سه‌رۆكێ سه‌ندیكا نۆژداران: دو نوژداران نشته‌رگه‌ری بۆ نه‌خۆشان كرینه و پێدڤی پێ نه‌بوون
دهۆك، له‌زگین جوقی:
سه‌رۆكێ سه‌ندیكا نۆژدارێن كوردستانێ لقێ دهۆكێ دیار كر:” نوژدار هه‌بووینه نه چارچووڤێ تایبه‌تمه‌ندیا خۆ دا كار ئه‌نجامدایه و هاتینه سزادان، هه‌روه‌سا ژی ده‌رمانێن گیایی بۆ نه‌خۆشیێن مه‌زن هاتینه بكارئینان و بهایێن مه‌زن یێن پاره ژ خه‌لكێ هاتینه وه‌رگرتن ئه‌ڤ كه‌یسا بۆ دادگه‌هێ هاتیه ره‌وانه‌كرن”.
د. ئازار عه‌بدال، سه‌رۆكێ سه‌ندیكا نۆژدارێن كوردستانێ لقێ دهۆكێ بۆ ئه‌ڤرۆ دیار كر، پێرابوون دگه‌ل نوژداران هاتینه وه‌رگرتن و چه‌ند نوژدار ل دهۆكێ یێن هاتیه سزادان، به‌رده‌وام دووڤچوون ل سه‌ر نۆژدار و ده‌زگه‌هێن تایبه‌ت یێن كه‌رتی ساخله‌میێ وه‌كو كۆمه‌لگه‌هێن نوژداری و سه‌نته‌رێن تایبه‌ت یێن نوژداران دهێته كرن، ده‌مێ ئه‌م دبینن نوژداره‌ك سه‌رپێچیێ دكه‌ت یان ژی خه‌مساری د كارێ خۆ دا ئه‌نجام دده‌ت، ل دووڤ یاسا سه‌ندیكا نوژداران پێرابوون دگه‌ل دا دهێنه وه‌رگرتن.
زێده‌تر گۆت: ئه‌ڤ پرۆسه‌یا دووڤچوونێ ل سه‌ر نوژدار و كلینیكێن نوژداران یا به‌رده‌وامه، هنده‌ك نوژدار ب رێیا سه‌ندیكایێ دهێنه سزادان و هنده‌ك ژی بۆ دادگه‌هێ دهێنه ره‌وانه‌كرن ب رێیا داواكارێ گشتی كه‌یس هاتینه برێڤه‌برن، ب تنێ د سالا بوری دا د ماوێ شه‌ش هه‌یڤاندا 10 نوژدار ب سه‌رپێچیێن جۆدا جۆدا هاتینه سزادان.
د. ئازار عه‌بدال ئه‌و ژی دیار كر، نوژدار هه‌بووینه راچێتا نوژداری وه‌كو كۆد بكارئینایه، ئه‌ڤه پشت راستبوویه پشتی مه دووڤچوون ل سه‌ر كری ئه‌و نوژدار هاته سزادان، چونكو راچیتا خۆ یا نوژداری وه‌كو كۆد بكاردئینا ئه‌ڤه نابیت بهێـته ئه‌نجامدان، هه‌روه‌سا ژی نوژدار هه‌بوویه گه‌له‌ك نه‌خۆش پێكڤه برینه دژوورڤه بۆ چاره‌سه‌ریێ، ئه‌و ژی هاتینه سزادان، هه‌روه‌سا ژی نوژدار هه‌بووینه نشته‌رگه‌ری بۆ نه‌خۆشی ئه‌نجامدایه و ئه‌و نه‌خۆش پێدڤی وێ نشته‌رگه‌ریێ نه‌بوویه، دوو كه‌یس بۆ هه‌ولێر هاتینه ره‌وانه‌كرن دا كو پێرابوون دگه‌ل وان نۆژدارێن سه‌رپێچیا دكه‌ن بهێنه وه‌رگرتن.
سه‌رۆكێ سه‌ندیكا نۆژدارێن كوردستانێ لقێ دهۆكێ خۆیا كر، نوژداره‌ك هه‌بوویه د چارچووڤێ كاری خۆ دا ده‌ركه‌ڤتیه، ئه‌و پسپوریا وی هه‌ی نه ل دووڤ وێ پسپوریێ كار ئه‌نجامدایه، هه‌تا بۆ هنده‌ك نه‌خۆشان كار كریه و ریكلام ژی كریه، ئه‌و تشت تایبه‌تمه‌ندیا وی نوژداری دا نینه، له‌ورا ژی كلینیكا وێ هاتیه دائێخستن، چونكو نابیت نوژدار تایبه‌تمه‌ندیه‌ك هه‌بیت نه ل دووڤ وێ تایبه‌تمه‌ندیێ كار بكه‌ت، له‌ورا ژی ئه‌و نوژدار ب كوژمه‌كێ پاره هاتیه سزادان و كلینیكا وێ ژی هاتیه دائێخستن”.
سه‌رۆكێ سه‌ندیكا نۆژدارێن كوردستانێ لقێ دهۆكێ گۆت ژی: ده‌رمانێن گیایی یێن سرۆشتی ژی هاتینه فرۆتن، ئه‌و ژی هاتیه سزادان ل ده‌ڤه‌ره‌كا پارێزگه‌ها دهۆكێ، پرۆپاكنده هاتیه كرن دشێت نه‌خۆشیێن گه‌له‌ك مه‌زن چاره‌سه‌ربكه‌ت و پێدڤی ناكه‌ت سه‌ره‌دانا نوژداری بكه‌ت، ب كوژمێن مه‌زن یێن پاره ژ خه‌لكی وه‌رگرتینه، پشتی ئه‌ڤ كه‌یسا گه‌هشتیه سه‌ندیكا نۆژدارێن كوردستانێ لقێ دهۆكێ دووڤچوون ل سه‌ر هاتیه كرن دیاربوویه چو راستی بۆ ده‌رمانێن وێ نینه، به‌لكو ره‌نگه هنده‌ك ده‌رمانێن كیمیایی بن تێكه‌ل دكه‌ت، خه‌لك وه‌ردگریت، ژ به‌ر ڤێ چه‌ندێ ژی كه‌یسا وێ ئێكسه‌ر ب رێیا داواكارێ گشتی بۆ دادگه‌هی هاتیه ره‌وانه‌كرن”.
