شنگال و دیمه‌نێ وه‌لاتی و بارێ ئێزدیان؟!
شنگال و ئێزدی پرۆژێن كاره‌ساتان و ده‌رده‌سه‌ریانن ب درێژیا دیرۆكێ و هه‌كه به‌رێ كه‌سێ خوه ل وان نه‌دكره خودان و ب ده‌هان هه‌زار ژن و كچ وخورت و مال و حالێ وان دبرن و تالان دكرن و كڕین و فرۆتن پێ دكرن هه‌ر بگره ژ فه‌رمانێن فه‌ریق پاشا و میرێ كۆره و نادر شاهێ عه‌جه‌م و ئیتاخێ توركی و هه‌تا دگه‌هیته فه‌رمانا گرعزێر و سیبا شێخدرێ و ڤێ فه‌رمانا داعشا ب ناڤێ ده‌وله‌تا ئیسلامیا ئیراقێ و شامێ كو هاتیه چێكرن ژ لایێ زلهێز و كاپیتالزما خوه ب سه‌ر هه‌می جیهانێ دا گرتی و ب دلێ خوه نه‌خشێ جیهانێ ب خوینا هه‌ژار و به‌لنگازان وێنه دكه و ل گۆر به‌رژه‌وه‌ندیێن خوه یێن نه‌ته‌وی و ب رێیا دارده‌ست و دووڤه‌لانكێن خوه ملله‌ت و وه‌لاتفرۆشێن خوێنمژێن دیرۆكیێن ده‌ڤه‌رێ و جیهانێ كو ئالۆزی و كێشان و شه‌ڕ و مالوێرانیان په‌یدا دكه‌ت و سه‌رپه‌رشتیا وان دكه‌ت و سوته‌مه‌نی و قوربانی هه‌ر ملله‌تێن بنده‌ست و نڤستینه و بلا ئه‌و هه‌ڤ بكوژن و ئاواره ببن و چه‌ك و ته‌قه‌مه‌نی و كارگه‌هێن كاپیتالزمێ كاربكه‌ن ب خوینا ملله‌تێن بێ تاوان و ده‌مێ شه‌ڕان په‌یدا كه‌ن هه‌ردو لایان هان دده‌ن و پشته‌ڤانیێ دكه‌ن داكو شه‌ڕێ به‌رده‌وامبه و ڤێ جارێ بارێ گران كه‌فته سه‌ر لاوازترین ملله‌ت كو ئێزدینه و نێزیكی (400-500) هه‌زار ئێزدی ئاواره‌بوون و كوردستانێ دل و ده‌روون و مال و مزكه‌فتێن خوه بۆ وان ڤه‌كرن و ب هه‌می جۆرێن هاریكاریێ و پێشوازیه‌كا دیرۆكی كو نه دهزرێن كه‌سی دا بوو و هنده‌ك ژ ئێش و ئازارێن وان كێمكرن سه‌ره‌رای كو به‌ری وان برایێن رۆژئاڤا ئاواره ببوون و ژ بلی برایێن زۆر به‌رێز ژ عه‌ره‌ب و توركمانان هاتبوونه كوردستانێ وه‌ك ئاواره و باره‌كێ وه‌سا گران كو نه د شیانێن مه‌زنترین ده‌وله‌ت دا بوو پَشوازیا وێ ژمارا مه‌زن بكه‌ت و مه‌به‌ستا مه هێشتا ئازارێن وان ئاواران دبه‌رده‌وامن د كه‌مپ و هه‌یكه‌لێن ئاڤاهیان دا و ئه‌ڤه نێزیكی پتر ژ هه‌یڤه‌كێ یه ئازۆقه نه‌داینێ و هنده‌كان ل مه‌لیۆنان ئاواره‌یێ نه‌وه‌رگرتیه و دباره‌كی زۆر ئالۆز دا دژین ژ بلی كولا مه‌زن و گران كو ب هه‌زاران كه‌چ و ژن و لاوێن ئێزدیان دده‌ستێن داعشدانه و كڕین و فرۆتنێ ل ده‌وله‌تێن برایێن مه یێن عه‌ره‌ب ب وان دكه‌ن و چو ئاسۆیێن دیار و ڕۆن و چاره‌نڤیسێ دیار نینه، له‌وما زۆربه‌ی ئێزدییان به‌رێ وان یێ ل چوونا ده‌رڤه‌ی وه‌لاتیه و وه‌كی مارێ دار ب سه‌ری كه‌فتی هه‌می رێك ل به‌ر وان به‌رزه بووینه ژ بلی وانێن مفادار و خوه دكه‌نه پێشره‌و و مه‌زن و سه‌رۆك ورۆژانه ل سه‌ر شاشێن كه‌نالان دده‌نه حره‌حرێ و كۆنگرا گرێدده‌ن و سیمیناران دگێرن، لێ مخابن باوه‌ریا خه‌لكێ ب كه‌سێ نه‌مایه و ب دیتنا مه هه‌كه له‌زه‌ك نه‌ئێته‌كرن ب رزگاركرنا شنگالێ و تله‌عفه‌رێ كو زۆربه‌ی كچ و ژنێن ئێزدیان تێدا دگرتینه و شنگال نه‌ئێته پاراستن و ئاڤاكرن و قه‌ره‌بووكرن و نه‌ئێنه ب سه‌ر كوردستانیِ ڤه و ئێزدی خوه بكریار و د جهێ بریارێ دا نه‌بینن ئێدی باوه‌وریا خه‌لكێ نائێت و خوه د چو چارچووڤان دا نابینن.
