سۆشیال میدیایێ كارتێكرنه‌كا نه‌باش ل سه‌ر مافێن كه‌مینه‌یان هه‌یه
خانكێ، دلڤین ره‌شید:
رۆژنامه‌ڤان (نه‌سر حاجی) د دیداره‌كێ دا بۆ رۆژناما ئه‌ڤرۆ گۆت: ئه‌ز خه‌لكێ باشیكێ مه، ده‌رچویێ پشكا كارگێری مه ل په‌یمانگه‌ها ته‌كنیكی مه ل شێخان ل سالا 2003 پشتی وی ده‌می ب ساله‌كێ من ده‌ست ب كارێ راگه‌هاندنێ كر، ل ده‌ستپێكێ من بۆ گۆڤارا (زهره النیسان) كاردكر و هه‌تا 2008 یێ به‌رده‌وام بووم، دووڤدا چومه گۆڤارا (الصوت الاخر) وه‌ك په‌یامنێر من كاركر، كو ب زمانێ عه‌ره‌بی بوو.
هێشتا گۆت: دووڤدا ئه‌ز چومه كه‌نالێ عشتار و من به‌رنامێ (نافیده) ئاماده و پێشكێش دكر، پتریا به‌رنامێن من ل دۆر گوندێن ئێزدیان بوون، هه‌روه‌سا مافێن كه‌مینان و ئافره‌تان و مرۆڤان ب شێوه‌كێ گشتی، و ب دیتنا من نوكه سۆشیال میدیایێ كارتێكرنه‌كا نه‌باش ل سه‌ر جڤاكی بگشتی و مافێن كه‌مینه‌یان ب تایبه‌تی هه‌یه، چنكو چو سانسۆر ل سه‌ر نینن و هه‌ر كه‌سه‌ك ل مالا خوه ب ئازادی په‌یامان به‌لاڤ دكه‌ت، ئه‌ڤجا ئه‌و په‌یام چو باش بیت یان خراب، راسته راگه‌هاندنامه رۆژ بۆ رۆژێ یا به‌ر ب پێشڤه دچیت و رۆژنامه‌ڤان ژی به‌ر ب زێده‌بوونێ نه، له‌ورا ل ڤێره یا گرنگ ئه‌وه هه‌موو رۆژنامه‌ڤان ب پیشه‌یی كاربكه‌ن و ئه‌ته‌كێتێن رۆژنامه‌ڤانیێ په‌یره‌و بكه‌ن، چنكو راگه‌هاندن یا بوویه پره‌ك دناڤبه‌را خه‌لكی و ده‌ستهه‌لاتێ دا.
