شانده‌كێ په‌رله‌مانێ كوردستانێ دووڤچوونا جهێن توپبارانێن توركیا دكه‌ت
ئه‌ڤرۆ نیوز،عه‌لی حاجی :
ب مه‌ره‌ما دووفچوونا زه‌ره‌ر و زیانێن ده‌ڤه‌رێن زاخۆ كو ئه‌وێن دهێنه توپباران كرن و شه‌رێ دناڤبه‌را هێزێن په‌كه‌كێ و سوپایێ توركیا،شانده‌كێ په‌رله‌مانێ كوردستانێ سه‌ره‌دانا ده‌ڤه‌رێن سنوری كرن ل ناحیێن باتیفا و ده‌ركارێ و سه‌ره‌دانا قائیمقامیا زاخۆ كرن . حكمه‌ت محه‌مه‌د گه‌ودا سه‌رۆكێ لژنا پێكهاتی ل دور بوردومانێن ده‌ڤه‌را زاخۆ د داخویانیه‌كێ دا بۆ ده‌زگایێن راگه‌هاندنێ گۆت: ئه‌ڤ لژنه‌یه ل دووڤ داخازیا په‌رله‌مانێ كوردستانێ هاتیه پێك ئینان پشتی كو توپباران و شه‌رێ دناڤبه‌را سوپاپێ توركیا و هێزێن په‌كه‌كێ ل سنورێ ده‌ڤه‌را زاخۆ و چه‌ند ده‌ڤه‌ره‌كێن دیترێن كوردستانێ دژوارتر لێهاتین و ژ نێزیك ڤه دێ سه‌ره‌ده‌نا هه‌ردوو ناحیێن باتیفا و ده‌ركارێ كه‌ین دا كو بزانین زه‌ره‌ر و زیانێن وان ده‌ڤه‌ران چنه و پاشی ب رێیا راپورته‌كێ ئه‌م راده‌ستی سه‌روكاتیا په‌رله‌مانێ كوردستانێ بكه‌ین و سه‌ره‌دانێن مه نه‌به‌س دێ بۆ ده‌ڤه‌رێن سنوریێن ده‌ڤه‌را زاخۆبن به‌لكو دێ بۆ وان هه‌می سنوران بن یێ كو دهێنه توپباران كرن.
ل دور شه‌رێ سوپایێ توركیا وپه‌كه‌كێ د ناڤ ئاخا هه‌رێما كوردستانێ دا ناڤبری گۆت : وه‌كو لژنا هاتیه پێك ئینان ژی ئه‌م داخازێ ژ هه‌ردوو هێزان دكه‌ین شه‌رێ خوه دناڤ سنورێ ئاخا كوردستانی ڤه‌گوهێزنه دناڤ ئاخا خوه دا ژبه‌ر كو ده‌ڤه‌رێن مه چو په‌یوه‌ندیه‌ك ب كێشه‌یا دناڤبه‌را هه‌ردوو هێزان دا نینه . ل دوماهیێ گۆت ژی : توپبارانا به‌رده‌واما سوپایێ توركیا و ئیرانێ بویه ئه‌گه‌ر زه‌ره‌ر و زیانه‌كا مه‌زن به‌ر ب وه‌لاتیان كه‌ڤتی یه له‌ورا دبیت زووترین ده‌م دا ئه‌ڤ توپبارانه بهێته راوه‌ستاندن ژبه‌ر كو وه‌لاتیێن سڤیل زه‌ره‌مه‌ندێن ئێكانه‌نه ژوێ توپبارانێ و ئه‌ڤ لژنه ژ سێ لژنه‌یان هاتیه پێك ئینان كو ژ لژنه‌یێن پێشمه‌رگه و نافخۆ و ئاسایش و هه‌ر دیسان لژنه‌یا په‌یوه‌ندیان ل په‌رله‌مانێ كوردستانێ هاتیه پێك ئینان .
