سه‌رۆكێ باژێرڤانیا دێره‌لۆك: پێدڤیه جۆتسایدێ دێرالوكێ بهێته ته‌مامكرن
ئامێدیێ، مه‌حمود نهێلی
سه‌رۆكێ باژێرڤانیا دێره‌لۆك بو رۆژناما ئه‌ڤرۆ دیار كر، ل سالا چویی ب كوژمێ نێزیكی دوو ملیار دیناران سێ پرۆژێن گرنگ ل سنورێ باژێرڤانیا وان هاتینه ب جهئینان و ژ بلی وان پرۆژێن سه‌ر پێشینه‌یا وان دهێنه چێكرن و ئاشكرا كر، 75% پێشینا وان هاتیه كێم كرن و ل چاڤ باژێرڤانیێن دی ئه‌و پێشینه‌یا هه‌یڤانه بۆ وان دهێت گه‌له‌ك یا كێمه.
عه‌بدولمه‌ناف ره‌شید سه‌رۆكێ باژێرڤانیا دێره‌لۆك بو رۆژناما ئه‌ڤرۆ گۆت: باژێرڤانیا دێره‌لۆك ل سالا 1997 پشتی سه‌رهه‌لدانێ وه‌ك باژێرڤانی كار كریه و هه‌تا نوكه بێ ڤه‌قه‌تیان یا به‌رده‌وامه و د هه‌یاما ڤان سالان دا خزمه‌تگوزاریێن زۆر پێشكێش كرینه وه‌ك كاروبارێن ته‌كنیكی و كوژاندنا ئه‌ردا و دابه‌شكرنا پارچێن ئه‌ردی، چ ته‌رخانكرن بیت چ قه‌ره‌بوو، ئه‌ڤه ژبلی خزمه‌گوزاریێن پاقژكرنا باژێری و هه‌روه‌سا ئاڤاكرنا خانیا و دانا موله‌تا ئاڤاكرنێ.
سه‌رۆكێ باژێرڤانیا دێره‌لۆك دیار كر، نوكه دێره‌لۆك ژ تاخێن گولان و ئازادی و داستان ئێك و داستان دو و شه‌هیدان و گوهه‌رزا نوو و چه‌لكێ پێك دهێت و ئاشكرا كر، ده‌مێ دێره‌لۆك هاتیه ئاڤا كرن و خه‌لك ب زوره ملێ هاتیه راگوهاستن بو ڤێ كومه‌لگه‌هێ بتنێ دو تاخ بووینه و ئه‌ڤ تاخێن دی هه‌موو ژنو هاتینه چێكرن.
و ئاشكرا كر، ل تاخێ بانیا چه‌لكێ سالێن چوویی پارچێن ئه‌ردی ب سه‌ر وه‌لاتیان دا هاتینه دابه‌شكرن و خزمه‌تگوزاری ژ نوو یێن دگه‌هنێ و نوكه یێ به‌رهه‌ڤ دبیت بۆ ئاڤاكرنێ و گۆت: ل سالا 2021 مه سێ پرۆژێن گرنگ هه‌بووینه ل ده‌ڤه‌رێ كو ژلایێ حكومه‌تا هه‌رێما كوردستانێ كوژمێ ئێك ملیار و هه‌شت سه‌د ملیون دینار بو هاتینه ته‌رخانكرن و گۆت: ئه‌ڤ ئه‌ڤ پرۆژه‌یه پێك دهاتن ژ گه‌هاندنا جادا سه‌ره‌كی بو تاخێ بانیا چه‌لكێ و هه‌روه‌سا چێكرنا جادێن نافخوه یێ ل تاخێ داستان و گوهه‌رزا نوو و شه‌هیدان ئه‌ڤه زێده‌باری وان پرۆژێن بچووك یێن ل سه‌ر پێشینه‌یا هه‌یڤانه یێن باژێرڤانیێ دهێنه چێكرن .
دیار كر، هند پرۆژێن دیتر كو پێدڤیه بهێنه چێكرن چه‌ند تاخه‌كێن كێم ماینه و خه‌لك لێ ئاكنجی نه و پێدڤی ب خزمه‌تگوزاریانه و هه‌روه‌سا چێكرنا پاركه‌كی بهێنڤه‌دانێ پێدڤیه بهێته چێكرن و گه‌هاندنا جاده‌یان بۆ وان تاخێن نوو و كولانێن نوو وه‌لاتی لێ ئاكنجی دبن.
ده‌رباره‌ی كێمیا پێشینه‌یا هه‌یڤانه یا بۆ وان دهێت ناڤهاتی دیار كر، زێده‌باری وێ یه‌كێ دورێن 20 هزار كه‌سان ل سنورێ باژێرڤانیا دێره‌لۆك ئاكنجی نه، باژێرڤانیا دێره‌لۆك پله سێ یه و گۆت: ده‌ست نیشانكرنا پێشینه‌یا هه‌یڤانه ژلایێ وه‌زاره‌تا دارایی ڤه دهێته دانان پشتی قه‌یرانا دارایی دو جار پێشینه‌یا مه كێم بوویه و ل جارا ئێكی 50% كێمبوویه و پشتی هاتنا نه‌خوه‌شیا كرونایێ 25% ئه‌و پێشینه‌یا مایی ژی هاتیه برین.
و ته‌كه‌ستكر ، ئه‌و پێشینه‌یه نه د ئاستێ رێڤه‌به‌رنا كاروبار و خزمه‌تكرنا خه‌لكی دا یه و بوویه ئه‌گه‌رێ هندێ چه‌ندین پرۆژێن مه یێن بچووك نه‌هێنه چێكرن.
و ئاشكرا كر، پێدڤیه نوكه باژێرڤانیا مه پلا وێ هاتبا بلندكرن ل دووڤ رێژا ئاكنجی بوونێ و مه پێنگاڤ هاڤێتینه، لێ هێشتا چو به‌رسڤ بۆ مه نه‌هاتینه.
ده‌ربارێ پلانا ئه‌ڤ ساله ناڤهاتی دیار كر، پلانا وان یا سه‌ره‌كی هه‌كه پارێ پێدڤی هه‌بیت ته‌مامكرنا جوتسایدێ دێره‌لۆك لایێ رۆژهه‌لات و رۆژئاڤا كو نێزیكی چار كیلومه‌ترایه ب چێكرنا ڤی پرۆژه‌ی ژی دێ پتر خزمه‌تا خه‌لكێ ده‌ڤه‌رێ هێته كرن ژ هه‌موو لایه‌كێ ڤه و گۆت: نوكه ئه‌ڤ پرۆژه د قوناغا دیزاینێ دایه و پاشان دێ هێته ره‌وانه‌كرن بۆ لایه‌نێن په‌یوه‌ندیدار بو وێ یه‌كێ پارێ پێدڤی بو بهێته ته‌رخانكرن و ده‌ست ب چێكرنا وێ بهێته كرن.
