شێروان بشار: ده‌ست ژ كاركێشانا كارگێریێ ژبه‌ر نه‌بوونا پشته‌ڤانیێ بوو
ئه‌ڤرۆ،
ب شێوه‌كێ فه‌رمی ده‌سته‌یا كارگێریا یانا گاره یا وه‌رزشی ده‌ست ژ كاركێشانا خوه پێشكێشی سه‌رۆكێ یانێ كر د كۆمبوونا خوه یا ڤێ دووماهیێ دا ئه‌وێن ل 24ێ هه‌یڤا چڕیا ئێكێ یا سالا 2021ێ د پرۆسیه‌یا هه‌لبژارتنان دا هاتینه ده‌ستنیشانكرن بۆ كارگێریا نوو.
لدور ڤێ یه‌كێ د داخویانیه‌كا تایبه‌ت دا شێروان بشار سه‌رۆكێ یانا گاره بۆ رۆژناما ئه‌ڤرۆ گوت: د كۆمبوونا ئاسایی یا شه‌مبیا بوری دا هه‌ر ئێك ژ یونس مه‌جید چێگرێ سه‌رۆكی، نیهاد ئیبراهیم سكرتێرێ یانێ، فریبا ئازاد ئه‌میندارا دارایی و هه‌رسێ ئه‌ندام لازم بشار، كاروان عه‌بدوللا، نه‌وزاد حاجی و هه‌روه‌سان خالد موسا سه‌رپه‌رشتێ تیما ته‌پا پێی ده‌ست ژ كاركێشانێن خوه ب شێوێ جودا پێشكێشی من كرن وه‌كو هه‌لوه‌سته‌ك ل سه‌ر كاودانێن خراب یێن بارێ دارایی یێ لاواز، من قه‌بول نه‌كریه ژبه‌ركو دێ ل گه‌ل لایه‌نێن په‌یوه‌ندیدار گه‌نگه‌شێ كه‌م ژبۆ رێكه چاره‌یه‌كێ ژبۆ بڕیارا دووماهیێ.
هه‌روه‌سا ناڤهاتی گۆت: هه‌ر ژ ده‌ستپێكا ده‌ست ب كاربوونا ده‌سته‌یا نوو یا كارگێریا یانێ ره‌وشا دارایی یا خراب گڤاشتنێن مه‌زن ل سه‌ر كار و چالاكیێن مه كرینه و د شیان دا نه‌بوو گه‌له‌ك پێدڤیێن كادرێ راهێنانێ و تیمێ و یاریزانا په‌یدا بكه‌ین، دیسان نه‌بوونا پشته‌ڤانیێ ئه‌گه‌ره‌كێ دی یێ نه چاره‌سه‌ركرنا ئه‌ڤان ئاریشا بوو ئه‌گه‌ربوو ئه‌نجامێن تیمێن مه د خولا پلا ئێك و فۆتسالا كچان یا كوردستانێ دا لاواز بن، زێده‌باری نه داپه‌روه‌ری د دابه‌شكرنا سولفا هه‌یڤانه یا دهێته دان بۆ یانا مه و ئه‌ڤه ژی جهێ دلگرانیێ یه.
لدووماهیێ شێروان بشاری دیاركر كو هه‌ر ژ رۆژا ئه‌و بوویه سه‌رۆكێ یانا گاره ب هه‌موو شیانێن خوه بزاڤ كریه یانا گاره ببیته تیمه‌كا بهێز و نوونه‌ره‌كا سه‌ركه‌فتی یا پارێزگه‌ها دهۆكێ د هه‌ر قاره‌مانیه‌كێ دا و گرنگی ب یاریزانێن گه‌نج و لاو یێن پارێزگه‌هێ دایه و نه‌هێلایه ده‌رگه‌هێ یانێ بهێته گرتن و مه‌زاختیه‌كێ مه‌زن ژ كیستێ خوه بۆ یانێ دابینكریه پێخه‌مه‌ت چالاكی به‌رده‌وامن و هیڤی خواست به‌رپرسێن وه‌رزشی و پارێزگارێ دهۆكێ ب یه‌كسانی پشته‌ڤانیا هه‌موو یانا بكه‌ن ژبۆ پێشڤه‌چوونا وه‌رزشا پارێزگه‌هێ.
