شنگالی و كوردێن باشوورێ كوردستانێ به‌رپرسێن شنگالێ نه
شنگال هاته رزگار كرن، پشتی كو پلانه‌ك بۆ ڤێ یه‌كێ هاته دارشتن ب سه‌رپه‌رشتیا راسته‌راست ئا سه‌رۆكێ هه‌رێما كوردستانێ مه‌سعود بارزانی و ب به‌شداربوونا بێهتر ژ 7500 پێشمه‌رگه و ب هه‌ماهنگیا فرۆكه‌یێن هه‌ڤپه‌یمانیا ناڤده‌وله‌تی ل دژی داشێ و د سه‌ری دا ئامه‌ریكا.
ده‌ما شنگالێ هاته داگیر كرن و ژبه‌ر كو شنگال ده‌ڤه‌ره‌ك كو خه‌لكێن وێ بێهترێن وان كوردێن ئێزدینه، له‌وما شنگال مینا دانێ كه‌لتوور و ئاینا كوردان تێ ناسین هه‌روها كوردێن ئێزدی مینا كوردێن ره‌سه‌نن ب ئول و نه‌ته‌وه‌یا خوه. ژبه‌ر ڤان سه‌ده‌مان و ژبه‌ر كو شنگال مینا هه‌ر ده‌ڤه‌ره‌ك دن ژ كوردستانێ پیرۆزه، هه‌ر تاكه كورده‌كی خوه‌ست ب به‌شداری شه‌ر و خه‌باتا رزگار كرنا شنگالێ ببه و ڤێ شه‌ره‌فێ ب سینگا خوه ڤه‌كه، هه‌تا كو ب گۆتنه‌كێ به ژی ئان ژی ب په‌یداكرنا تاسه‌ك ئاڤێ بۆ كۆچبه‌ره‌كی ئێزدی ئان ژی هه‌گه‌ر ب لاڤا و نماژان به ژی.
شه‌رڤان و چه‌نگاوه‌رێن كورد ژ هه‌رچار په‌چه‌یێن كوردستانێ ب هه‌وارا شنگالێ ڤه هاتن، پێشمه‌رگه‌یێن كوردستانێ، یه‌په‌گه، پێشمه‌رگه‌یێن رۆژاڤا، گه‌ریلایێن په‌كه‌كه و پێشمه‌رگه‌یێن رۆژهلاتێ كوردستانێ و گه‌له‌ك كه‌س و خه‌لكێن دن، ئه‌ڤ هه‌موو كه‌س وه‌ك ئه‌رك هاتن ب هه‌وارا شنگالێ ڤه ئالیكاریا وان دێ نه‌یێ ژبیر كرن و دیرۆك دێ وێ ب تیپێن زێرین بنڤیسه.
لێ به‌لێ شنگال د داوی ده به‌رپرسیاره‌تیا حكومه‌تا هه‌رێما كوردستانێ و خه‌لكێن باشوورێ كوردستان و ئێزدیخانێ یه، ژبلی ڤان ئالیان تو كه‌س، ئان ئالی نكاره خوه بكه خوه‌دیێ شنگالێ و پلانان بۆ وێ ده‌ینه و هێزێن تایبه‌ت و نزانم چ ل ور ساز بكه، حكومه‌تا كوردستانێ و وه‌زاره‌تا پێشمه‌رگه به‌رپرسن د به‌ر شنگالێ ده، و هه‌ر كه‌سه‌كی كێمانی كربه یان ب ئه‌ركێ خوه رانه‌بووبه ب ته‌نێ دادگه‌هێن هه‌رێما كوردستانێ دكاره بریار و سزادانان ل سه‌ر وان بكه.
ده‌زگه‌هێن راگهاندنا په‌كه‌كێ دان خوَیاكرن كو ئه‌و خوه‌دیێ ئوپه‌راسیۆنا رزگار كرنا شنگالێ نه و پێشمه‌رگه ژی ته‌ڤلی ڤێ ئوپه‌راسیۆنێ بوونه، هه‌تا كو ل ئاژانسا ئانها ده هاتبوو كو “هه‌په‌گ، یه‌په‌گ، هه‌پش و یه‌ژا ستار و ژنزانم كیژان هێز ژی، ده‌ست ب رزگار كرنا شنگالێ كرنه و پێشمه‌رگه ژی ژ دوورڤه ل شنگالێ دنه‌رن…?!) د ده‌ما كو ب ده‌هان ئاژانس و ته‌لڤزیۆنێن جیهانێ پێنگاڤ، پێنگاڤ ل گه‌ل پێشمه‌رگه‌یان ڤه ده‌رباسی شنگالێ بوون، ژبلی ئالیكاریا وه‌لاتێن هه‌ڤپه‌یمانیا ناڤده‌وله‌تی ب تایبه‌ت ئامه‌ریكا. راگه‌هاندنا په‌كه‌كێ ڤێ هه‌لمه‌تێ ب ته‌مامی نابینه و ب ته‌نێ دده نیشان كرن كو وان شنگال ئازاد كریه، و پرسا كو تێ كرن ل سه‌رانسه‌ری كوردستانێ: هه‌گه‌ر هێزێن سه‌ر ب په‌كه‌كێ ڤه دكاریبوون شنگالێ ئازاد بكن چما وێ د هه‌مان رۆژا ئوپه‌راسیۆنا پێشمه‌رگه ده ده‌ست ب ئوپه‌راسیۆنا خوه بكن? دیاره مه‌به‌ستێن وان هێزان هه‌نه و مله‌ت ژی باش دزانه بێ كی به‌رپرسێ باشوورێ كوردستانێ یه د هه‌موو واران ده.
هه‌لبه‌ت هه‌گه‌ر د ماوه‌یێ چه‌ند مه‌هان ده هێزێن سه‌ر ب په‌كه‌كێ ڤه به‌حسا كانتۆن و سیسته‌ما حكومرانیێ و خوه‌سه‌ریا ده‌مۆكراتیك ل شنگالێ نه‌كربا نا، و پێشمه‌رگه دیارنه‌كربانا وه‌ك هێزه‌ك خاڤ و نه‌وه‌لاتپارێز، وێ كه‌سه‌كی رۆلا هێزێن بسه‌ر په‌كه‌كێ ڤه د شه‌رێ شنگالێ ده پاشگوه نه‌كربا.
تشتێ كو گه‌ره‌ك بێ ناسكرن ئه‌وه كو هه‌موو هێزێن كو ل شنگالێ شه‌ر دكن، ئالیكارن و خوه‌دیێ قه‌نجی و باشیا خوه نه لێ حكومه‌تا هه‌رێما كوردستانێ و وه‌زاره‌تا پێشمه‌رگه ب ته‌نێ به‌رپرسیارێن هه‌موو ده‌ڤه‌رێن هه‌رێما كوردستانێ نه، هه‌گه‌ر ب ئه‌ركێ خوه رابووبن ئان كه‌مووكورتی هه‌بن ئه‌و به‌رپرسن نه تو ئالیێن دن.
بلا په‌كه‌كێ بزانه كو ب ڤان سیاسه‌تێن وه‌ها كه‌دا وان خۆرتێن وه‌لاتپارێز و جه‌نگاوه‌ر وندا دكه و ناكۆكیێن د جڤات و سیاسه‌تا كوردی ده بێهتر دكه، شنگالێ ب خوونا شه‌هیدان رزگار بوویه و هه‌ر ئالی و كه‌سێن كو ب هه‌وارا شنگالێ ڤه هاتن وێ دیرۆك وان ژ بیر نه‌كه، لێ گه‌ره‌ك هن ئالی بزانبن بێ به‌رپرسیاره‌تیا وان ل كو ده‌ست پێ دكه و ل كیژان سینۆری ژی ته‌مام دبه.
