فرەنسا هۆشداریێ ددەتە ئیرانێ
وەزارەتا بەرگریێ یا فرەنسا راگەهاند، ئیران بەردەوام ئاریشان ل رۆژهەلاتا ناڤین دروست دکەت، ب سالانە ئیران ناهێلیت رەوشا رۆژهەلاتا ناڤین یا ئارام بیت، ژ بەر ڤێ یەکێ ژی ئالۆزیێن ل هەرێمێ بەردەوامن، ڤێ دووماهیێ ژی ئیرانێ هەموو قانوونێن نێڤدەولەتی بنپێکرن و ئێرشی ئاخا ئسرائیلێ کر، ئەو یەک ژی مەترسیەکا گەلەک مەزنە، د رەوشا نها دا ئیران بوویە مەترسی بۆ وەلاتێن ئۆرۆپا ژی، لێ وەکو فرەنسا وان نەڤێت شەڕێ ئیرانێ بکەن.
وەزارەتا بەرگریێ یا فرەنسا ئەو یەک ژی دیار کریە، ئیران بەردەوام چەکی ددەتە گرۆپێن چەکدار و ل گەلەک دەڤەرێن جیهانێ نها گرۆپێن چەکدارێن سەر ب ئیرانێ بووینە ئاریشە، ل دەریا سۆر ئێرشی گەمیێن بازرگانی دکەن، ل وەلاتێن جودا جودا ل رۆژهەلاتا ناڤین دیسان گرۆپێن چەکدارێن سەر ب ئیرانێ ناهێلن رەوشا دەڤەرێ ئارام بیت، ئەو یەک ژی ب چو رەنگەکێ ناهێتە قەبوول کرن و دڤێت ئیران پێداچوونێ د هەلوەستێ خوە دا بکەت.
ل ئالیێ دی ناسر کەنعانی پەیڤدارێ وەزارەتا دەرڤە یا ئیرانێ ژی راگەهاند، فرەنسا و وەلاتێن دی یێن ئێکەتیا ئۆرۆپا ل گۆر بەرژەوەندیێن ئەمریکا دئاخڤن، ئسرائیلێ هەتا نها گەلەک جاران ئێرشی ئیرانێ کریە و ئاریشە بۆ ئیرانێ دروست کرینە، هەری دووماهیێ ئسرائیلێ ئێرشی بالیۆزخانا ئیرانێ ل شامێ کر، لێ هەتا نها ژی نە فرەنسا و نە ژی وەلاتێن دی یێن ئێکەتیا ئۆرۆپا ئێرشا ئسرائیلێ شەرمزار نەکرن و خوە بێدەنگ کرن.
