عەلی وەحیددین: سەرباری ئاستەنگان رژدین بۆ یاریا دووماهیێ
ئەڤرۆ
بڕیارە ئەڤرۆ ل دەمژمێر 3:15 ئێڤاری تیما تەپا پێی یا یانەیا دهۆك ل یاریگەها خوە مێڤانداریا یانەیا شەقلاوە بكەت ژ چارچووڤێ قۆناغا پێش دووماهیا كۆپا كوردستانێ دەربازبوون بۆ یاریا دووماهیێ، ژلایێ خوەڤە پێشمەرگەیا هەولێر دێ بیتە مێڤانا یانەیا قەلادز.
ل دور بەرهەڤیێن ئەلهۆیێن چیا راهێنەرێ گەنج یێ تیما یانەیا دهۆك عەلی وەحیددین بۆ رۆژناما ئەڤرۆ دیار كر بۆ یاریا ئەڤرۆ ئەو د بەرهەڤیەكا باش دانە و دێ هەمی بزاڤان كەن هەتا دووماهی چڕكە شەڕی بۆ یاریا دووماهیا كۆپا كوردستانێ بكەن و گۆت: هەرچەندە یاریا ئەڤرۆ دێ ب زووربەیا گەنجێن پارێزگەهێ بیت بتنێ دو یاریزانێن پشكدار د خولا ئیراقێ دا دێ بەرهەڤبن ئەوژی زیاد ئەحمەد و بەیار ئەبۆبەكر و دبیت ئەحمەد ئۆمێگا ژی پشكداربیت، لێ من باوەری ب هەمی یاریزانێن خوە هەنە كو دێ ل دووڤ پلانێن مە یاریێ كەن و گەشبینن بۆ سەركەفتنێ سەرباری یاری ب سانەهی نابیت بەرانبەر یانەكێ كو هیڤیێن وێ ژی یاریا دووماهیێ یە.
هەروەسان ناڤهاتی ئەوچەندە ژی دیاركر یاریزانێن تیمێ ئەڤە بۆ چار هەیڤە مووچەیێن خوە نە وەرگرتینە و ئەڤچەندە كارتیكرنا دەرۆنی ل سەر وان دكەت لێ رژدی و وەفاداریا هەموویان بوویە ئەگەر ژ ئەڤان ئاستەنگان ژی دەربازبكەن و بۆ ناڤێ یانێ بشێن باشترین ئاست و ئەنجام بینن، هیڤییا مە ئەوە ئاریشەیا دارایی یا یاریزانان بهێتە چارەسەركرن.
