سەردار سالح: ڤەکرنا پشکا چارەسەرییا سرۆشتی یا فەربوو و دێ گەلەک ئاریشەیان چارەسەرکەت
هەرهین محەمەد
د داخویانیەکێ دا سەردار سالح ڕێڤەبەرێ پەیمانگەها وەرزشی ل دهۆکێ دیارکر بڕیار هاتە دان پشکا چارەسەریا سروشتی بۆ جارەکا ئێکێ ل پەیمانگەهێ بهێتە ڤەکرن، ئەڤ بڕیارە ژلایێ وەزارەتا پەروەردەیێ هاتیە دەرکرن وەکو پێنگاڤەکا پێشکەفتی بۆ وەرزشێ.
زێدەتر ڕێڤەبەرێ پەیمانگەهێ ئاماژە ب وێ چەندێ کر د کۆمبوونا ل گەڵ جەنابێ وەزیری کو پتر ژ شەش دەمژمێران یا بەردەوام بوو، تەکەزی ل سەر ڕزگارکرنا پەیمانگەهێ ژ ئاریشەیا کێمیا وەرگرتنا قوتابییان هاتە کرن، سالانە ب سەدان قوتابی ژ مافێ خویندنێ بێ بەهر دبوون، بۆ نموونە د ڤێ ساڵە دا پتر ژ 700 کەسان پێشکێشی پەیمانگەهێ کربوو، بەلێ بتنێ 135 قوتابی هاتبوونە وەرگرتن، ڤێ چەندێ دکاربوو ئاریشەیێن جڤاکی، خێزانی و دیاردەیا بێکاریێ ل دەڤەرێ زێدە بکەت، ژبۆ چاره‌سەرکرنا ڤێ ئاریشێ، ب بڕیارا وەزیرێ پەروەردێ ڕێژەیا وەرگرتنا قوتابییان گەلەک هاتە زێدەکرن، د سیستەمێ خویندنا ئێڤاران دا پتر ژ 325 قوتابییان هاتنە وەرگرتن، هەروەسا د خویندنا سپێدەهی و پارالێل دا 135 قوتابی پێکهاتینە، کو نزیکی 90 قوتابییان ب بێ بەرامبەر هاتینە وەرگرتن، ژ 91 هەتا 135 دێ ب سیستەمێ پارالێل خوینن.
سەردار سالح گۆتژی: کوژمەیێ خویندنا پارالێل 400 هەزار دینارن، تێچوویێ خویندنا ئێڤاران ژی 600 هەزار دینارن، پشکا چارەسەریا سروشتی پێدڤیەکا زۆر یا جڤاکی یە، چونکی گەلەک ژ وەرزشڤانان و ئەندامێن جڤاکی تووشی هەنگافتن و ئاریشێن جەستەیی دبن و ڕێکێن دروستێن چارەسەریێ نزانن، دەرچوویێن ڤی پشکێ دێ شێن د سەنتەر، ئەکادیمی، یانە و پێکهاتێن وەرزشی دا کار بکەن.
لدووماهیێ ناڤهاتی ئەوچەندە ژی گۆت: ئەڤ پشکە زێدەتر ل سەر بابەتێن تیۆری وەکو: ئینگلیزی، عەرەبی، کوردی، پالاوتن، زانستێن دەرۆنی، مەساج، زمانێ جەستەیی، هنگاڤتنێن وەرزشی و دەستپێکێن هاوارهاتنێ ڕاوەستێت، بۆ ڤی مەبەستی ب هەماهەنگی ل گەڵ کۆلیژا پەروەردا وەرزشی ب سەرپەرشتیا دکتۆر محەمەد مەحییە و دکتۆر دیار، خولەکا ڕاهێنانا پراتیکی بۆ مامۆستایێن ئاستێ بەهدینان دهۆک، زاخۆ، ئاکرێ و بەردەڕەش دێ هێتە ئەنجامدان و داهاتییێ ڤان سیستەمان پارالێل و ئێڤاران دێ بۆ نووژەنکرنا ئاڤاهییێ پەیمانگەهێ ب کار هێت، ب تایبەت نۆژەنکرنا هۆلا گڕتی کو ئاڤ تێدا دچوو خوارێ، دا کو خزمەتا 800 قوتابییێن پەیمانگەهێ بکەت.