سووریێ بەر ب شەڕەکێ نوو ڤە دچیت
رۆژنامەیەکا بریتانی دیار دکەت نها ل سووریێ رەوش گەلەک ئالۆز بوویە، ژ ئالیەکێ ڤە رۆسیا کار بۆ دەرخستنا هێزێن ئەمریکا ل سووریێ دکەت و ل ئالیێ دی ئەمریکا هێزێن زێدەتر رەوانەی سووریێ دکەت و دڤێت پێگەهێ خوە بهێز بکەت، ناکۆکیێن ئەمریکا ل گەل رۆسیا و ئیرانێ نیشانا روودانا شەڕەکێ نوو یە ل سووریێ.
رۆژناما تیلگراف یا بریتانی د راپۆرتەکێ دا دیار کریە، دەمەکە رۆسیا و ئیران پێکڤە کار دکەن دا ئالۆزیان ل باکورێ سووریێ و دێرازۆرێ دروست بکەن، ئارمانجا سەرەکی یا رۆسیا و ئیرانێ ئەوە دا ئەمریکا نەچار بیت هەموو هێزێن خوە ژ ئاخا سووریێ ڤەکێشیت، لێ ئەمریکا ژی کار بۆ بهێزکرنا پێگەهێ خوە ل سووریێ دکەت، د چەند حەفتیێن بۆری دا ئەمریکا هێزێن زێدەتر رەوانەی هندەک دەڤەرێن ستراتیژی ل باکورێ سووریێ کریە و ئەو یەک ژی نیشا ددەت ئەمریکا دڤێت پێگەهێ خوە ل سووریێ بهێزتر بکەت و ئەمریکا یا بەرهەڤ نینە هێزێن خوە ژ ئاخا سووریێ ڤەکێشیت.
هەمان رۆژنامێ ئەو یەک ژی دیار کریە، مەها بۆری گرۆپێن چەکدارێن سەر ب ئیرانێ ل سووریێ بەرهەڤیێن خوە دکرن دا ئێرشی هێزێن ئەمریکا ل سووریێ بکەن، لێ ئەمریکا هەر زوو دەست ب پێرابوونێن پێدڤی کر و ب توندی ژی هۆشداری دا ئیرانێ هەکە کارەکێ وەسا بکەن دێ یا پێدڤی هێتە کرن، نها رۆسیا و ئیران ب هەموو رەنگەکێ کار دکەن دا ئەمریکا هێزێن خوە ژ سووریێ ڤەکێشیت و ئەمریکا ژی ل هەمبەر بزاڤێن ئیرانێ و رۆسیا پێگەهێ خوە بهێز بکەت، ئەو یەک ژی نیشا ددەت رەوشا نها ل سووریێ وەکو خوە بەردەوام نابیت و مەترسیا روودانا شەڕەکێ نوو ل سووریا یا هەی.
رۆژناما ئەمریکا بریتانی ئەو یەک ژی دیار کریە، هەکە ئەمریکا هێزێن خوە ژ سووریێ ڤەکێشیت مەترسیا هندێ یا هەی شام ب هاریکاریا تورکیا و ئیرانێ ئێرشی هێزێن کوردی بکەت، ئەو یەک ژی دێ بیتە شکەستنەکا دی یا مەزن بۆ ئەمریکا، هەروەسا دەرکەفتنا ئەمریکا ژ سووریێ دێ بیتە ئەگەرێ لاوازبوونا پێگەهێ وی وەلاتی ل رۆژهەلاتا ناڤین، ژ بەر هندێ ژی نها ئەمریکا پتر ژ جاران گرنگیێ ددەتە سووریێ و هەتا نها ژی ئەمریکا یا بەرهەڤ نینە هێزێن خوە ژ سووریێ ڤەکێشیت، ل ئالیێ دی رۆسیا و ئیران ژی دخوازن ب هەر رەنگێ هەی ئەمریکا نەچار بکەن هەموو هێزێن خوە ژ ئاخا سووریێ ڤەکێشیت، هەڤسەنگیێن نها وەسا دکەن سووریێ بەر ب شەڕەکێ نوو ڤە بچیت، چونکی نە ئەمریکا بەرهەڤە هێزێن خوە ڤەکێشیت و نە ژی کار بۆ چارەسەریەکا سیاسی ل سووریێ دهێتە کرن.
