سه‌رۆكێ فره‌نسا د نامه‌كێ دا بۆ نێچیرڤان بارزانی:د پرسێن دژی تیرۆرێ و پێشڤه‌برنا په‌یوه‌ندیێن ئابووری ل گه‌ل هه‌رێمێ دێ د به‌رده‌وام بین
ئه‌ڤرۆ:
سه‌رۆكێ هه‌رێما كوردستانێ، نێچیرڤان بارزانی، پێشوازی ل ئۆلیڤیێ دیكۆنتی، كۆنسۆلێ گشتیێ فره‌نسا ل هه‌رێما كوردستانێ كر و د كۆمبوونه‌كێ دا كونسولێ فره‌نسی نامه‌كا ئیمانوێل ماكرۆن سه‌رۆك كۆمارێ فره‌نسا گه‌هانده سه‌رۆكێ هه‌رێمێ.
د ناما سه‌رۆكێ فره‌نسی بۆ سه‌رۆكێ هه‌رێمێ دا هاتیه” خوه‌شحالم ب ناڤێ فره‌نسا و ب ناڤێ خوه سوپاسیان پێشكێشی هه‌وه دكه‌م بۆ وێ پێشوازیا گه‌رم ئه‌وا ل هه‌ولێرێ هه‌وه ل من كری، وه‌كو چاوان د دیدار و كۆمبوونێن مه یێن پێشتر ل به‌غدا و پاریس، سۆزا سه‌ره‌دانا هه‌ولێرێ من ب هه‌وه دابوو”.
د پشكه‌كا دی یا وێ نامێ دا هاتیه” فره‌نسا و هه‌رێما كوردستانێ په‌یوه‌ندیێن دێرین یێن هه‌ین و پێدڤیه وان په‌یوه‌ندیان د ئاسته‌كێ بلند دا رابگرین، ئه‌ڤ گیانێ دۆستایه‌تیێ و باوه‌ریێ و وه‌فاداریێ د كۆمبوونێن مه دا ره‌نگڤه‌دان ل سه‌ر ده‌وله‌مه‌ندیا ئالوگۆركرنا بیر و بۆچوونێن مه هه‌بوو، هه‌روه‌سا ب دیدارا ل گه‌ل سه‌رۆك بارزانی و مالباتا شه‌هید هوجام سۆرچی ل هه‌ولێرێ، خوازیارم ڤێ وه‌فاداریێ و دۆستایه‌تیێ بلند رابگرم”.
ل دووماهیێ سه‌رۆكێ فره‌نسی د ناما خوه دا دبێژیت” پشت راست بن كو فره‌نسا ل پرسێن دژی تیرۆرێ، هه‌روه‌سا پێشڤه‌برنا په‌یوه‌ندیێن ئابووری و جڤاكی، د پێگیریا خوه ل گه‌ل هه‌وه، دێ به‌رده‌وام بیت”.
