شه‌ڕێ هه‌ڤپه‌یمانان و داعش. . پرس و بۆچوون و ترسه‌ك!!
به‌یانناما هه‌ڤپه‌یمانیا شێست ده‌وله‌تی دوپات دكه‌ت كو”ئه‌م یێن هه‌وڵا راگرتنا پێشڤه‌چوونا رێخستنا ده‌وله‌تا ئیسلامی ل سووریێ و ئیراقێ دده‌ین”، “وه‌زیر ل سه‌ر ستراتیژه‌یه‌كێ كو ژ شه‌ش ته‌وه‌ران پێكدهێت رێككه‌فتن” كو ئه‌و ژی ئه‌ڤه‌نه، زێده‌كرنا كار و ئه‌ركێن له‌شكری، راگرتنا هاتنه ژۆرا شه‌ركه‌رێن بیانی، ب ڕینا رێیێن پاره‌پێدان و پشته‌ڤانیكرنێ و چاره‌سه‌ركرنا گرفتا هاریكاریێن مرۆڤاتی و ژبه‌ركرنا كراسێ شه‌رعیه‌تێ ژ رێخستنا داعش یا كو هۆیێن په‌یوه‌ندیا جڤاكی ب ئاوایه‌كێ كاڕا بكاردئینیت، ئه‌ڤه نووترین به‌یاناما هه‌ڤپه‌یمانانه ل سه‌ر ره‌وشا شه‌ڕێ دژبه‌ری داعش.
له‌وڕا ژی گه‌له‌ك پرسیار ل جه‌م من په‌یدابووین ل دۆر ده‌ركه‌فتن و گه‌شه‌كرن و هاتنا داعشێ بۆ سووریێ و عیراقێ، ئه‌رێ ب راست ژ ناڤبرنا داعش نه یا ساناهیه و پێدڤی ب هه‌ڤپه‌یمانیه‌كا زێده‌تر ژ (60) ده‌وله‌تان هه‌یه؟ ئه‌رێ ئارمانجێ هه‌ڤپه‌یمانیا نێڤده‌ولی ژناڤبرنا داعشه یان ئامانجه‌كێ دن هه‌یه؟ ئه‌رێ ژێده‌رێن بده‌ست ئێخستنا جبه‌خانه و چه‌كێ داعش كینه؟ ئه‌رێ چما چه‌ك و جبه‌خانه دگه‌هته ده‌ستێ داعش! و ژ بۆ پێشمه‌رگه‌ی نه چه‌ك و نه جبه‌خانه دهێته دابینكرن و دڤێت بۆ وێ ئێكێ ئه‌رد و ئاسامان رازی بن؟
ل دۆر پرسا ئێكێ ده‌ما بریتانیا و فه‌ره‌نسا و ئیمارات و سعوودیه و ئیران و دگه‌ل زێده‌تر ژ (50) ده‌وله‌تێن دی ب هه‌ڤ دگه‌هن و كۆم دبن بۆ شه‌ڕی ل دژی ده‌وله‌ته‌كێ كو نه چه‌كێ ئه‌توومی و نه فڕوكه‌یێن ب فرۆكه‌ڤان یان بێ فرۆكه‌ڤان نینه و نه ژی مۆشه‌كێن ژ قه‌باره و دوور هاڤێژ هه‌ین، ب تنێ رامانا ئێك ژ ڤان دو ده‌سته‌واژه‌یان هه‌یه، یان ئه‌ڤ هه‌ڤپه‌یمانیه یا لاوازه و نه یا رژده، یان ژی داعش (ده‌وله‌تا ئیسلامی) یا كو شه‌ڕێ وێ دكه‌ن (هێزه‌كا زه‌به‌ڵاحه) و ناهێته دوڕاندن!!. كو ئه‌ڤه ژی به‌ڵگه‌هه‌كه ل سه‌ر لاوازیا ته‌خمنیكرنێ و تێكه‌لكرنا كارگێرییا ئۆبامای! هه‌ر وه‌كو “لیۆن بانیتا” سه‌روَكێ به‌رێ یێ ئاژانسا هه‌والگیریا نه‌ته‌وه‌یا ئه‌مریكا بۆ CNN گۆتی” سه‌رۆك ئوبامای چه‌ندین شاشی د هه‌وا خوه یا دژی داعشێ دا كرن!!.
ده‌رباره‌ی ئامانجێ هه‌ڤپه‌یمانیا نێڤده‌ولی ب سه‌رۆكاتیا ئه‌مریكا ژی، ب دیتنا من گه‌له‌ك ژ ده‌وله‌تێن عه‌ره‌بی یێن كو چووینه د ناڤ هه‌ڤپه‌یمانیێ دا، نه ب مه‌ره‌ما شه‌ڕكرن و ژ ناڤبرنا داعش چووینه د هه‌ڤپه‌یمانیێ دا، لێ ب مه‌ره‌م و ئامانجێ شه‌ركرن و هه‌ڕفاندنا رژێما به‌شار ئه‌سه‌دی بووینه به‌شه‌ك ژ هه‌ڤپه‌یمانیێ هه‌ر بۆ میناك (سعودیه، ئیمارات، قه‌ته‌ر)، له‌وڕا ژی ژناڤبرنا داعشێ دێ یا دۆمدرێژ بیت هه‌تا بهێته ژناڤبرن، چونكو ئامانجێن ئه‌ندامێن هه‌ڤپه‌یمانیێ نه ئێكن و د جودانه. سه‌باره‌ت هه‌بوونا چه‌ك و جبه‌خانه یا داعش و پێنه‌دانا چه‌كی و ته‌گه‌ره خستنه سه‌ر پێدانا چه‌كی ب هێزێن پێشمه‌رگێ كوردستانێ، كو شه‌ڕێ داعش دكه‌ت و پێشڤه‌چوون ب ده‌ست ئێخستینه، ده‌ما مروَڤ ته‌ماشه دكه‌ت ب تنێ پشته‌ڤانیا ئاسمانی یا هێزێن پێشمه‌رگه‌ی هاتییه كرن و چه‌كه‌كێ وه‌ها نه گه‌هشتییه ده‌ست هێزێن پێشمه‌رگه‌ی، كو بشێێت هه‌ڤكێشه‌یێ به‌روڤاژی بكه‌ت، سه‌رباری ئه‌و سه‌ركه‌فتنێن ب ده‌ستڤه ئیناین، ل ده‌ڤه‌ر و جهێن جودا، هه‌ر وه‌كو “مه‌سرۆر بارزانی”راوێژكارێ ئاژانسا پاراستن و ئاسایشا هه‌رێما كوردستانێ بۆ پێگه‌هێ bloombergview راگه‌هاندی: “كو سه‌رباری 90% ژ شه‌ڕێ دژی ده‌وله‌تا ئیسلامی(داعش) پێشمه‌رگه‌یه دكه‌ت هه‌یا نها كێمتر 10% چ چه‌ك و جبه‌خانه گه‌هشتییه ده‌ستێ پێشمه‌رگه‌ی” كو ئه‌ڤه ژی پرسه‌كا مه‌زن دروست دكه‌ت!! ئه‌رێ چما چه‌ك ب پێشمه‌رگه‌ی ناهێته‌دان؟ ئه‌رێ چاوا جبه‌خانه و پێدڤیێن هێزا راستینه یا ئێكانه كو دژبه‌ری داعش شه‌ری دكه‌ت ناهێته دابینكرن!!.
ئه‌وا گرێدایی ب ژێده‌رێن ده‌ستخستنا جبه‌خانه و چه‌كێ داعشێ ژی، ل گوڕ راپۆرتێن ده‌زگه‌ه و ئاژانسێن هه‌والگیری یێن له‌شكری و مه‌دیایێن جیهانی، وه‌ها دیار دكه‌ن، كو به‌هرا پترا ئه‌و چه‌كێ بۆ حوكمه‌تا عیراق و ئۆپۆزسیۆنا سووریێ هاتیه ره‌وانه‌كرن داكو شه‌ڕێ داعش بكه‌ن كه‌تیه د ده‌ستێ داعشێ دا، زێده‌باری پاڵپشتی یا چه‌ند ده‌وه‌له‌تێن هه‌رێمی و عه‌ره‌بی بۆ داعش و ل به‌ر چاڤێ (ئه‌مریكا) و بێده‌نگیا وێ كو سه‌ركێشا هه‌ڤپه‌یمانیێ یه جهێ گومانه‌كا مه‌زنه، ل سه‌ر ڤی شه‌ڕی، یان ژی ئه‌ڤه ئه‌و سیاسه‌تا دولایه‌نه‌یه كو ناهێلیت چ لایه‌نێن هه‌ڤڕكیێ لاواز ببن، مه‌ره‌م ژێ ب رێڤه‌به‌رنا شه‌ره‌كێ دۆمدرێژه ل رۆژهه‌لاتا ناڤین!.
ترسا مه‌زن ژی ئه‌وه كو چاره‌نڤیسێ ڤێ هه‌ڤپه‌یمانیا شێست ده‌وله‌تی ژی وه‌كو رێكخراوا هه‌ڤالێن سووریێ ژێ بهێت كو ل ده‌ستپێكێ به‌ریا چار ساڵان ژ (150) ده‌وله‌تان ل تونس هاته پێكئینان و به‌ری چه‌نده‌كێ ل سه‌ر ئاستێ (هنارتی) مه‌ندۆبان ل له‌نده‌ن كۆمبوون ب تنێ (11) ده‌وله‌ت ژ وان سه‌د و پێنجهان مابوون!!!
