سەرکەفتنا پارتی دێ بیتە ئەگەرێ بەردەوامیا کاروانێ ئارامی و ئاڤەدانیێ
سەرۆکێ ناڤەندا ڤەکۆلینێن کوردی- ئەمریکی دیار دکەت پارتی شیایە هەڤسەنگیەکا باش د سیاسەتا ل گەل وەلاتێن دەڤەرێ دا دروست بکەت، نها دەڤەرا مە گەلەک یا ئالۆزە و هێڤیدارم ئەو یەک کاریگەریا خوە ل سەر هەلبژارتنان نەکەت و سەرکەفتنا پارتی دێ بیتە ئەگەرێ بەردەوامیا کاروانێ ئارامی و ئاڤەدانیێ.
کارۆخ خۆشناو سەرۆکێ ناڤەندا ڤەکۆلیێن کوردی- ئەمریکی د دیدارەکا تایبەت دا بۆ رۆژناما ئەڤرۆ دیار کر، نها رۆژهەلاتا ناڤین د رەوشەکا گەلەک ئالۆز دایە و هەکە ئێراق ژی ببیتە پشکەک ژ شەڕێ نها بێگومان ئەو یەک دێ کاریگەریا خوە ل سەر هەرێما کوردستانێ ژی هەبیت، لێ وەکو هەرێما کوردستانێ ئەم پشکەک نینین ژ شەرێ نها و گۆت: (هەلبژارتنێن پەرلەمانێ کوردستانێ ژی د رەوشەکا وەسا دا دهێنە کرن، گرنگە هەلبژارتن بێ ئاریشە بهێنە کرن، هێڤیدارم وەلاتیێن هەرێما کوردستانێ ژی بچنە سەر سندوقێن دەنگدانێ و دەنگێ خوە بدەنە وێ هێزا کو وان دڤێت).
ناڤهاتی د پشکەکا دی یا ئاخڤتنا خوە دا ئەو یەک ژی دیار کر، هێزەک ل هەرێما کوردستانێ هەیە کو هەتا نها شیایە هەرێما کوردستانێ بپارێزیت و کاروانێ ئاڤەدانیێ ژی بەردەوامە، سەرکەفتنا لیستا ١٩٠ یا پارتی دیموکراتی کوردستان د ڤان هەلبژارتنان دا دێ بیتە ئەگەر کاروانێ ئاڤەدانی و ئارامیێ بەردەوام بیت و ئەو یەک ژی بێگومان بۆ هەرێما کوردستانێ گەلەک یا گرنگە و گۆت: (گرنگە هندەک لایەن د هەوا پرۆپگاندا هەلبژارتنان دا رەوشا خەلکی بدەنە بەرچاڤ، دڤێت هندەک ئالی ب داخۆیانیان نەبنە ئەگەرێ ئالۆزیان، بلا هەلبژارتن د کەشەکێ ئارام و دیموکراتی دا برێڤە بچیت ئەو یەک ژ بۆ هەرێما کوردستانێ ژی گەلەک یا گرنگە، سەرکەفتنا پرۆسیسا هەلبژارتنان دێ بۆ پاشەرۆژا هەرێما کوردستانێ ژی گرنگیەکا خوە یا تایبەت هەبیت، ژ بەر هندێ ژی دڤێت هەموو هێزێن سیاسی هەست ب بەرپرسیاریا خوە یا دیرۆکی بکەن).
سەرۆکێ ناڤەندا ڤەکۆلینێن کوردی- ئەمریکی ئەو یەک ژی دیار کر، ئەمریکا، نەتەوەیێن ئێکگرتی، وەلاتێن ئێکەتیا ئۆرۆپا و هەڤالبەندێن هەرێما کوردستانێ ژی چاڤدێریا ڤان هەلبژارتنان دکەن، ژ بەر هندێ ژی گرنگە هەلبژارتن بێ ئاریشە بهێنە کرن، چونکی ئەڤ هەلبژارتنە یا چارەنڤیسسازە بۆ هەرێما کوردستانێ، خەلکێ هەرێما کوردستانێ ئاڤەدانی و ژیانەکا خوەشتر دڤێت، خەلکێ دڤێت ئاریشێن نها هەیین بهێنە چارەسەر کرن، ژ بەر ڤێ یەکێ ژی خۆلا نوو یا پەرلەمانێ کوردستانێ دێ گەلەک یا گرنگ بیت و گۆت: (بێگومان مە هەموویان کوردستانەکا بهێز و ئارام دڤێت، مە هەموویان دڤێت ژیانا مە خوەشتر لێ بهێت، ژ بەر ڤێ یەکێ ژی دڤێت وەکو دەنگدەر و وەکو وەلاتیێن هەرێما کوردستانێ ئەم ژی هەست ب بەرپرسیاریا خوە بکەین و ژ بۆ دیارکرنا نوونەرێن خوە دەنگێ خوە ب رەنگەکێ باش و راست بکار بینین دا نوونەرێن مە ژی بشێن پتر خزمەتا مە بکەن).
