شەش هزار ئێكەمێن كوردستانێ نەهاتینە دامەزراندن
هەولێر، قائید میرۆ
بریكارێ وەزارەتا خواندنا بلند و ڤەكۆلینێن زانستی ئاشكراكر، هەتا نوكە شەش هزار ئێكەمێن سەر ئاستێ هەرێما كوردستانێ نەهاتینە دامەزراندن و ژبەر قەیرانا دارایی دامەزراندنا وان ل سالا 2018ێ وەرە هاتیە راگرتن. گۆت ژی، بەردەوام داخوازی هەنە بۆ ڤەكرنا زانكۆیێن ئەهلی و چەندین داخوازی بۆ ڤەكرنا زانكۆیان گەهشتینە وەزارەتا خواندنا بلند، بەلێ ل گورەی پێدڤی و هەبوونا مەرج و رێنمایێن زانستی بڕیار ل سەر ڤەكرنا زانكۆیان دهێتە دان.
دكتۆر عەبدولفەتاح عەبدولڕەزاق، بریكارێ وەزارەتا خواندنا بلند بۆ رۆژناما ئەڤرۆ دیار كر» سەرەڕای قەیرانی دارایی و شەڕێ داعش كو بوو ئەگەرێ راگرتنا پرۆسا دامەزراندنا فەرمانبەران حوكمەتا هەرێما كوردستانێ شیایە هەتا سالا 2017 سێ ئێكەمێن سەر ئاستێ زانكۆ پەیمانگەهێن هەرێما كوردستانێ دابمەزرینیت و دووماهی جار ل سالا 2017ێ زێدەتری دو هزار و 200 سێ ئێكەمێن زانكۆ پەیمانگەهان هاتینە دامەزراندن، بەلێ دەرچوویێن سالا 2018ێ هەتا نوكە نەهاتینە دامەزراندن و ئەڤە حەفت سالە دامەزراندن بۆ سێ ئێكەمان ژی هاتیە راگرتن، بێگومان ئەگەرێ راگرتنێ گرێدایی بابەتێ دارایی نە هەرێما كوردستانێ چەندین قەیراندا دەربازبوویە نەشیایە وەك سالێن سێ ئێكەمان ژی دابمەزرینیت، هەر سالا 2018 ێ هەتا نوكە زێدەتری شەش هزار دەرچوویێن زانكۆ پەیمانگەهان هەنە و نەهاتینە دامەزراندن ئەڤە تنێ ئەڤێن یێن پلا ئێكێ هەتا سیێ بدەستڤە ئینای، ئەم ژی دگەل ڤێ چەندێ ینە مافێ وان دەرچوویانە بهێنە دامەزراندن، ئەو فەرمانا ژلایێ مەسروور بارزانی سەرۆكێ حوكمەتا هەرێما كوردستانێ هاتیە دەركرن بۆ راسپاردنا لایەنێن پەیوەندیدار هەنە دگەل بەغدا دانوستانان بكەن، هەتا پارە بۆ دامەزراندنا سێ ئێكەمێن هەرێما كوردستانێ بهێتە تەرخان كرن و هەموو ئەو قوتابیێن لسەر ئاستێ زانكۆ پەیمانگەهان پلەیێن ئێكێ هەتا سیێ بدەستڤە ئینای بهێنە دامەزاندن.
ل دۆر ڤەكرنا زانكۆیان ژی دكتۆر عەبدولفەتاح عەبدولڕەزاق گۆت» زانكۆیا ئاكرێ و یا گەرمیان هاتینە ڤەكرن ئەڤە زانكۆیێن حوكمەتێ بوون، هەتا نوكە جهێن دی نینە زانكۆ تێدا بهێنە ڤەكرن، بەلێ بەردەوام داخوازی هەنە بۆ ڤەكرنا زانكۆیێن ئەهلی، وەزارەتا خواندنا بلند و ڤەكۆلینێن زانستی بەردەوام داخوازیێن ڤەكرنا زانكۆیان بۆ دهێن و ڤەكۆلین لسەر دهێتەكرن، هەر دەمێ پێدڤی بوو مەرج و رێنمایی تێدا هەبن دێ مۆلەت ب ڤەكرنا زانكۆیێن ئەهلی بهێتەدان، بڕیارا ڤەكرنا زانكۆیان ددەستهەلاتا سەرۆكایەتیا جڤاتا وەزیرانە و وەزارەتا خواندنا بلند تنێ پڕۆپۆزەلێن ڤەكرنا زانكۆیان وەر دگریت و دووڤچوونێ بۆ دكەت هەتا مەرج و رێنمایی تێدا هەبن.
