سەنتەرێن ئۆتیزمێ ژینگەهەکا پێدڤی یا چارەسەریێ نە
بێوار حەمدی:
د دەمەکی دا کو حالەتێن ئۆتیزمێ ل سەر ئاستێ جیهانێ و کوردستانێ د زێدەبوونێ دانە، چارەسەرکارەکێ دەروونی تەکەزێ ل سەر گرنگیا دەستنیشانکرنا پێشوەخت دکەت و گۆت؛ ڤەکرنا سەنتەرێن بسپۆر فاکتەرەکێ بنەڕەتییە بۆ دابینکرنا ژینگەهەکا گونجایی یا چارەسەریێ و پێشڤەبرنا شیانێن تووشبوویان.
مەهدی شێرزاد، چارەسەرکارێ دەروونی و ڕێڤەبەرێ سەنتەرێ داڤیان یێ ئۆتیزمێ دیار کر کو بەری چەندین سالان هشیاریا جڤاکی لدور ئاریشا ئۆتیزمێ گەلەک یا کێم بۆ، و گەلەک حالەت ددەمێ خودا نەدهاتنە دەستنیشانکرن و گۆت: “لێ د نوکەدا گرنگیا دەستنیشانکرن و دەستێوەردانا پێشوەخت بلند بویە و سەنتەرێن بسپور یێن ئۆتیزمێ پێخەمەت خزمەتکرنێ زێدە بوینە”.
چارەسەرکارێ دەروونی ئەو چەندە ژی دا زانین، سەنتەرێن بسپۆر یێن ئۆتیزمێ گەلەک د پێدڤی نە، ژبەرکو ژینگەهەکا چارەسەری و پەروەردەیی یا گۆنجایی ژ بو هەموو تووشبویان دابین دکەن و گۆت: “ئەڤ سەنتەرە هاریکاریێ ددەستنیشانکرن و دەستێوەردانا پێشوەخت دا دکەن و ئەڤە ژی فاکتەرەکێ گەلەک گرنگە ژبو باشترکرنا گەشەیا زارۆکی”.
مەهدی دیار کر ژی کو سەنتەرێن ئوتیزمێ لدووڤ مەزناهیا سەنتەری و هژمارا زارۆکان ڕەفتارێ دکەن، لێ بشێوەیەکێ گشتی پێدڤی ب ڤێ تیمێ هەیە: بسپورێن ئۆتیزمێ و پەروەردەیا تایبەت، بسپورێ گەشەیا زمان و ئاخفتنێ، بسپورێ چارەسەریا ئەرکی، زێدەباری ڕاهێنەر و ماموستایێن وەرزش و هونەرێ یێن تایبەتمەند.
ل دوماهیا ئاخفتنا خۆ، مەهدی شێرزاد داخواز ژ دایک و بابا کر کو ب چاڤەکێ هویربین سەرەنجێ بدەنە قۆناغێن گەشەیا زارۆکێن خوە و گۆت: “هەکە هەر گوهۆڕین یان گیرۆبوونەک د ئاخفتن، پەیوەندیکرن، یان تێکەلیا جڤاکی یا زارۆکی دا هاتە دیتن، پێدڤییە ب لەز سەرەدانا سەنتەر و بسپۆران بکەن و بێدەنگ نەمینن، چونکی چەند دەستنیشانکرن زووتر بیت، ئەنجامێن چارەسەریێ گەلەک باشتر و ب کارتێکەرترن”.
