فەرەنسا بۆ نووژەنكرنا جهێن شوونواری دێ هاریكارییا دەڤەردارییا ئامێدیـێ كەت
ئامێدیێ، مەحمود نهێلی:
یان برایم، قونسلێ گشتی یێ فەرەنسا ل هەرێما كوردستانێ د سەرەدانەكێ دا بۆ دەڤەردارییا ئامێدیێ بەرهەڤیا خوە بۆ نووژەنكرنا جهێن شوونواری یێن دەڤەردارییا ئامێدیێ دیاركر.
وارشین سەلمان، دەڤەردارێ ئامێدیێ بۆ رۆژناما ئەڤرۆ دیار كر، یان برایم، قونسلێ گشتی یێ فەرەنسا ل هەرێما كۆردستانێ، سەرەدانا دەڤەرا ئامێدیێ كر، ل گەل وان كۆمبوونەك ئەنجام دایە و گۆت: «مە ل گەل قونسلێ گشتی یێ فەرەنسا بەحسێ رەوشا دەڤەرێ ب گشتی و گرنگیدان ب جهێن شوونواری یێن دەڤەرا ئامێدیێ كر».
دەڤەردارێ ئامێدیێ گۆت ژی: «مە ب هەڤرا سەرەدانا چەندین جهێن شوونواری، وەكو: گۆڕستانا میران و كەنیسەیا كەڤن و قوتابخانەیا قوبەهان و مزگەفتا مەزن ل ئامێدیێ كر، كو نوكە هندەك ژ وان دهێنە نووژەنكرن و چەندین جهێن دی یێن شوونواری ژی ژ ناڤچوونێ هاتینە پاراستن».
زێدەتر گۆت: «قونسلێ فەرەنسا بەرهەڤیا خوە نیشادا ژ بۆ هاریكاری و هەڤكاریكرنا دەڤەردارییا ئامێدیێ ژ پێخەمەت، پاراستن و نووژەنكرنا جهێن شوونواری یێن دەڤەرێ».
