سه‌رۆكێ په‌یمانگه‌ها ڤه‌كۆلینێن ئه‌مریكی – كوردی: پرۆسا پێكئینانا حوكمه‌تا نوو یا ئیراقێ دێ گیرۆ بیت
ئه‌ڤرۆ ، زنار تۆڤی:
سه‌رۆكێ په‌یمانگه‌ها ڤه‌كۆلینێن ئه‌مریكی كوردی، كارۆخ خۆشناو، بۆ رۆژناما ئه‌ڤرۆ راگه‌هاند، هه‌لبژارتنێن ڤێجارێ یێن جڤاتا نوونه‌رێن ئیراقێ، باشترین و پاقژترین هه‌لبژارتن بووینه د دیرۆكا سه‌د سالیا ئیراقێ دا، چونكی باشترین جۆرێن ته‌كنولۆژیا سه‌رده‌مانه تێدا هاتبوونه ب كار ئینان، هه‌روه‌سا ل سه‌ر ئاستێ هه‌موو جیهانێ، ئه‌و ئالیێن شكه‌ستنێ د هه‌لبژارتنان دا دئینن، دێ گازندان كه‌ن و دێ سكالایان د هه‌لبژارتنان دا تۆمار كه‌ن، ل ئیراقێ ژی ئه‌ڤ چه‌نده روودایه و پشتی دیاركرنا ئه‌نجامێن ده‌ستپێكی یێن هه‌لبژارتنان ژ ئالیێ كۆمسیۆنا هه‌لبژارتنان، ئه‌و ئالیێن كورسیێن خوه كێم كرین، هه‌ر زوو تانه ل ئه‌نجامێن هه‌لبژارتنان دان، داخواز كر كو ده‌نگێن هه‌لبژارتنان ل هنده‌ك بنگه‌هان ل به‌سره، به‌غدا و نه‌ینه‌وا و هه‌ولێرێ ب ده‌ست بهێنه هژمارتن، پشتی هژمارتنا ده‌نگان ب ده‌ست، هه‌ر ئه‌نجام وه‌كو خوه مان و چو گوهۆرین ب سه‌ردا نه‌هاتن.
ناڤهاتی گۆت ژی” ئه‌و ئالیێن گازندان دكه‌ن و داخواز دكه‌ن خۆنیشاندان بهێنه كرن، ئه‌ون یێن ده‌نگ نه‌ئیناین، ئه‌و كارێ ئه‌و دكه‌ن ژی هه‌لچوونه‌كا بێ مفا و بێ ئه‌نجامه، ئه‌و خوه‌نیشاندانێن ئه‌و ئالی دكه‌ن ژی چو مفا تێدا نینه، ب تنێ مه‌ره‌ما وان ئه‌وه ئالۆزیان دروست بكه‌ن، لێ كومسیۆن نه‌شێت ده‌ستكاریێ د ئه‌نجامان دا بكه‌ت، لدووڤ مادێ ” 54 ” یێ دستۆرێ ئیراقێ، دێ ئه‌نجامێن هه‌لبژارتنان ژ ئالیێ دادگه‌ها فیدرالی یا عیراقی هێنه ” په‌سه‌ند كرن “، پاشی سه‌رۆك كۆمار ب مه‌رسۆمه‌كێ كۆماری دێ داخوازێ ژ په‌رله‌مانتارێن خولا نوو كه‌ت د ده‌مێ 15 رۆژان دا ل جڤاتا نوونه‌ران كۆم ببن، پاشی لدووڤ مادێ ” 55 ” یێ دستۆرێ ئیراقێ دێ ب عه‌مرترین په‌رله‌مانتار وێ روونشتنا ئێكێ یا جڤاتا نوونه‌ران برێڤه به‌ت، پاشی ب رێككه‌فتن دێ سه‌رۆكێ جڤاتا نوونه‌ران و هه‌ردو جێگرێن وی هێنه دیار كرن، پاشی د ده‌مێ 30 رۆژان دا دێ سه‌رۆك كۆمارێ ئیراقێ هێته هه‌لبژارتن”.
كارۆخ هێشتا دبێژیت” گرۆپێن حه‌شدا شه‌عبی خودان هێزن و دشێن ئالۆزیان ل ئیراقێ دروست بكه‌ن و وان ئالۆزی دروست كرینه ژی، چونكی حه‌شدا شه‌عبی 170 هزار چه‌كدار و 67 گرۆپ هه‌نه، ئه‌و گرۆپه هه‌موو ل ژێر ئه‌جندایێن ئیرانێ كار دكه‌ن، بێی ئیرانێ چو بزاڤان ناكه‌ن، لێ نوكه د به‌رژه‌وه‌ندیا ئیرانێ دا نینه ره‌وشا ئیراقێ ئالۆز بكه‌ت و ئاریشان په‌یدا بكه‌ت، له‌وما ئیران حه‌ز دكه‌ت ئێمناهی ل ئیراقێ هه‌بیت، چونكی نوكه ئیران ل ژێر دوورپێچا ئابووری دایه و ئه‌و داهاتێ بۆ ئیرانێ دچیت ژی ب رێیا ئیراقێ یه، د نوكه دا ب تنێ ب رێیا ئیراقێ داهاته‌ك بۆ ئیرانێ دچیت، هه‌ر چه‌نده ئه‌و گرۆپه دێ گه‌فان كه‌ن و دێ خوه‌نیشادانان ژی كه‌ن، لێ چو پێڤه ناهێت”.
خویاكر” پرۆسا پێكئینانا حوكمه‌تا نوو یا ئیراقێ دێ گیرۆ بیت، لێ ل دووماهیێ دێ ناڤمالا شیعی هه‌ر پێكهێت و دێ حوكمه‌تا نوو پێك ئینن، لێ هه‌كه شیعه پێكنه‌هێن ژی، مسته‌فا كازمی دێ ئه‌و شانس هه‌بیت، جاره‌كا دی ببیته سه‌رۆك وه‌زیرێن ئیراقێ، چونكی كه‌سه‌كێ نێزیكی موقته‌دا سه‌دری یه، هه‌روه‌سا هه‌تا نوكه شیعه پێكنه‌هاتینه و گه‌له‌ك ئالۆزی دناڤا وان دا هه‌نه، هه‌ر چه‌نده سه‌دری سه‌ره‌دانا گه‌له‌ك ئالیێن شیعی كرینه، دیسان دێ هه‌ر شیعه پێك هێن، چونكی وان لێڤه‌گه‌رێ خوه عه‌لی سیستانی هه‌یه، هه‌ر ده‌مێ وی بریار دا، دێ حوكمه‌تا نوو یا ئیراقێ پێكهێت”.
ئاماژه‌كر ژی” بۆ ڤێ قووناغێ پێدڤییه كورد د ئێكگرتی بن، دیسان دڤێت كورد ژی ژ پێخه‌مه‌ت به‌رژه‌وه‌ندی و پاراستنا هه‌رێما كوردستانێ و وه‌رگرتنا گره‌نتیێ بۆ بجهئینانا هه‌موو مادێن دستۆری كار بكه‌ن، ببنه یاریكه‌رێن سه‌ره‌كی دڤێ هه‌ڤكێشێ دا، چونكی هه‌تا نوكه حوكمه‌تێن ئێك لدووڤ ئێك یێن ئیراقێ، ” 54 ” مادێن دستۆری بجه نه‌ئیناینه، وه‌كو مادێ ” 140 ” و قانوونا په‌ترۆلێ و غازێ و مووچێ پێشمه‌رگه‌یی و بابه‌تێ بۆدجه‌ی و گه‌له‌كێن دیتر، له‌وما دڤێت كورد راشكاوانه ڤان بابه‌تان ل گه‌ل ئالیێن شیعی چاره‌سه‌ر بكه‌نو بۆ ئالیێن شیعی دیار بكه‌ن، ئه‌م دێ هه‌ڤپه‌یمانییێ ل گه‌ل هه‌وه دروست كه‌ین، ب مه‌رجه‌كی دڤێت هوون لدووڤ دستۆری مافێ مه بده‌ن و دیسان ئه‌و بریارێن شیعی دده‌ن، دڤێت هه‌موو ب ره‌نگه‌كێ ئاشكرا بهێنه ئیمزا كرن، هه‌ر چه‌نده ئه‌ڤه كاره‌كێ گرانه و زوو ب زوو شیعه بجه نائینن، لێ دڤێت كوردان ئیراده هه‌بیت و مه‌رجێن خوه ل سه‌ر وان ب سه‌پینن، چونكی ئه‌ڤه 18 ساله شیعه و سوننی یان مامه‌له‌كا خراب ل هه‌مبه‌ری هه‌رێما كوردستانێ ئه‌نجامدایه، وان مادێن دستۆرێ ئیراقێ بجه نه‌ئیناینه، مافێن كوردان ژی نه‌داینێ، ئه‌ڤه سیاسه‌تا هه‌موو ئالیێن سوننی و شیعی بوویه، لێ ڤێ جارێ دڤێت كورد ئێك هه‌لویست بن و وه‌سا كار بكه‌ن، داكو بشێن هه‌موو مافێن خوه یێن دستۆری وه‌ربگرن”.
