سێمێل بەرانبەر دەلیڤەیەكا زێڕینە ژبۆ گەشكرنا هیڤیێن خوە
چاڤەڕێ دهێتە كرن سوبەهی و ئەینیا بهێت ل دەمژمێر 2:30 پشتی نیڤرۆ هەردو یانەیێن پارێزگەها دهۆكێ تیما فوتبۆلا یانەیێن سێمێل و تەناهی یاریێن خوە ژ چارچووڤەیێ گەڕا 11ێ یا خولا پلا ئێكا كوردستانێ دەربازبوون بۆ پلا نایاب دناڤ ئەرد و جەماوەرێ خوە دا مێڤاندارییا یانەیێن باژێرێ سلێمانیێ بكەن د دو یاریێن ب هێز دا و دەلیڤەیا سەركەفتنێ و پێشڤەچوونێ دا.
ل یاریگەها زانكۆیا دهۆك بڕیارە سوبەهی پێنج شەمبی تیما یانەیا تەناهی مێڤاندارییا یانەیا چەمچەمال بكەت د یارییەكێ دا هەردو تیم دێ شەڕی بۆ سێ خالان كەن پێخەمەت خوە قۆرتالكرن ژ رێزێن دووماهیێ و پاشڤەچوون بۆ پلا دویێ، تیما تەناهی د كاودانەكێ خراب دا دەرباز دبیت ئەوا نوكە ب نەهـ خالان ژ سێ سەركەفتنان بتنێ ئیناینە رێزا 12ێ دهێت و حەفت خوسارەتی هەنە بێ چو وەكهەڤیان بینت، ئەڤ یارییە بۆ وێ دەلیڤەیە ژبۆ ڤەگەڕیانێ بەر ب رێزێن باشتر و پاراستنا مانا خوە د خولێ دا بكەت، لێ تیما چەمچەمال ژی هەڤڕكا وێ یە ئەوا كێمتر خالەكێ ل رێزا 13ێ دهێت و دێ شەڕی بۆ سێ خالان كەت.
بۆ ڤێ یاریێ پەروەر حسێن سەرپەرشتێ تیما سێمێلێ دیاركر ئەڤ یارییە گەلەك یا گرنگە و چارەنڤیسە بۆ دیاركرنا هیڤیێن دەربازبوونێ، ئەو گەشبینن ب پشتەڤانییا جەماوەرێ خوە بشێن سێ خالان دەستڤە بینن و بەردەوامیێ بدەنە شەڕێ خوە یێ پلێتا دەربازبوونێ.
ژلایەكێ دووڤە تیما یانەیا سێمێلێ ل رۆژا ئەینی دێ ل یاریگەها خوە دا مێڤاندارییا حەلبجەیا شەهید كەت و بزاڤێن ڤەگەڕاندنا سێ خالان و ب هێزكرنا هیڤیێن خوە یێن دەربازبوونێ، سێمێل ب 19 خالان رێزا چارێ دهێت ژ شەش شەركەفتن و وەكهەڤییەكێ و دێ هەمی رێكا ب كارئینیت بشێت دڤێ یاریێ دا ب سەركەڤیت پێخەمەت موكمكرنا رێزبەندییا خوە و پێشڤەچوون بەر ب رێزێن باشتر، بۆ زانین تیما رزگاری ب25 خالان سەرێ لیستێ دهێت، ب هەمان خال كێمترییا گۆلان كۆیە رێزا دویێ، پێشەسازی ب 24خالان رێزا سێیێ دهێت، ئەڤ یارییە دەلیڤەكە بۆ دەستڤە ئینانا سێ خالان، سەرباری تیما مێڤان ئێك ژ نەباشترین هەڤڕكێن خولێ یە ئەوا بتنێ پێنج خال كۆمكرین و رێزا 15ێ و بەری دووماهیێ دهێت.
