سەرۆکێ ئەمریکا هۆشداری دایە سەرۆک وەزیرێن ئسرائیلێ
پشتی ئێرشا ئیرانێ یا ل سەر ئیسرائیلێ، سەرۆک وەزیرێن ئسرائیلێ دیار کر ئەو دێ ب توندی بەرسڤا ئیرانێ دەن، بەرپرسەکێ ئەمریکا ژی دیار دکەت ئەمریکا نەهێلا ژ بەر ئێرشا ئیرانێ چو زیان بگەهنە ئسرائیلێ و هۆشداری ژی دایە نەتانیاهۆی کو چو ئێرشان نەکەتە سەر ئیرانێ.
بەرپرسەکێ ئەمریکا کو نەخواستیە ناڤێ وی بهێتە ئاشکرا کرن، بۆ کەنالێ سی ئێن ئێن یێ ئەمریکا دیار کریە، ئەمریکا و بریتانیا پێکڤە شیان هەموو درۆن و موشەکێن ئیرانێ ژناڤ ببەن بەری کو بگەهنە ئاخا ئسرائیلێ و ئەو یەک ژی وەسا کر چو زیان نەگەهنە ئسرائیلێ، لێ د هەمان دەمی دا بایدنی ب رەنگەکێ ئاشکرا هۆشداری دایە سەرۆک وەزیرێن ئسرائیلێ کو دەست ب چو ئێرشان ل سەر ئیرانێ نەکەت، چونکی وەکو ئەمریکا ئەو پشتەڤانیێ ل کارەکێ وەسا ناکەن و دڤێت ئسرائیل رێ نەدەت رەوشا نها پتر ئالۆز ببیت.
هەمان بەرپرسی ئەو یەک ژی دیار کریە، ئێرشا ئیرانێ تنێ بۆ رازیکرنا رایا ناڤخوەیی و هندەک ژ گرۆپێن چەکدار بوو، ئیران نەچار بوو کارەکێ وەسا بکەت، ژ بەر ئێرشا ئیرانێ چو زیانێن وەسا نەگەهشتنە ئسرائیلێ، لێ هەکە ئسرائیلێ بڤێت دەست ب ئێرشەکا نوو ل دژی ئیرانێ بکەت وی دەمی ئەمریکا هاریکاریا ئسرائیلێ ناکەت، چونکی سەرۆکێ ئەمریکا ب رەنگەکێ ئاشکرا دیار کریە، رەوشا رۆژهەلاتا ناڤین نها گەلەک یا هەستیارە و نابیت ئسرائیل کار بۆ ئالۆزکرنا رەوشا رۆژهەلاتا ناڤین بکەت.
ل ئالیێ دی وەزیرێ دەرڤە یێ ئیرانێ ژی راگەهاند، ئێرشا وەلاتێ وی ل سەر ئسرائیلێ ب رەنگەکێ سەرکەفتیانە ب دووماهی هات، وان دخواستن ئسرائیلێ سزا بدەن و ئێرشا ئیرانێ هۆشداریەکا مەزن بوو دا ئسرائیل جارەکا دی دەست ب کارێن مەترسیدار ل دژی ئیرانێ نەکەت، لێ جهێ داخێ یە وەلاتێن کو ئێرشا ئیرانێ ل دژی ئسرائیلێ شەرمزار کرن هەمان هەلوەست ل دۆر ئێرشا ئسرائیلێ یا ل سەر بالیۆزخانا ئیرانێ ل شامێ نەبوو.
چاڤدێرێن سیاسی ژی دیار دکەن، هەکە ئسرائیلێ بڤێت بەرسڤا ئێرشا ئیرانێ بدەت ئەو یەک دێ رۆژهەلاتا ناڤین تووشی شەڕەکێ مەزن کەت، چونکی ئیرانێ ژی ئەو شیان هەنە ئالۆزیان بۆ ئسرائیلێ دروست بکەت، ئیران دشێت ب رێیا گرۆپێن چەکدار رەوشا دەڤەرێ گەلەک ئالۆز بکەت، هەرچەندە ئێرشا ئیرانێ و شێوەیێ وێ تا رادەیەکێ یا پێشبینی کری بوو کو دێ چو زیانێن خوە یێن وەسا مەزن بۆ ئسرائیلێ نەبن، لێ ئەو یەک رامانا هندێ نادەت کو ئیران نەشێت زیانێ بگەهینە ئسرائیلێ، چونکی ئیران ئێکە ژ وەلاتێن بهێز ل دەڤەرێ و هەردەم دشێت رەوشا رۆژهەلاتا ناڤین ئالۆز بکەت، ژ بەر ڤێ یەکێ ژی ئەمریکا د رەوشا نها دا پشتەڤانیێ ل ئێرشەکا نوو ژ ئالیێ ئسرائیلێ ڤە ل سەر ئیرانێ ناکەت.
