شیلتەرێ ئێكێ یێ كۆنترۆلكرنا 20 هزار سەیێن بەردای ل دهۆكێ دێ هێتە ڤەكرن
دهۆك، دلۆڤان ئاكرەیی:
دەڤەردارێ دهۆكێ دیاركر، هەمی بەرهەڤیێن شیلتەرێ دهۆكێ ب دووماهی هاتینە و د ڤێ حەفتیێ دا دێ هێتە ڤەكرن و گروپەكێ شارەزا بۆ گرتنا سەییان هاتیە پێكئینان، پشتی گرتنا وان، نەشتەرگەری دێ بۆ هێتە كرن و پاشی دێ هێنە بەردان و دبێژیت: نوكە نێزیكی 20 هزار سەیێن بەردای د پارێزگەهێ دا هەنە، ئەڤ چەندە ژی دێ بیتە ئەگەرێ فشارەكا مەزن ل سەر شیلتەری.
بریندار حەیدەر، دەڤەردارێ دهۆكێ بۆ رۆژنامەیا ئەڤرۆ گۆت: «یا ب سەناهی نینە هەمی سەیێن د ناڤ سەنتەرێن باژێڕ و باژێڕكان دا ب وێ لەزاتیێ بهێنە كۆنترۆلكرن، بەلكو نێزیكی شەش مەهان پێدڤی نەن داكو كارتێكرنا ڤی پڕۆژەی و كێمبوونا سەیان ل سەر جادەیان دیار ببیت، ل قووناغا ئێكێ، سە ل دویڤ رەوشا وان یا ساخلەمیێ، نەخۆشیێ و ئاڤسیێ دێ هێنە پۆلێنكرن و د جهێن جودا دا هێنە دانان، هەروەسا نۆشدارێن ڤێتێرنەری و كارمەندێن شارەزا بۆ چارەسەری و نەشتەرگەریا سەیان هاتینە دابینكرن».
گۆت ژی: «ئەڤ پڕۆژەیە شیلتەرێ ئێكێ یە ل سەر ئاستێ پارێزگەهێ، ب گوژمێ 323 ملیۆن دیناران ل سەر بودجەیا پارێزگەها دهۆكێ و لسەر رووبەرێ 11 هزار مەترێن چارگۆشە هاتیە چێكرن».
