سەرۆكێ یانەیا شێخان: ژبەر دووراتیا ئەردێ یاریگەهێ وەبەرهێنانی ناهێتە كرن و بارێ دارایی لاوازە
ئەڤرۆ
د دیدارەكێ دا سەرۆكێ یانەیا شێخان یا وەرزشی بۆ رۆژناما ئەڤرۆ دیار كر ژبەركو ئەردێ هاتیە تەرخانكرن بۆ ئاڤاكرنا یاریگەهێ و ژێرخانەیا یانێ چ كەس وەبەرهێنانێ ل سەر ئەردێ یاریگەهێ ناكەت و ئەم رژدین پشكداریەكا سەركەفتی د هەردو خولێن كوردستانێ و ئیراقێ دا بكەین.
زێدەتر فازل فاخر گۆت: بارێ دارایێ یێ یانێ گەلەك لاوازە ب تنێ مە ئێك دەرگەه هەیە ئەو ژی هاریكاریا پارێزگەها دهۆكێ ئەوا بوو هەموو یانەیان هاتیەدانان لێ ئەو كۆژمە هەموو پێدڤیێن مە دابین ناكەت ژبەركو كێمترین هاریكاری بۆ مە دهێتە دان كو نێزكی سێ ملیۆن دیناران هەیڤانە وەردگرین تێرا پێدڤیێن بۆ تیمێ و هاتنۆچوون ناكەن، یانەیا شێخان چو ژێرخانە و وەبەرهێنانێن باش نینن كو بشێن ب دروستی كاروچالاكیێن خوە برێڤەببەت ژبلی داهاتیەكێ كێم ژ مۆلەكێ و یاریگەهەكا بچۆك، سەرباری بزاڤێن مە بۆ ئینانا سۆپنسەران لێ كەسێ خوە ل یانێ نە كریە خودان، لەما هەكە ژێرخانە و وەبەرهێنان هەبا دا شێین هەموو ئاریشەیێن خوە چارەسەركەین و رێژەیەكا باش وەرزشا شێخان بۆ پرانیا یاریان بەر پێشڤە چیت.
هەروەسان ناڤهاتی دیاركر یانێ ئەرد وەكو مولك ل سەر ناڤێ خوە هەوە لێ یا دوورە ژ باژێری و جهەكێ ڤەدەرە، چو كەس ناهێن وەبەرهێنانێ لێ بكەن، ئەوا حوكمەتا هەرێمێ بۆ یانەیا شێخان دكەت و ئەڤا ئەز دزانم بۆ ماوەیێ شەش سالە هندی ئەز ل كارگێریێ ئێك دینار ژ بۆ یانەیێ نە مەزاخییە ژبلی ئەو یاریگەها بچووك بناڤێ یانێ هاتیە دانان و گۆت: یانەیا شێخان دهێتە هژمارتن نوونەرا ئێكانە یا پارێزگا دهۆكێ د ڤاڤارتنێن دەربازبوونێ ژ پلا دو بۆ پلا ئێكا ئیراقێ و بۆ خولا كوردستانێ ژی رژدین باشترین شێوە پشكداریێ بكەن سەرباری لاوازیا دارایی و مەرەما سەرەكی پشتەڤانیا گەنج و لاوێن شێخانە، لەوما هیڤییا مە ئەوە حوكمەتا هەرێمێ شتەڤانیێ ل مە بكەت تایبەت وەبەرهێنانێ دا.
