شەڤ تەماشەڤانەكا بێ دەنگە
سوسمان عومەر ئەحمەد
ل ئەوێ ڕۆژا ڕەش و تاری، هەناسەیەكا بێ دەنگ ئەز ئارام كرم، خەونا من ملێن دەمژمێرێ ڕاوەستاندن، ژیانا من هەمی وەكی كورتە چیڕۆكەكێ هاتە پێشچاڤێن من، بێ هیڤیبوون تێدا دهاتە خۆیاكرین، بتنێ من هیڤیەك هەبوو بەلێ هیڤیا من بوو خەونەكا ب ترس و هەر شەڤ قەستا من دكر. دناڤ گۆرەپانا شەڕەنیخا خەونا خوەدا بووم، من دیت ئەز بەرەڤ كۆلانەكێ چووم ب ناڤێ (بێهیڤیبوون) هاتبوو بناڤكرین، دەنگێن مرۆڤان دناڤ دەرزێن دیواریڕا دهاتنە گوهێن من، ددەمەكێ دا ڕۆژێ خوە ل پشت هەیڤێ ڤەشارت داكو زیان ب تیشكێن ئەوێ نەكەڤیت، مرۆڤێن ئەوێ كۆلانێ هەمییان قەستا من كرین و ئەز مامە دنیڤا ئەوان دا، دۆرماندۆرێن من ب مرۆڤان هاتە داپوشین، هەر ئێكێ بۆچوونا خوە ژ دلەكێ بێ وژدان و ب دەنگەكێ بلند ل دۆر بێ هیڤیبوونێ دگۆت، وژدانا ئەوانا خوە ل بن دارا بێ وژدانێ بێدەنگ كربوو، ئێک ژ ئەوان دگۆت؛ دلێ تە پاییزەكا زەرە.. مادێ چاوا هیڤیێن تە بنە بهارەكا كەسك؟ ب ئەوێ گۆتنێ دلێ من دناڤ دەستێن خوە یێن ڕەش دا گڤاشتین هەتا خوین ژێ هشكبووی.
ددەمەکێ دا ئەز دناڤ خەونا خوەدا بەرزەبووم، ل سەر ڕێکا خوە من دیت ل سەر دەرگەهەکێ نڤیسیبوو (دەرگەهێ هیڤیان)! من قەستا دەرگەهێ هیڤیان كر و من دەرگەهـێ ئەوان قوتا، هیڤیان دەرگەهـ ل من ڤەكر، من گۆتە هیڤیان: هیڤێن من بدەنە من، ئەز دترسم هیڤیێن من دناڤ دەستێن هەوەدا بەرزەببن و ئەز ئێدی ئەوان نەبینم. هیڤیان گۆت: ژ مێژە هیڤیێن تە یێن دناڤ دەستێن نەمەردان دا بەرزەبووین.. تو یا گیروبووی، تو نزانی بارێ تە چەندێ گرانە، هەرە بەلكی هیڤیێن تە قەستا تە بكەن بەلێ هەتا ئەوێ ڕۆژێ ژ مال دەرنەكەڤە!
چەند هیڤی بهێنە سالوخەت کرن گەر ڤەدیتنا هەستێن من تێدا نەبیت بۆچیە ژیان بلا نەبیت، هیڤیێن من ل هەمبەر هەمی ئالاڤ و نەخۆشیێن ژیانێ بەرزەدبن، دکەڤن، ل سەر چەنگێن کۆترەکا شکەستی ژدایک دبن. دناڤ دەستەکێ گولان دا ویژدانا مرۆڤایەتیێ دچینن، ئاخ..ئاخ! هیڤیێن هەمییا یێن د هەمبێزا ئەوان دا، یا من دویرە و گەهشتنا ئەوێ بتنێ خەونە و دناڤ ئەوێ خەونێ دا ژی هندەك دبێژینە تە دەست داهێلە.. چونكی ب زەحمەتە ئەو هیڤی ب خوە بزڤڕنەڤە، بەلێ ئەز دبێژم نە..نە! دێ هیڤێن من هەر زڤڕن و نێزیكە یێن بەرەڤ منڤە دهێن، دێ دەستێ من گرن و من بەرەڤ جیهانەكا دی بن.
ژ نشكەكێڤە، ژ خەو هشیاربووم، من دیت خەونا من بوو ڕاستی! سپێدەهیەكێ ڕۆژ بوو تەماشەڤانەکا بێ دەنگ! هیڤیێن من دەرگەهێ من قوتا و قەستا من كرن، هیڤیان گۆتە من، ئەزم ئەزموونا خودایی دناڤ جەرگێ مرۆڤایەتیێ دا، گەر چەند بژیم؛ دێ بێهن و هەبوونا من دناڤ هەر چاردە تەبەقێن ئەرد و ئەسمانا دا وەکی چرایەکێ بەهەشتێ مینم هەلکری و ساخ.
