شەرم.. دێوێ هەبوونێ
دلدار محەمەد
شەرم ژ بابێ خۆ دكر..
ژ دایكا خۆ دكر..
بەری ب زانیت شەرم چیە!
هەرجارەكا تەماشەی ناسنامەیا خۆ دكر
شەرم دكر كو ئەو هەی و نەیی.
هەكو مامۆستا دهاتە د ژۆرا پۆلێ ڤە ڤەلەرزكا شەرمێ و ترسێ دبوو ئاوێتە و لەشێ وی د خۆدا نقۆم دكر، سال ل پشتا بابەلیسكا دەمی سواربوون، خۆ ل هنداڤی لاندكا كوڕێ خۆ دیت، بێی دەستێ خۆ، خۆ لبەر پیێن دەمی بوهژی دیت.
ب شەڤ، دناڤ بێدەنگیێ دا شەرم دكر. ل ئێڤاری دناڤ پێلێن هۆسێ دا شەرم دكر
شەرم..
شەرم..
شەرم..
شەرم دێوەكێ مەزن بوو، ژیێ وی د خوار، هەكو ڤێ سپێدێ مویێن سەرێ خۆ یێ سپی ل بەر خۆدیكێ دیتین
شەرما وی هەر مەزن بوو، هەر مەزن بوو، هەتا هەمی شەرمێن ژیێ وی هاتینە بەر سیبەرا وێ..
دوهی ئێڤاری، ل وێ گۆرەپانێ، مایكەك درێژی بەر دەڤێ وی بوو:
– تۆ شەرم ژ كێ دكەی؟
– ژ خۆ.
هێشتا دەنگێ پێلێن كەنیێ یێ دگوهێن وی دا زڤرۆكان ڤەددەن، هەكو ڤەگەڕیایە مال جەمبلیلكێن شەرمێ
ب سیڤاندێن دیتنێن وی ڤە رێز ببوون..
چل سال بۆرین هێشتا ڕۆژێ ژی شەرم دكر ب هەلێت.
