عه‌بدولقاهر زاخۆى به‌حس ل نه‌خۆشيا خوه دكه‌ت
ئه‌ڤرۆ نيوز:
سەرۆکێ ھەرێما کوردستانێ، مەسعوود بارزانی و سیداد بارزانی پەیوەندی ب ھونەرمەندێ بەرنیاس عەبدولقھار زاخۆیی کر و بەرھەڤیا خوە نیشا دا بۆ چارەسەریا نەخۆشیا وی بھنێرنە ھەر جھەکێ جیھانێ.
عەبدولقھار زاخۆیی گۆت “رێزدار مەسعوود بارزانی سەرۆکێ ھەرێمێ پەیوەندی ب من کریە و پشتی پرسیارا حالێ من کری، پشتەڤانیا خوە بۆ ھەر ھاریکاریەکێ و ھەڤکاریەکێ دیار کریە و بریارە نوونەرێ جەنابێ وی ب زووترین دەم سەرەدانا من بکەت و یا پێدڤی دێ بۆ من ھێتەکرن، دیسان سیداد بارزانی ژی پەیوەندی ب من کریە بۆ ھەر ھاریکاریەکا پێدڤی”.
ھونەرمەند عەبدولقھار زاخۆیی، دیار کر کو ل رێکەفتی 29/12/2015 ی ل دەمژمێر 1:50 خولەک ب شەڤ بێ ھۆش بوو، دەست و پیێن وی ب ئێکجاری کار نەکرن و گۆت “نەشیام باخڤم، ب تنێ دلێ خوە دا من شیا سۆرەتەکا قورئانا پیرۆز بخوینم و من شەھدە دا و پیچەک ل سەر خوە مام) د دووڤ دا من خوە گەھاندە نۆشداری و حالەتێ من ب مەترسی ھاتە زانین، چونکی ھەکە زوو نەگەھشتبام دبیت ئێدی د ژیانێ دا نەما بام”.
عەبدولقھار زاخۆیی رەت کر کو کورێ وی (ھونەر) ئەگەر بیت کو نیازا چوونا ژ دەرڤەی وەلاتی ھەبوویە و پێ دلگران بوویە و ھیچ دلگرانی یان قەھرەک یان نەخۆشیەک بەری ھینگێ نەبوویە و گۆت “من مرن ب چاڤێ خوە دیت، نەشێم خوە درێژ کەم و تەلەفۆن ژی قەدەغەیە پێ باخڤم”.
ھەمبەر گۆتگۆتکێن وەغەرا وی د تۆرێن جڤاکی دا عەبدولقھار زاخۆیی گۆت “بلا خەلک دلۆڤانیێ ب مرۆڤی ببەت و من داخوازەک ژ وان ھەیە بلا ھەستێن مرۆڤی و کەسوکار و جەماوەرێ مرۆڤی نەشکێنن”.
ژ ئالیێ خوەڤە د. قەیس عوبێد نۆشدارێ ھونەرمەند عەبدولقھار زاخۆیی گۆت “دیار بوویە کو دوھنیاتێن وی دزێدەنە و کۆلبوونا حەفکێ ژی ھەیە و ئەو کولبوون گەھشتیە گۆھێن وی ژی کو ھەڤسەنگیا وی تێک دچیت، لێ پشتی سێ رۆژان ساخلەمیا وی یا باش بووی”.