شاها حەسرەتان
نایف مەحموود
دەم پاییزە و
بەلگ ژ كۆپیتكا
چەقێن داران
دكەڤن..
ل گەل ڤێ تاڤیا وەریانا سۆلینان
تو ژی ئەی شاها سالێن حەسرەتان
دبیە پاییزەك و خاترا ژ ڕۆژێن
بهارا ئەڤینا مە دخوازی
ئەو بهارا ئەز و تو تێدا مەست و سەیرانی..
ل ناڤ مێرگ و چیمەنان
ببووینە سروود و ئاوازێن بلبلا
دلێن مە هینێن عەشقێ بوون
مە چ ژ جودابوونێ نەدزانی..
بەلێ خافلەتیەكێ چاڤێن من هنگافتن
مینا تەیرەكی ل بەر سینگێ من
تو چووی و بلندبووی، دگەل بای فڕی..
هەر زوی پێلێن ئەوران
تو، ئەی خاتینا باغ و بیستانان
لبەر من هنداكری!
ژ ڤێ خافلەتیا دلێ من پێ سەتمی
ژ خۆ پرسیم: ئەڤە چ بوو؟
چیروكا ڤێ بابەلیسكێ
چ خەونەكا ب لەز و بەزبوو؟
ڕۆژا من چ زوی ئاڤا بوو!
بێی كو خاترا ب خوازیت
ڤێ ئوغرێ سینگێ من ژ خەما تەنی!
هێسرێن غوربەتێ مینا كانی و ڕوباران
ژ چاڤێن من هەڕكین
سات و چركەیێن ژیانێ
لمن بوونە سالێن درێژ
لەزاتیا میلێن دەمژمێرا من هەر زوی چك بوون
ڕۆژێن من ب درێژاهیا سالان
پاشڤەمان و ڕێ ل دوور ئاڤابوون
ژانێن ڤێ غوربەتێ بوونە شینی
ل دۆرێن من شلخەدان و
خەم ل سەر خەمێ كۆمبوون..
ئەو بهارا ژیێ من دگەل تە دەربازكری،
بۆ پاییزەكا زەر و بەیی..
ئەو دۆبا هنگڤێ سەر لێڤێن تە من ڤەخواری
هەمی بۆ ژەهرەكا تال و
ل سەر جان و بەدەنێ من
وەك بارانێ
هەر دباری، هەر دباری!
