شانەدێرا ماهدۆخت ل بامەڕنێ هاتـە گێـڕان
ئامێدیێ، مەحمود نهێلی:
كریستانێن دەڤەرا ئامێدیێ وەكو نەریتەكێ سالانە و ب مێڤانداریا چەندین موسلمانان شانەدێرا ماهدۆخت ل گوندێ ئەرەدنا یێ سەر ب ناوچەداریا بامەرنێ ڤە گێڕا.
میناس یەعقوب وەكو ئێك ژ كریستانێن ناوچەداریا دێرەلۆكێ و ئاكنجی ل دهۆكێ و پشكداری د شانەدێرێ دا كری بۆ رۆژناما ئەڤرۆ گۆت: «هەموو سالان د ڤی دەمی دا ئەڤ شانەدێرە ل ڤێ دەڤەرێ دهێتە گێڕان و یا تایبەتە ب كریستانێن ڤێ دەڤەرێ ڤە، دیرۆكا گێڕانا وێ ژی بۆ سالا 309 زایینی ڤەدگەڕیت، ئەڤ شانەدێرە ل ڤێ دەڤەرێ ل سەر دەمێ ئیمبراتۆریەتا فورسێ هاتیە كرن، كو ل مووسلێ بوون».
گۆت ژی: «ئەڤ شانەدێرە وەكو نەریتەكێ ئاینی یە و هەموو سالان ل 15ی گولانێ دهێتە ئەنجامدان، ئانكو نە ئەركە، بەلكو نەریتە، بەلێ چەندین رێورەسمێن ئاینی یێن پیرۆز تێدا دهێنە ئەنجامدان و لاڤا دهێنە كرن، دیسا كریستانێن دەڤەرێ و هەژمارەكا زۆرا برایێن موسلمانان ژی پشكداریێ د ڤێ شانەدێرێ دا دكەن».
