبژارتن و چوونا جهەکێ گەشت و گۆزاری وهتد.
هندەك جاران سەرەدانا خواندنگەها وی بکەن، داکو هوین بزانن ئاستێ وی یێ زانستی چاوایە، فێری خواندنا دەرەکی بکەن وەکو خواندنا (ڕۆژنامە، گۆڤار، پەرتووكان) داکو ئاستێ وی یێ زانستی بەرزتر لێ بهێت و ببیتە کەسەکێ ڕەوشەنبیر و تێگەهشتی، ئەگەر ئەڤ چەندە هەمی دگەل سنێلەیی هاتە کرن، بێ گۆمان دێ ئەڤ سنێلە ب شێوەیەکێ ساخلەم ژ ڤێ قوناغێ دەرباز بیت و ل پاشەڕۆژێ دێ بیتە خودان کەسایەتیەکا ب هێز و کاریگەر د ناڤ جڤاکی دا.
