سۆپەرا ئیراقێ دەلیڤەیە بۆ دهۆكێ ڕیكۆردەكێ تۆماربكەت
قەیس وەیس:
فدراسیۆنا فوتبۆلا ئیراقێ ڕاگەهاند قارەمانییا سۆپەرا ئیراقێ دێ ب پشكدرییا شەش یانەیان ژ وانا دهۆك و زاخۆ ل 18ێ هەتا 29ێ مەها بهێت ب شێوەیێ دو كۆم هێتە كرن، كۆما ئێكێ پێهاتیە ژ یانەیێن زاخۆ، جەوییە و شورتە، كۆما دویێ دهۆك، تەلەبە و زەورا، لێ بڕیارا دەستنیشانكرنا مێڤانداریێ نە هاتە بەلاڤكرن.
ژێدەرێن رۆژنامەڤانی ل بەغدا دیار كرییە كو بڕیارە ل دەستپێكا حەفتییا بهێت كۆمبوون دگەل هەر شەش یانەیین پشكدار د قارەمانیێ دا بهێتە كرن ژبۆ ئێكلاكرنا جهێ قارەمانیێ، ئەوا پێشتر هاتبوو دیاركر كو هەر كۆمەك دێ ل باژێرەكی هێتە كرن و یاریێن وان ب شێوەیێ ئێك قۆناغە خودانا ڕێزا ئێكێ یا هەر كۆمەكێ دێ دەربازبتە یارییا دووماهیێ، پێشبینی دهێتە كرن یاریگەها یانەیا دهۆك مێڤاندارییا هەردو كۆمان بكەت هەتا دگەهتە یارییا دووماهیێ، ئەوا پێشتر یانەیا دهۆك ب نڤێسارەكا فەرمی ئاراستەیی فدارسیۆنا فوتبۆلا ئیراقێ كربوو، لێ هەردو یانەیێن شورتە و جەوییە خواستیە ل یاریگەها شەعب بهێتە ئەنجامدان.
ژلایەكێ دووڤە یانەیا دهۆك دێ هەموو بزاڤان كەت ل یاریگەها وێ بهێتە كرن پێخەمەت تۆماركرنا ڕیكۆردەكا نوو و دیرۆكەكا نوو بۆ یانەیێ كو بشێت ناسناڤێ خوە یێ سێیێ د ئێك وەرز دا و د ماوەیێ پێنچ هەیڤان دا پشتی ناسناڤێ هەردو كۆپایێن كەنداڤی و كۆپا ئیراقێ، ئەوا ل وەرزێ 2009-2010 ئێكەم ناسناڤێ خولا ئیراقێ ب دەستڤە ئینایی و ئێكەم جار پشكداری د قارەمانییەكا دەرڤە دا كری ئەوژی كۆپا فدراسیۆنا ئاسیا ل وەرزێ 2010-2011 و دیسان ل وەرزێ 2012-2013 پشكداری كربوو.
