شاندەكێ وەزارەتا چاندنا هەرێمێ ل دۆر وەرگرتنا گەنمی دێ چیتە بەغدا
دهۆك، دلۆڤان ئاكرەیی:
وەزیرا چاندن و ژێدەرێن ئاڤێ ل حوكمەتا هەرێما كوردستانێ دیاركر، ئەڤ سالە ئیراقێ رێژەیا وەرگرتنا گەنمی بۆ هەرێما كوردستانێ گەلەك كێم كریە، ئەڤ چەندە ژی دێ كارتێكرنەكا مەزن ل كەرتێ چاندنێ كەت و دبێژیت: بۆ ڤێ مەرەمێ بڕیارە د رۆژێن بێهن دا شاندەكێ هەرێمێ سەرەدانا بەغدا بكەت.
بێگەرد تالەبانی، وەزیرا چاندن و ژێدەرێن ئاڤێ ل حوكمەتا هەرێما كوردستانێ بۆ رۆژنامەیا ئەڤرۆ گۆت: «ئەو رێژەیا گەنمی یا ژ لایێ ئیراقێ ڤە بۆ هەرێما كوردستانێ هاتیە دانان گەلەكا كێمە، كو 292 هزار تەنن د ناڤ پلانی دا و 108 هزار تەن ژی ژ دەرڤەی پلانێ هاتینە دیاركرن، بۆ ڤێ مەرەمێ مە نامەیێن فەرمی بۆ سەرۆكوەزیران و وەزارەتا چاندنا ئیراقێ فرێكرینە، بەلێ بەهانەیا ئیراقێ ئەوە، كو كێشەیا پارەی هەیە بۆ كڕینا گەنمی و باس ل وێ چەندێ كر كو بەری نوكە سەرۆكوەزیرانێ هەرێما كوردستانێ مەسرور بارزانی ژی ل گەل سەرۆكوەزیرێن نوو یێ ئیراقێ ئەڤ بابەتە باس كریە و چو ئاریشەیێن تەكنیكی د ناڤبەرا هەرێمێ و ئیراقێ دا نینن، لێ كێشە بۆ شێوازێ بڕیاردانا ئیراقێ دزڤڕیت، ئەم پێ رازی نینین و ئەگەرێ دروستبوونا كێشەیێ بۆ یاسایا بودجەی دزڤڕیت، كو بڕە پارەیەكێ دیاركری د یاسایا بودجەی دا بۆ كڕینا گەنمی هاتیە تەرخانكرن و سەقایێ هەرێما كوردستانێ بەرچاڤ وەرناگریت».
