شۆڕەشا 26ی گولانێ هەم ئومێد زڤڕاند و هەم ئارمانج بجهئینان
دیدار، سالار محه‌مه‌د دۆسكی:
پێشمەرگەكێ شۆڕەشا گولانێ ئاشكراكر، كو ئەگەر پێشمەرگە نەبا رەنگە ئەو پێشڤەچوون و گەرماتییا دناڤا خەلكێ كوردستانێ دا و د ناڤ جەرگێ دوژمنی دا دروست نەدبوو، لەوما شۆڕەشا 26ی گولانێ هەم ئومێد زڤڕاند و هەم ئارمانج بجهئینان.
فەرج میرزا خدر، پێشمەرگێ شۆڕەشا گولانا پێشكەفتن خواز و كادرێ پێشكەفتیێ پارتی دیموكراتی كوردستان، بۆ رۆژناما ئەڤرۆ گۆت: وەك هەر گەنجەكی دەمێ مە دیتی وەلاتێ مەیێ داگیركریە، وی دەمی قوتابیێ دواناڤنجیا شێخان بووم، ل رێككەفتی 25/ 9 / 1981 مە پەیوەندی ب رێزێن پارتی دیموكراتی كوردستان كر، هێلا مەتین مەبوو، پشتی رێكخستنێن مە گەلەك زێدەبووین مە رێكخراوا هیڤی دامەزراندن لژنا ناوچا شێخان و بوومە ئەندامێ رێكخراوێ و سالا 1984ێ وی دەمی قوتابیێ كولیژا یاسایێ بووم ل زانكۆیا مووسل، رێكخستنا مە ئاشكرا بوو و مە قەستا رێزێن پێشمەرگەی كر و نەشیان مە دەستە سەركرن.
فەرج میرزا گۆتژی: وی دەمی دەنگۆباسێن ئێزگێ كوردستانێ هەبوون و هەر شەڤ مە گوهداری دكر و هەر دەنگۆباس و چالاكیەكا پێشمەرگەی هەبا رۆژا دووڤ دا مە بۆ گەنج و لاوان دگۆتن و بەلاڤەدكرن وەك هشیارەكی و مورالا خەلكی بلند بوو، دیسا مە بەلاڤۆك دناڤ شۆڕەشێ دهاتن مە رادەستی هەڤالێن رێكخستی دكر، دو مامۆستا من هەبوون جهێ باوەریێ بوون دەمێ بەلاڤوكێن خوە مە بەلاڤەدكرن من دا هەر دو مامۆستایێن خوە ژی و دووماهیێ مە گۆتێ ب سوژە، پوستەر و بەیان دهاتنە بەلاڤەكرن ل كومەلگەها مەتێ و شێخان مە بەلاڤەدكر، وی دەمی مە نارنجوكێن دەستی هەبوون و گەلەك مورالا مە یا بلند بوو و ئەو نارنجوكێن دەستی بۆ هەر تەنگاڤیەكێ بوون، ل دەمێ بەلاڤەكرنا بەلاڤۆكان كو ل دیوارێن قوتابخانا و فەرمانگەهان مە دا و هەر دەمێ بكەڤینە مەترسیەكێ ب ئەووان نارنجوكێن دەستی خوە قورتال بكەین.
فەرج میرزا گۆتژی: دەمێ بەلاڤووك ب شەڤ مە ل دیوران دا، ل دانێ سپێدێ هەموو خەلك دا بەحسێ پێشمەرگەی كەن و دا بێژن شڤێدی هاتبوون، كەیفا مە گەلەك دهات و هێزێن ئەمنێ ئەو بەلاڤووك ژێڤەدكرن و هاتن و چوون وی دەمی ئەم گەلەك د لخووش بووین د جەرگێ دوژمنی دا ئەوان كاران بكەین.
فەرجەی ئەو ژی گۆت: دناڤا رێكخستیێن مە دا مە ئافرەت هەبوو یا رێكخستی بوو ل گەل مە و ئەو ئافرەت پەرستیار بوو ل كومەلگەهێ و ئەوێ ئافرەتێ دەرمان ژ نەخوشخانێ بوومە دئینان و مە دگەهاندنە پێشمەرگەی و كچەكا گەلەك زیرەك بوو.
هێشتا گۆت: ئەگەرێ ئاشكرابوونا شانا مە ئەو بوو مە گەلەك بەلاڤووك بەلاڤەكربوون و هەڤالەك من هەبوو بناڤێ (وەیسی شەمۆ) و مرادا مە ئەو بوو هندەك بەلاڤووكا ل دیوارێن ئاڤاهیێ حیزبێ بدەین و پێشتر مە پرسیار كربوو زێرەڤانیێ چەوا دگرن و پشتی مە بەلاڤووك هلاویستین ئەم ئاشكرابووین و مە خوە چەندین رۆژا بەرزەكر و دووڤ دا هاتنە من ل زانكۆیێ و پشتی هاتیمە ئاگەهداركرن ژلایێ هندەك هەڤالان ڤە، كو هێزێن ئەمنێ هاتنە بوو دەستەسەركرنا من، من خوە قورتالكر و گەهشتمە ناڤ هێزێن پێشمەرگێ كوردستانێ.
فەرج میرزا، پێشمەرگەیێ شۆڕەشا گولانێ گۆتژی: پشتی گەهشتیمە ناڤ رێزێن پێشمەرگەی بوورینا 20 رۆژان ل كەمینەكێ ل گوندێ دێركێ ئەز بریندار بووم و هەڤالەكێ من شەهید بوو و دەمێ دهاتینە دەستیردانا ئەم دكەفتیێ، ل داستانا دێرەلوكێ مە پشكداری كر وی دەمی كارگێریێ قوتابیان بووم و زێدەتر كارێ مە یێ كارگێری و جەماوەری بوو لقێ ئێك، مە چالاكییەك ل بێسرێ ل سالا 1988 ل گەل خودێ ژێ رازی ئەحمەد تەلوەی و شێخ عەلو ئەنجامدا.
فەرج میرزا گۆتژی: شۆڕەشا گولانێ تەمامكەرا شۆڕەشا ئەیلولێ یە بەلێ ب هندەك تەكنیكێن جوداتر، شۆڕەشا ئەیلول دەزگەهێ لەشكری و رێكخراو و حزب ژێك جودابوون و زێدەتر هێزا لەشكری یا سەردەست بوو، دەمێ نەكسا 1975ێ دروست بووی، قیادا بەروەخت هەمی بزافكرن دكرن چ كێماسیەك ل شۆڕەشا ئەیلولێ هەبوویە ل شورەشا گولانێ نەمینن، ل شۆڕەشا گولانێ بۆ ئێك كیان و ئەڤە بوو ئەگەر هەڤڕكی دروست نەبیت، شۆڕەشا ئەیلول شەڕێ سەنگەران بوو ل شۆڕەشا گولانێ بۆ شەڕێ پارتی زانی، پشتی 1975ێ خەلكێ مە تووشی بێ ئومێدیەكا گەلەك مەزن بوو، شۆڕەشا گولانێ هێدی هێدی گەش بوو هەتا ل سەرهلدانێ ئەم و جەماوەرێ خوە گەهشتینە ئێك و شۆڕەشا گولانێ سەركەفتنەكا مەزن ئێنا پشتەڤانیا پێشمەرگەی و هاریكاریا خەلكێ مە و جەماوەرێ دەڤەرێ، وەك پێشمەرگێ نەبتنێ بخوە هێز بووین، بەلكو گەنجان هوزان و گۆتار و شانوگەری و بزاڤێن رەوشەنبیری و هونەری دناف باژێران ئەنجامدان پشتەڤانیا مللەتێ خوە دكر و ئەگەر پێشمەرگە نەبا ئەو پێشڤەچوون و گەرماتی دناڤا خەلكی دا ل باژێران دناڤ جەرگێ دوژمنی دا نەبوو، شۆڕەشا گولانێ هەم ئومێد زڤراند و هەم ئارمانج بجهئینان.
