فۆرمێن وه‌رگرتنا شوقه‌یێن كرێداران دێ هێنه به‌لاڤكرن
هه‌ولێر، قائید میرۆ:
بڕیاره د ده‌مه‌كێ نێزیك دا ده‌ست ب ئاڤاكرنا 20 هزار شوقه‌یان بۆ وه‌لاتیێن كرێدار بهێته كرن و سه‌رۆكێ كۆمه‌لا كرێداران ژی دبێژیت: د ده‌مه‌كێ نێزیك دا فۆرمێن وه‌رگرتنا شوقه‌یان دێ هێنه به‌لاڤكرن و هه‌ر وه‌لاتیه‌كێ كرێدار مافێ وه‌رگرتنا یه‌كه‌یه‌كا ئاكنجیبوونێ یێ هه‌ی.
گۆران عه‌وێنه‌یی، سه‌رۆكێ كۆمه‌لا كرێداران بۆ رۆژناما ئه‌ڤرۆ دیار كر، ئاڤاكرنا 20 هزار شوقه‌یێن ئاكتجیبوونێ بۆ ته‌خا كرێداران بڕیاره‌كا گرینگه بۆ خه‌لكێ كوردستانێ ژ لایێ سه‌رۆكێ حوكمه‌تێڤه، چونكو هه‌ژمارا كرێداران رۆژ بۆ رۆژێ زێده دبیت و پێدڤی ب ڤێ چه‌ندێ هه‌یه، كو حوكمه‌تا هه‌رێما كوردستانێ پلان هه‌بیت بۆ كێمكرنا قه‌یرانا كرێداران و ئاڤاكرنا یه‌كه‌یێن ئاكنجیبوونێ بۆ ته‌خا كرێداران، ژ به‌ركو د ده‌مێ نوكه دا هه‌ژماره‌كا زۆرا وه‌لاتیان خوه‌دی جهێ ئاكنجیبوونێ نینن و نه‌چارن د شوقه و خانیێن كرێ دا ژیانا خوه ده‌رباز بكه‌ن.
گۆران عه‌وێنه‌یی گۆت: “ئاڤاكرنا شوقه‌یان بۆ خه‌لكێ كرێدار دێ كاریگه‌ریێن خوه هه‌بن و هه‌ژماره‌كا به‌رچاڤ یا كرێداران دێ ژ بڕیارا حوكمه‌تێ مفادار بن، به‌لێ هێشتا فۆرمێن وه‌رگرتنا شوقه‌یان نه‌هاتینه به‌لاڤكرن، بڕیاره د ده‌مه‌كێ نێزیك دا مه‌رج و فۆرمێن وه‌رگرتنا شوقه‌یان ل سه‌ر وه‌لاتیان بهێنه به‌لاڤكرن و هه‌ر كه‌سه‌كێ كرێدار بیت و مه‌رجێن وه‌رگرتنێ هه‌بن دشێت فۆرما وه‌رگرتنا شوقه‌یان تژی بكه‌ت”.
