شەعبان سلێمان: نە مەرجە هەموو هەلبەستڤان حەز ژ ڤی ستایلی بكەن
سالار محەمەد دۆسكی:
هونەرمەند و هوزانڤان، شەعبان سلێمان، د دیدارەكێ دا ل گەل رۆژناما ئەڤرۆ بەحسێ نووترین شێوازێ هوزانا مێكس كر و گۆت: ل رۆژا 16/3/2024ل سەنتەرێ رەوشەنبیری سێمێلێ، من شێوازێ نوو یێ ب ناڤێ (مێكس هوزان) بۆ ئامادەبویان شرۆڤەكر و ب پراكتیك و دانوستاندنەكا باش ل سەر هاتەكرن، بۆ زانین ژ سالا2023 وەرە ئەز كاری ل سەر ڤی شێوازێ دكەم.
ناڤبری گۆت: پێكهاتەیا شێوازێ ستایل، ئانكو شێوازێ میكس ئەوێ من پشتی سیدی دیوان و كلیپ هوزان ودو قۆلیا ستران و هوزانێ پەیداكری، یێ پێكهاتیە ژ دەقەكێ هەلبەستێ كو پارچە یەك یان دو ژێ دهێنە ئاوازكرن دگەل ژەنینا ئامیرەكێ مۆزیكێ یان گرۆپەكی كو پێشەكیەكا مۆزیكێ هەیە، دیسان ناڤبرێن مۆزیكێ دناڤبەرا هەلبەستێ وگۆتنا پارچەیەكێ ب سترانكی وگرێدانا هەردویان ب پارچە ئاوازەكێ ل گۆر ڕتمەكا دەستنیشانكری كو تێكست ومۆزیك و خواندنا هەلبەستێ و ژەنینا ئاوازێ و گۆتنا سترانێ هەموو پێكڤە دبیتە ئێك پاكێج ب رەنگەكێ نوو دكەڤیتە بەر گوهـ و چاڤ و هەستێن وەرگری.
دەربارەی ئەو خالێن شێوازێ ستایل ژێ پێك دهێت، گۆت: ئەڤ شێوازە ب كەسەكێ هەلبەستڤان دگەل مۆزیكژەنەكی یان گرۆپەكێ مۆزیكژەنان دهێتە ب رێڤەبرن، چ ل تۆمارا ستودیویێ یان ل بەرنامەیەكێ رادیۆ یان تیڤی یێ یان ل سەر دەپێ شانویێ وەك ستایل و شێوازەكێ نوو میلۆدی پێشوەخت پارچەك ژ هەلبەستێ دهێتە ئاوازكرن بۆ گۆتنێ ب سترانكی ب سەلیقەكا گونجای دگەل ناڤەرۆكا هوزانێ.
(Bar) رێكخستنەكا مۆزیكێ یە دناڤبەرا ئاواز و ڕتما وێدا دگەل خواندنا هەلبەستێ وەك (Background)یان بۆ ڕتما پارچا سترانێ دناڤ هەلبەستێ دا،
(Break) بێهنڤەدانە دناڤبرێن مۆزیكێ دا بۆ دەمەكێ كورت كو ب زمانێ مۆزیكێ دبێژنێ(S) بۆ گرێدانا هوزانێ و سترانێ پێكڤە و رێكخستنا دەمێ ڕتما ئاوازێ.
(ڕتم) بەردەوامیا رێكخستن و دابەشكرنا دەمێ ئاوازێ یە ئەوا دگەل هەلبەستێ ل سەر دەمێ بارێن وێ كو خواندنا هەلبەستێ و گۆتنا پارچا هەلبەستێ یا سترانكی ل گور ڕتمێ دهێتە رێكخستن.
(Flow) هێلا گشتی یا رێڤەچونا هوزانێ و ئاوزێ و خواندنا هوزانێ وگۆتنا سترانێ دگەل ژەنینا مۆزیكێ وەك روبارەكی ئەو ژێدەر هەموو دهێنە سەر و پێكڤە درژێنە دەریا هوزانێ، ئەڤە ستایلەكێ نوو یە وهەر كەسێ ئەو شیان ژی ل دەف نە بن دشێت هەڤكاریێ دگەل ئاوازدانەرەكی بكەت بۆ پەیرەوكرنا ڤی ستایلی، دیسان دەمێ پێشكێشكرنێ مفای ژ مۆزیكژەنەكی وەربگریت زێدەباری ئەگەر پێدڤی بۆ سترانبێژەكی بكەتە هەڤكارێ خوە و نە مەرجە هەموو هەلبەستڤان حەز ژ ڤی ستایلی بكەن، لێ من ئافراندیە و ئەز دێ ل سەر ڤێ نوویاتیێ بەردەوام بم و ئەز هیڤیدارم ژ وان كەسێن دویڤ مەدا دهێن و زارڤەكرنا ڤی شێوازی دكەن وەكی ستایلێ من یێ كلیپكرنا هوزانێ شێواندنێ لێ نەكەن.
