عیماد یونس: ل ئوردنێ راهێنەرێن پارێزگەهێ دێ ماستەرێ وەرگرن
ئەڤرۆ
د داخویانیەكێ دا راهێنەر و سەرۆكێ ئێكەتیا پارێزگەها دهۆكێ بۆ یاریا تایكۆاندۆیێ دیاركر ئەڤرۆ دێ خولا نێڤدەولەتی یا تایكۆاندۆیێ بۆ راهێنەرێ هەلگرێن ماستەرێ ل وەلاتێ ئۆردن ب دووماهی هێت و ئەم سێ راهێنەر نوونەرێن كوردستانێ د ناڤ خولێ دا پشكداربووین.
زێدەتر عیماد یونس بۆ رۆژناما ئەڤرۆ گۆت: ئەز وەكو سەرۆك شاند و وەهبی مەهدی و حەسەن وەلی راهێنەران وەكو نوونەرێن هەرێما كوردستانێ و ئیراقێ پشكداری خولا نێڤدەولەتی ل وەلاتێ ئۆردن بووینە، ئەوا ژلایێ ئێكەتیا تایكۆاندۆیا جیهانی كیكیۆان هاتیە رێكخستن بۆ وەرگرتنا دووماهی پێشهاتە و تاقیكرن بەری دانا باوەرنامەیا ماستەرێ، د ماوێ خولێ دا شێوێ تیۆری و پراكتیكی وانە ژلایێ پسپۆرێن شارەزا ژ وەلاتێ كوریا باكۆر دهاتنە گۆتن و دبیت هەتا پشتی هەیڤ و نیڤێن دی باوەرنامەیا ماستەرێ بهێت.
هەروەسان ناڤهاتی دیار كر ل سالا بۆری ئەوی پشكداری خولا ب دەستڤە ئینانا باوەرنامەیا ماستەرێ كربوو ب سەركەفتیانە ب دەستڤە ئینایە و گۆت: بۆ داهاتی دێ پلانێن باش هەبن پێخەمەت چاوانیا پێشكەفتنا یاریا تایكۆاندۆیێ ل پارێزگەها دهۆكێ و ئەم هەرسێ پشكدار ژی یێن خەلكێ پارێزگەهێ نە لەوما گەشبینم دێ ل سەر ئاستێ پارێزگەهێ گوهۆڕینێن باش هەبن بۆ ڤێ یاریێ.
