سەرۆكێ ئێكەتیا زەلامێن كوردستانێ: ئەڤ سالە تووندوتیژی ل هەمبەر زەلامان زێدەبوویە
سەرۆكێ ئێكەتیا زەلامێن كوردستانێ ئاشكرا كر، ئەڤ سالە رێژەیا توندۆتیژیێ هەمبەری زەلامان زێدەبوویە و ب تنێ د دەمێ شەش مەهێن دەستپێكێ یێن ئەڤ سالە توندۆتیژی هەمبەر 336 زەلامان هاتیەكرن و 39 زەلامان ژی دوماهی ب ژیانا خوە ئینایە.
بورهان عەلی، سەرۆكێ ئێكەتیا زەلامێن كوردستانێ بۆ رۆژناما ئەڤرۆ دیار كر، د دەمێ شەش مەهێن بۆری یێن ئەڤ سالە دا ل سەرانسەری هەرێما كوردستانێ 336 حالەتێن توندۆتیژیێ هەمبەری زەلامان هاتینە تۆماركرن، د ناڤ دا 39 زەلامان دوماهی ب ژیانا خوە ئینایە و پێنج زەلامێن دی ژی ژ لایێ هەڤژینێن وان ڤە ب هەڤكاریا كەسێن دی هاتینە كوشتن.
بورهان عەلی گۆت: «ئامارێن توندۆتیژیێ هەمبەری زەلامان د ئەڤ سالە دا زێدەبووینە، د شەش مەهێن ئێكێ یێن سالا بۆری دا 321 حالەتێن توندۆتیژیێ هاتبوونە تۆماركرن و 29 حالەتێن خوەكوشتنێ و سێ حالەتێن كوشتنا زەلامان هاتبوونە تۆماركرن، بێگومان چەندین جاران ژی مە بەحسێ ئەگەرێ توندۆتیژیێ هەمبەری زەلامان كریە و هەتا ئەگەر نەهێنە چارەكرن دێ توندۆتیژیا ل سەر زەلامان یا بەردەوام بیت، بێگومان توندۆتیژیێن هاتینە تۆماركرن د هەموو بیاڤان دا بووینە و هەر ل گەفێن كوشتنێ هەتا دەركرن و ئەشكەنجەدانێ».
