قوتابخانێن دھۆکێ ل پلا ئێکێ نە ب بجھئینانا رێنمایێن ساخلەمیێ
ئەڤرۆ، سالار محەمەد دۆسکی:
لدووف راپورتێن رێڤەبەریا گشت یا پەروەردێ ل پارێزگەھێ کو دوھی بۆ لژنا پەرلەمانی ھاتینەبلندکرن ١٤ قوتابی ل گەل ١٦ مامۆستا ل ماوێ دو حەفتیان دا تووش بووینە، ١٢٠٠ دایک و بابا خواستینە زارۆکێن وان ئونلاین بخوینن و نەچنە قوتابخانێ.
ھەلز ئەحمەد ئەنداما لژنا پەروەردێ ل پەرلەمانێ کوردستانێ کو ئێک ژ ئەندامێن لژنا لاوکی بوو کو سەردانا رێڤەبەریا گشتی یا پەروەردێ ل پارێزگەھا دھۆکێ کری بۆ بەرپەرێ پەروەردە و زانکۆ ل رۆژناما ئەڤرۆ گۆت: سێ لژنێن لاوکی ھاتینە دروستکرن و ھەر لژنەکێ سێ ئەندامێن پەرلەمانی بخوە ڤەدگرن و ھەر لژنەکێ سەردانا رێڤەبەریەکا گشتی یا پەروەردێ کریە بۆ وەرگرتنا داتایێن ھەر دو حەفتیێن بوری یێن ڤەکرنا دەرگەھێن قوتابخانا، ٢٣ ڤێ ھەیڤێ دێ لژنا بەرھنگاربوونا کورونایێ کومبوونا خوە کەت و سێ بژاردە ل بەردەست ھەنە ل سەر رەوشا قوتابخانا کو ئێک ژ بژاردان بھێتە ھەلبژارتن، ئێک ژ بژاردێن بەردەست، (دەرگەھێن قوتابخانا بھێنەگرتن، بژاردا دووێ قوتابخانە بڤی رەنگی بن سێ رۆژ ب سێ رۆژ، بژاردا سیێ قوتابخانە ئاسایی بن و ھەمی رۆژا دەوامێ بکەن) ئەف داتایە دێ بۆ لژنا پەروەردێ و خواندنا بلند ل پەرلەمانی ھێنە بلندکرن و ھەر دەمەکێ لژنا بالا یا بەرھنگاربوونا کورونایێ بریاردا دێ وی دەمی وەک لژنا پەروەردێ ل پەرلەمانێ کوردستانێ ژی راپورتا خوە ھەبیت.
ھەمان ئەندام دیارکر کو ل دووف راپورتا رێڤەبەریا گشتی یا پەروەردێ ل پارێزگەھا دھۆکێ ل ھەر دو حەفتیێن بوری ل سنورێ پارێزگەھا دھۆکێ، (١٤) قوتابی و (١٦) مامۆستا تووشی کورونایێ بووینە لێ ھەمی نە تووشبوویێن قوتابخانێ نە بەلکو خویشک و برانە و ژن و مێرن و پتریا وان ل ناف خێزانێن خوە تووشی بووینە، بتنێ ئێک قوتابخانە ل ئاکرێ ھاتیەگرتن چوار قوتابی تووش بووینە دو ژوان چوار قوتابیان خویشک و برانە، ل سەرانسەری پارێزگەھا دھۆکێ (٤٧٥) ھزار قوتابی (٣٢) مامۆستا و فەرمانبەران ھەنە، ل ماوێ دو حەفتیان ھەر حالەتێن مرنێ نەبووینە، (١٢٠٠) قوتابیان داخازکرینە کو ئونلاین بخوینن و نەھێنە قوتابخانێ و خەلکێ بەرھەڤە زارۆکێن وان بچنە قوتابخانێ .
ھەلزێ گۆتژی: باشترین رێک بۆ خواندنێ ل ڤی دەمی دا خواندن ب شێوازێ تناوب بیت ئانکو سێ رۆژ ب سێ رۆژ، راستە بارێ مامۆستا گران بوویە لێ باشترە ژ خواندنا ئونلاین، ھەکە خواندنگەە ببیتە ئاسایی رەنگە کونترولکرنا کورونایێ ناھێتەکرن، بژاردا ھەرە باش ھەر دو حەفتیان جارەکێ لژنا پەرلەمانی سەردانا رێڤەبەریا بکەت و ئاماران وەربگریت وی دەمی بریار بھێتەدان، ئێکەم لژنە راپورتا خوە ل سەر رەوشا کورونایێ ل قوتابخانا بلندکری، راپورتا لژنا دھۆکێ بوو، لێ لدووف پێزانینا راپورتا ھەولێرێ ژی تووشبوونا مامۆستا و قوتابیان بەر ب کێمبوونێ ڤە دچیت.
ھەلزێ دیارکر ژی کو لژنا پەرلەمانی ل دھۆکێ سەردانا قوتابخانا کریە و دێ رۆژێن داھاتی ژی سەردانا چەندین قوتابخانا کەن و پشست بەستن بتنێ ل سەر داتا ناھێتەکرن، رێنما ل قوتابخانا دھێنە جێبەجێکرن لێ رەنگە رێنما ل خواندنگەھێن بنەرەت یا ب ساناھی نەبیت، لێ کونترۆلکرن و پێگێریکرن ب رێنما قوتابخانێن پارێزگەھا دھۆک ل سەرانسەری ھەرێما کوردستانێ باشترن.
ھەلز ئەحمەد سەلیم ئەو ژی گۆت: باشترین بژاردە خواندن ب تناوب بیت و ھەکە دەرگەھێن قوتابخانا بھێنەگرتن دڤێت مە پێ گوھورێ وی ھەبیت و ھەکە بھێتە پاشخستن مە دەمێ زێدەکری نەمایە و باشترین بژاردە رەوشا خواندنێ وەک نوکە بەردەوام بیت، چنکو سالا بوری گەلەک خواندن ژ قوتابیان چوو و قوتابیێن قوناغا ئێکێ بنەرەت ل سالا بوری دەربازبووینە قوناغا دووێ نوکە پیتا نوزانن و دڤێت قوتابخانە جارەکا دی پێداچوونێ بکەن و پیتا نیشا بدەن.
ناڤبری گۆتژی: لدووف رێنما ھەر قوتابخانەکا پێنچ قوتابی توش بن ئەو قوتابخانە بھێتە داخستن و بڤی رەنگی قوتابیێن ھندەک پولێن دی و ھندەک قوناغێن دی دبنە قوربانی ڤێ بریارێ و مە پێ باشە پێداچوون تێدا بھێتەکرن و تایبەت پولا دوازدێ چنکو ١٤ رۆژان گەلەک وانە ژ قوتابیان دچن.
