سه‌ركرده‌كێ سوننی: هه‌ولێر جهێ ئێكلاكرنا پێكئینانا حوكمه‌تا نوو یا ئیراقێ یه
ئه‌ڤرۆ:
سه‌ركرده‌كێ سوننه‌یێن ئیراقێ راگه‌هاند، پێدڤیه له‌ز د پرسا پێكئینانا حوكمه‌تا نوو یا ئیراقێ دا بهێته كرن و هه‌موو ئالی رێزێ ل بۆچوونا خه‌لكی بگرن و ب پشكا خوه رازی ببن و ئه‌نجامان قه‌بوول بكه‌ن و كوردان ژی دێ رۆله‌كێ سه‌ره‌كی د پێكئینانا حوكمه‌تا نوو یا ئیراقێ دا هه‌بیت و به‌رده‌وام هه‌ولێر جهێ ئێكلاكرنا پرسا پێكئینانا حوكمه‌تێن نوو یێن ئیراقێ بوو.
د. عه‌لا مه‌كی، ئێك ژ سه‌ركردێن سوننه‌یێن ئیراقێ، گۆت” كێماسیێن پرۆسا سیاسی ل ئیراقێ گه‌له‌گن وژ سالا 2003 ێ وهه‌تا نوكه ئه‌م ب چاڤێن خوه دبینین، له‌وما پێدڤیه زه‌لالی هه‌بیت، د هه‌لبژارتنێن ڤێجارێ دا جڤاكێ نێڤده‌وله‌تی رێ ب خه‌لكی دا ب خوه بریارێ بده‌ن و وان ب خوه ژی چاڤدێریا هه‌لبژارتنان كر، له‌وما ڤێجارێ خه‌لكی بریارا خوه دا وئالیێ خوه دیاركر و پێدڤیه هه‌موو ئالی ئه‌نجامان قه‌بوول بكه‌ن و ب پشكا خوه رازی ببن، بۆ وێ چه‌ندێ دیموكراسیه‌ت ل ئیراقێ هه‌بیت”.
د. عه‌لا مه‌كی گۆت ژی” پێدڤیه له‌ز بهێته كرن د پێكئینانا حوكمه‌تا ئیراقێ دا و نابیت بهێته پاشخستن و كوردان ژی دێ رۆله‌كێ سه‌ره‌كی د وێ حوكمه‌تێ دا هه‌بیت، چونكه نوونه‌رایه‌تیا گه‌لێ كورد دكه‌ن و پێدڤیه ڤێجارێ كه‌سانێن ته‌كنوكرات بۆ حوكمه‌تا نوو بهێنه دانان”.
ئاماژه‌كر” هه‌لویستێ هه‌رێما كوردستانێ یێ ئه‌رێنی یه و ئه‌م شانازیێ ب كوردان دكه‌ین و دناڤ وان دا بووین و كوردان بۆچوونه‌كا گه‌له‌ك باش یا هه‌ی ل دۆر پرۆسا سیاسی و پێكئینانا حوكمه‌تا نوو و گه‌له‌ك د راشكاوه‌نه و هه‌ر تشته‌كێ هه‌بیت ب ئاشكرا به‌حس دكه‌ن، نه‌كو تشته‌كی بێژن و پاشی لێ په‌شێمان ببن”.
وی سه‌ركردێ سوننی رۆهنكر” هه‌ولێر ژ وی سه‌رده‌مێ كو مالكی بوویه سه‌رۆك وه‌زیرێن ئیراقێ و هه‌تا نوكه ژی جهێ ئێكلاكرنا پرسا پێكئینانا حوكمه‌تێن ئیراقێ یه و به‌رده‌وام رۆله‌كێ مه‌زن و ئه‌رێنی یێ و هه‌ولێر یا بوویه ناڤه‌نده‌ك بۆ ئێكلاكرنا پێكئینانا حوكمه‌تێ”.
