شەر د ناڤبەرا پەکەکێ و سۆپایێ تورکیا دا ل گرێ بیێ روودا

ئەڤرۆ نیوز ، زنار تۆڤی:

ئەڤرۆ ئەینیێ 7.6.2019 و ل دەمژمێر 6 ئێڤاری پەکەکێ ھێرش کریە سەر سەربازگەھا تورکیا ل گرێ بیێ و بۆ ماوێ پتر ژ دەمژمێرەکێ رێیا دناڤبەرا ناحیا باتیفا بۆ کۆمەلگەھا بێگۆڤا و ناحیا کانی ماسێ ھاتبوو گرتن.

وەلاتیەک بناڤێ سوبحی ژ گوندێ گرێ بیێ یێ سەر ب ناحیا باتیفا ڤە بۆ ئەڤرۆ نیوز دیار کر: ئەڤرۆ ل دەمژمێر 6 ئێڤاری گەریلایێن پەکەکێ ب چەکێ میلانۆ و تۆپ و نیشانشکێنان ھێرش کریە سەر سەربازگەھێ تورکیا ل گرێ بیێ و وی شەری بۆ دەمێ دەمژمێرەکێ ڤەکێشا و ھەروەسا ژ ئەگەرێ وی شەری رێیا دناڤبەرا ناحیا باتیفا بۆ کۆمەلگەھا بێگۆڤا و ناحیا کانی ماسێ ھاتبوو گرتن و ھژمارەکا مەزن یا خەلکێ ل ھەردوو ئالیان نەشیان ھانوچوونێ بکەن.

ناڤھاتی زێدەتر گۆت: ھێزێن پەکەکێ ھژمارەکا تۆپان و دو میلانۆ ل سەربازگەھا تورکیا داینە و ئاگرەکێ مەزن بەردایە سەربازگەھا وان و ل گور زانیاریێن وان ھندەک ترۆمبێلێن سەربازی ھاتینە سۆتن، دیسا لەشکرێ تورکیا بەرسڤا ھێرشێن پەکەکێ دایە و ھەروەسا ژ ئەنجامێ ڤی شەری چو زیان نەگەھشتینە گوندێ وان، لێ ل دەمێ پەیدابوونا وی شەری شۆفێرەکێ خەلکێ کۆمەلگەھا بێگۆڤا ڤیایە خوە زوو ژناڤا وی شەری قورتال بکەت، لێ ترۆمبێلا وی وەرگەریایە و د ئەنجامدا ژنەک ب گرانی برینداربوویە و ھاتیە ڤەگۆھاستن بۆ نەخۆشخانا تەنگاڤیا ل زاخۆ.

پاشی ل دەمژمێر 8 شەڤێ فرۆکێن شەرکەر یێن سۆپایێ تورکیا ب دژواری ئەو چیایێ ل ھنداڤ گرێ بیێ و دەردورێن وی گوندی بوردومانکرینە.

کۆمێنتا تە