شۆڕشا گولانا پێشكەفتنخواز هێڤێنێ دەستكەفتێن ئەڤرۆيە
شەمال ئاكرەیی
د دیرۆكا مللەتێ مە یێ كورد دا، ڕۆژ هەنە كو نە ب تنێ وەرچەرخانەكا سیاسی بوون، بەلكو بوونە سیمبۆلێن ڕاست و زیندی یا ئیرادەیا گەلەكێ ستەملێكری. ٢٦ی گولانا ١٩٧٦ێ، ئەو ویستگەهێ دیرۆكێ یێ مەزن بوو كو تێدا شۆڕشا گولانا پێشكەفتنخواز وەك بەرسڤەكا توند و پێشەنگ ل دژی پیلانێن نێڤدەولەتی و ڕێككەفتنامەیا شۆم یا جەزائیرێ سەرهلدا. د ڤێ بیرەوەرییا پیرۆز دا، سەرێ ڕێز و نەوازشێ بۆ كاروانێ درێژ یێ شەهیدێن ڕێكا ڕزگارییا كوردستانێ و ب تایبەتی شەهیدێن قەهرەمانێن شۆڕشا گولانێ نزم دكەین، كو ب خوینا خۆ یا پاقژ ڕێكا ئازادیێ بۆ مە ڕۆهنكرن. ل سەرێ ڤی كاروانی، بیرئانینا ڕێبەر و سەركێشێ نەتەوەیی، بارزانیێ نەمر، ب زیندی ونەمری دكەین كو رێباز و قوتابخانەیا وی یا خەباتێ چ جاران خۆ نەچەماندییە.
ب ڤێ هەلكەفتا مەزن، گەرمترین پیرۆزباهییان ئاراستەی سەركردایەتییا سیاسی یا شۆڕشگێڕ و ب تایبەتی سەرۆك مەسعود بارزانی دكەین كو ب حیكمەت و خۆڕاگرییا خۆ شییا ڤێ پاپۆڕا خەباتێ د ناڤ گێژەلووكێن توند یێن دەڤەرێ دا بەر ب كنارێ ئارامیێ ڤە ببەت. دیسان سلاڤێن ئەمەگداری و وەفاداریێ بۆ هێزێن پێشمەرگەیێن قەهرەمان و بەرگرییا مللی یا خۆڕاگر دنێرین، ئەوێن كو د سەختترین قۆناغان دا بوونە قەلغان ل دژی پیلان و هێرشێن دوژمنان.
شۆڕشا گولانێ ب تنێ بزاڤەكا چەكداری نەبوو، بەلكو داستانا خۆڕاگرییا مللەتەكێ بوو كو دوژمن و دویڤەلانكێن وان وەسا هزر دكر كو ب پیلان و بكارئینانا كێمیاباران، ئەنفالێن ڕەش، كوشتن، بڕین و زیندانان دێ شێن دویماهیێ ب دۆزا ڕەوا یا كوردی بینن. بەلێ، ئیرادەیا پیلایی یا گەلێ مە د ناڤ ئاگرێ ئەنفال و كیمیابارانێ دا ب هێزتر لێ هات. داستانێن قەهرەمانیێ یێن پێشمەرگەی د شۆڕشا گولانێ دا سەلماند كو چ چەكێن كۆمكوژ نەشێن دەنگێ حەقیێ بێدەنگ بكەن. ئەڤ خەبات و قوربانیدانە ب هەرهوو نەچوون؛ دروستبوونا ئەڤڕۆیا مە ژ ئەنجامێ وێ خۆڕاگری و خەباتا ماندینەناس و پێشمەرگەیێن شۆڕشێن مللەتێ مە یە كو شۆڕشا گولانێ ئێك ژ دیارترین وان شۆڕشایە كو ڕێك بۆ تەقینا ڤولكانا غەزەبا گەلێ د سەرهلدانا مەزن یا ئادارا ١٩٩١ێ دا خۆشكر. سەرهلدانێ، بەند و زنجیرێن زۆرداریێ تێكشكاندن و قویناغەكا نوی د دیرۆكا مە دا پەیداكر. بەرهەمێ بەرچاڤ یێ ڤێ خەباتێ، ئاڤاكرنا دامودەزگەهێن شەرعی و دەستكەفتێن دیرۆكی بوون وەكی دامەزراندنا پەرلەمان و حكومەتا هەرێما كوردستانێ.
د ڤان سالێن بۆری دا، زێدەباری هەمی ئاستەنگ و پیلانێن بەردەوام، هەرێما كوردستانێ شیا ب هیممەتا گەل و دڵسۆزییا سەركردایەتییا خۆ، خۆ وەك قەوارەكێ گەش، ئارام و فرە ڕەنگ ب سەلمینیت. ئەڤرۆ كوردستان شیایە ببیتە ناڤەندەكا پێشكەفتی، ئاڤەدان و دیموكرات ل سەر ئاستێ ڕۆژهەلاتا ناڤەراست و پەناگەهەك بۆ پێكڤەژیانا ئاشتییانە یا هەمی پێكهاتە و ئایینان. ئەركێ مە یێ ئەڤرۆ، پاراستنا ڤان دەستكەفتان و درێژیپیدانە ب ڕێبازا پیرۆز یا شۆڕشا گولانێ، بۆ ئاڤاكرنا پاشەڕۆژەكا گەشتر بۆ نفشێن داهاتی.
